ប្រសិនបើធ្វើដំណើរតាមដងផ្លូវនានាក្នុងរាជធានីភ្នំពេញ គេមិនអាចប្រកែកថាមិនធ្លាប់ឃើញហាង Tube Coffee ដែលជាយីហោក្នុងស្រុក មានមហិច្ឆតាពង្រីកខ្លួន ពាំនាំកាហ្វេរសជាតិបែបខ្មែរ ចេញទៅក្រៅប្រទេសនោះទេ។ ជាក់ស្ដែងត្រឹមរយៈពេល៥ឆ្នាំប៉ុណ្ណោះ យីហោក្នុងស្រុកមួយនេះអាចពង្រីកខ្លួនលឿនស្វ័យគុណ ពីសាខាទី១នៅម្ដុំក្ដាន់ពីរ មកជា២៣សាខាក្នុងឆ្នាំ២០២២នេះ។
ថ្លែងប្រាប់ Business Cambodia កញ្ញា ស៊ូ មុន្នីពេជ្រ ដែលជា CEO ហាងកាហ្វេនេះ បានចែករំលែកនូវចំណុចពិសេសៗជាច្រើនរបស់ Tube Coffee ដែលធ្វើឱ្យអាជីវកម្មនេះរីកចម្រើនលឿនមកទល់ចំណុចបច្ចុប្បន្ន។
១. ចងក្រងរូបមន្តឱ្យមានស្ដង់ដារច្បាស់លាស់បំផុត
ចាប់តាំងពីពេលចាប់ផ្ដើមដំបូងមក យីហោកាហ្វេនេះបានចងក្រងរូបមន្តកាហ្វេ និងបច្ចេកទេសសំខាន់ៗ ដែលនាំឱ្យកាហ្វេមួយកែវមានរសជាតិឆ្ងាញ់បំផុត និងមិនប្រែប្រួល មិនថាជាគ្រាប់កាហ្វេ ទឹកស្ករ ទឹកកកនោះទេ។
២. បញ្ចូលរសជាតិកាហ្វេចូលក្នុងបេះដូង
បើតាមប្រសាសន៍ CEO វ័យក្មេងរូបនេះ បានបង្ហាញថា គាត់ពិសារកាហ្វេ និងសាកល្បងរសជាតិកាហ្វេរាល់ថ្ងៃ ហើយបើគិតជាទម្ងន់សាច់កាហ្វេសរុប មិនក្រោម១តោននោះទេ នារយៈពេល២ឆ្នាំមកនេះ។ រសជាតិកាហ្វេបានជ្រាបចូលទៅក្នុងបេះដូងរបស់ CEO រូបនេះយ៉ាងជ្រាលជ្រៅបំផុត ទើបអាចធ្វើឱ្យគាត់អាចរកឃើញនូវរសជាតិកាហ្វេដែលអាចជ្រាបចូលដល់បេះដូងអតិថិជន។
៣. ផ្ដោតលើគុណភាព សេវាកម្ម និងតម្លៃសមរម្យ
កាហ្វេនេះផ្ដោតលើការផ្ដល់នូវរសជាតិកាហ្វេដែលឆ្ងាញ់ សេវាកម្មលឿនរហ័ស និងមានតម្លៃសមរម្យដែលប្រជាជនកម្ពុជាអាចទទួលយកបាន ដែលនេះហើយធ្វើឱ្យអាជីវកម្មនេះ ទទួលបានការគាំទ្រច្រើន មកទល់នឹងពេលនេះ។
៤. ហ្វ្រេនឆាយជាទំនោរអនាគត
Tube Coffee បានប្រើយុទ្ធសាស្ត្រហ្វ្រេនឆាយបែបកូនកាត់ ដែលជួយឱ្យអាជីវកម្មនេះពង្រីកខ្លួនបានលឿនរហ័សបំផុត។ ហ្វ្រេនឆាយកូនកាត់ ដែលបានធ្វើគឺ ក្រុមហ៊ុនមេជាអ្នកគ្រប់គ្រងលើប្រតិបត្តិការសំខាន់ៗទាំងអស់ ចំណែកឯម្ចាស់ដែលទិញហ្វ្រេនឆាយ គឺដើរតួនាទីជាអ្នកជួយជំរុញភ្ញៀវឱ្យញ៉ាំកាហ្វេតែប៉ុណ្ណោះ។
៥. លក់កាហ្វេផ្សារភ្ជាប់បច្ចេកវិទ្យា
ថ្វីត្បិតតែលក់កាហ្វេពិតមែន ប៉ុន្តែ Tube Coffee ក៏បានផ្សារភ្ជាប់អាជីវកម្មខ្លួនជាមួយនឹងបច្ចេកវិទ្យាទំនើបៗផងដែរ ដើម្បីជួយឱ្យការគ្រប់គ្រងរសជាតិ សាខា និងផ្នែកសំខាន់ៗកាន់តែមានប្រសិទ្ធភាពបំផុត។
៦. បុគ្គលិកសន្ដិសុខក៏ជាអ្នកលក់
ស្ដាប់ទៅហាក់ចម្លែកបន្តិច ប៉ុន្តែសម្រាប់ Tube Coffee មិនបានចាត់ទុកបុគ្គលិកសន្តិសុខក៏ជាអ្នកលក់មួយរូបផងដែរ ពោលគឺគាត់ដឹងច្បាស់ពីម៉ឺនុយរបស់ហាង និងអាចជួយកម្មង់កាហ្វេរសជាតិផ្សេងៗជំនួសភ្ញៀវផងដែរ។
ជារួមមកវិញ ការពង្រីកខ្លួនលឿន តែប្រព័ន្ធគ្រប់គ្រងមិនទាន់រឹងមាំ គឺជាចន្លោះប្រហោងដ៏ធំដែលអាចធ្វើឱ្យអាជីវកម្មងាយនឹងដួលរលំ។ អាស្រ័យហេតុនេះ ម្ចាស់អាជីវកម្មត្រូវខំផ្ដោតលើការពង្រឹងប្រព័ន្ធគ្រប់គ្រងឱ្យរឹងមាំសិន ចាំផ្ដោតលើការពង្រីកទើបជាជម្រើសដែលល្អប្រសើរបំផុត៕
ចង់រៀនគំនិតរកស៊ីល្អៗប្រចាំថ្ងៃ ក្នុងក្រុមចែករំលែកពិសេស ឥតគិតថ្លៃ សូមចុចទីនេះ https://t.me/LongVathanak777
អត្ថបទដោយ៖ ឡុង វឌ្ឍនៈ (ប្រធាននិពន្ធផ្នែកដឹកនាំ)
តេឡេក្រាម៖ 096 351 7713
