នៅមុននេះបន្ដិចក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានប្រកាសអនុម័តគម្រោងបង្កើតរោងចក្រថ្មីៗចំនួន ២ ជូនទៅកាន់ក្រុមឯកជនធ្វើការវិនិយោគ។ ដោយក្នុងនោះនៅទឹកដីរាជធានីភ្នំពេញ ១ កន្លែង និងខេត្ដកំពង់ស្ពឺចំនួន ១ កន្លែង។ តាមការបញ្ជាក់គម្រោងទាំងពីរនេះ មានទុនវិនិយោគសរុបជាង ១០ លានដុល្លារ និងបានបង្កើតឱកាសការងារជិត ៤ ពាន់កន្លែងជូនជាពលរដ្ឋកម្ពុជាផងដែរ។

យោងការដកស្រង់ពី CDC ដែលបានចុះផ្សាយនៅថ្ងៃទី១០ ខែមីនា ឆ្នាំ២០២៣ នេះបានឲ្យដឹងថា ក្រុមហ៊ុនដែលទទួលការវិនិយោគលើការបង្កើតរោងចក្រថ្មីៗទាំងពីរខាងលើនេះរួមមាន៖

១- “DUN TAI GARMENT (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិព្រៃស្រួល ឃុំពោធិ៍អង្ក្រង ស្រុកបសេដ្ឋ ខេត្តកំពង់ស្ពឺ ក្នុងទុនវិនិយោគប្រមាណ ៥,១លានដុល្លារអាម៉េរិក និងអាចបង្កើតការងារបានចំនួន ១.៣២៦កន្លែង។

២- “PRECLO (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ ៥,១លានដុល្លារអាម៉េរិក និងអាចបង្កើតការងារបានចំនួន ១.៦៣៩កន្លែង៕