ក្រោយការលក់ហាក់មានការធ្លាក់ចុះ ក្រុមហ៊ុនដ៏ល្បី Nokia បានប្រកាសបញ្ឈប់បុគ្គលិករបស់ខ្លួនប្រមាណជា ១,៤០០នាក់ដែលស្មើនឹង ១៦% ចេញពីក្រុមហ៊ុន ដើម្បីកាត់បន្ថយការចំណាយ។ នេះបើយោងតាមការចុះផ្សាយរបស់សារព័ត៌មានក្រៅស្រុកមួយឈ្មោះថា The News York Time ។
ប្រភពខាងលើនេះបានឱ្យដឹងថា ក្រុមហ៊ុន Nokia គ្រោងនឹងកាត់បុគ្គលិក ១,៤០០នាក់ ក្នុងចំណោមបុគ្គលិកសរុប ៨,៦០០ នាក់ ខណៈដែលការលក់របស់ក្រុមហ៊ុនបានធ្លាក់ចុះ ២០ ភាគរយ ចាប់ពីខែកក្កដាដល់ខែកញ្ញា បើធៀបនឹងរយៈពេលដូចគ្នានៅឆ្នាំមុន។ ហើយចំពោះការកាត់បុគ្គលិកនេះអាចធ្វើឱ្យក្រុមហ៊ុន Nokia អាចកាត់បន្ថយចំណាយបានចំនួន ១,២ពាន់លានអឺរ៉ូ ឬប្រហែល ១.៣ ពាន់លានដុល្លារអាមេរិក។
បើតាមការលើកឡើងរបស់ នាយកប្រតិបត្តិរបស់ក្រុមហ៊ុន Nokia លោក Pekka Lundmark បានលើកឡើងពាក់ព័ន្ធទៅនឹងបញ្ហានេះថា " ស្ថិតក្នុងស្ថានភាពដ៏លំបាកនេះ យើងនឹងព្យាយាមកាត់បន្ថយការចំណាយដែលមិនចាំបាច់មួយចំនួនចេញ ដើម្បីកាត់បន្ថយចំណាយរបស់ក្រុមហ៊ុន” ។
គួរបញ្ជាក់ផងដែរថា Nokia ធ្លាប់ជាក្រុមហ៊ុនមួយដែលឈានមុខគេក្នុងការផលិតទូរស័ព្ទកាលពីប៉ុន្មានឆ្នាំមុន ប៉ុន្តែវាបានធ្លាក់ចុះវិញក្រោយពេលក្រុមហ៊ុន Apple បានបញ្ចេញទូរស័ព្ទ iPhone ឆ្នាំ ២០០៧ ។ បន្ទាប់មក ក្រុមហ៊ុន Nokia បានលក់ក្រុមហ៊ុនខ្លួនឱ្យទៅឱ្យ Microsoft ក្នុងឆ្នាំ ២០១៣ ៕
