នៅថ្ងៃទី១ ខែកក្កដា ឆ្នាំ២០២៤ នេះ គម្រោងកីឡដ្ឋានតេជោ ដែលមានទីតាំងស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់ ត្រូវបានបើកការដ្ឋានសាងសង់ផ្លូវការ ខណៈទីតាំងសាងសង់គម្រោងនេះគឺជាអតីតវាលយន្ដហោះក្នុងអំឡុងសម័យ ប៉ុល ពត។

តាមការបញ្ជាក់ពីឯកឧត្ដម កែវ រតនៈ រដ្ឋមន្ដ្រីក្រសួងរ៉ែ និងថាមពល បានឲ្យដឹងថា «ស្រុកក្រគរខេត្តពោធិ៍សាត់ទទួលបានមជ្ឈមណ្ឌលកីឡាដ្ឋានតេជោ នៅលើទីតាំងអតីតវាលយន្តហោះដែលប៉ុល ពត ឈូសចោលយកមកធ្វើស្រែ។ ប្រជាជនខេត្តពោធិ៍សាត់សូមថ្លែងអំណរគុណអស់ពីចិត្តជូនសម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត ដែលបាននិងកំពុងខិតខំទាំងយប់ថ្ងៃដើម្បីប្រទេសកម្ពុជាដែលមានសន្តិភាព ការឯកភាពជាតិនិងការរីកចម្រើនឥតឈប់ឈរ»។

ពហុកីឡដ្ឋាននេះ នឹងត្រូវសាងសង់នៅលើផ្ទៃដី ២៥ ហិកតា ដែលរួមមានទីលានបាល់ទាត់ខ្នាតអន្តរជាតិ ទីលានមហោស្រព ទីលានបាល់ទះ ទីលានបាល់បោះ ទីលានរត់ប្រណាំង ទីលានវាយសី កន្លែងអង្គុយទស្សនា កន្លែងហាត់ប្រាណ ប្រព័ន្ធផ្លូវខ្វាត់ខ្វែង វាលស្មៅ កន្លែងក្មេងលេង កន្លែងអង្គុយលេង ស្រះទឹក និងកន្លែងចតរថយន្ត៕