ជីវិតមនុស្សកើតមកមានន័យព្រោះរឿងធំៗ៥យ៉ាង ទី១គឺខ្លួនឯង ទី២សុខភាព ទី៣គ្រួសារ ទី៤អាជីព និងទី៥ការសេពគប់។ ក្នុងចំណោមរឿងទាំងនេះការរៀបការកសាងគ្រួសារក៏ជាផ្នែកមួយដែលនាំឱ្យជីវិតមានន័យជោគជ័យមួយផ្នែកដែរប្រសិនបើរើសដៃគូត្រូវ។ យ៉ាងណាមិញខាងក្រោមនេះគឺជាបណ្តុំដំបូន្មាន ល្អបំផុតរបស់បុគ្គលល្បីៗ៤រូប សម្រាប់អ្នកសម្រេចចិត្តរៀបការ។
១. លោកតាបណ្ឌិត កុល ផេង បិតាស្ថាបនិក សាកលវិទ្យាល័យបញ្ញាសាស្ត្រកម្ពុជា៖
លោកតាធ្លាប់បានមានប្រសាសន៍ថា “រកប្រពន្ធណាដែលហ៊ានទទួលស្គាល់ម្តាយយើងជាអ្នកក្រ ចិត្តស្មោះសរ ប្រសើរជាងរូបស្អាត”។ បណ្តាំមាសខាងលើនេះបានបង្ហាញនូវខ្លឹមសារដ៏សំខាន់ ថាដៃគូណាដែលព្រមទទួលស្គាល់យើងជាប្តីជាប្រពន្ធ នៅមិនទាន់គ្រប់គ្រាន់ដូចគេព្រមទទួលស្គាល់ពុកម៉ែយើងជាអ្នកក្រនោះទេ សណ្តានចិត្តល្អព្រមរួមសុខទុក្ខមានក្រជាមួយគ្នា គឺមានតម្លៃជាងរូបស្អាតឆ្ងាយណាស់។
២. ឯកឧត្តមបណ្ឌិត ម៉ុង ឬទ្ធី បិតាកសិកម្មស្រុកខ្មែរ
ឯកឧត្តមបានដំណាលប្រាប់ថា "រកមនុស្សដែលត្រូវជាមួយជំនួញរបស់យើង អ្នកមានសិទ្ធរកប្រពន្ធយ៉ាងស្រួល រឿងអីអ្នកមិនរកប្រពន្ធឲ្យត្រូវនឹងជំនួញខ្លួនឯង”។ ចំណុចនេះឯកឧត្តមចង់បង្ហាញថារើសដៃគូដែលមានគោលដៅដូចគ្នា មានអត្តចរិតស្រដៀងគ្នា ងាយចុះសម្រុងទើបជីវិតគូឆាប់រីកចម្រើន។ ភរិយារបស់ឯកឧត្តមគឺ លោកជំទាវ ម៉ែន ស៊ុន ម៉ុង ឫទ្ធី គឺតែងធ្វើផ្អកប្រហុក ត្រីងៀត ទោះបីជា ស្វាមីជាសេដ្ឋី ក៏ដោយ ភាគច្រើនគេសង្កេតឃើញលោកជំទាវនិងឯកឧត្តម តែងទៅធ្វើកិច្ចការងារផ្សេងៗជាមួយគ្នា នៅតាមចម្ការ ដែលនេះបង្ហាញថាដៃគូមានគោលដៅនិងអត្តចរិតដូចគ្នា គ្រួសារនឹងមានសុភមង្គល។
៣. សេដ្ឋីចិន Jack Ma មហាបុរស Alibaba
លោក Jack Ma ពីបុរសក្រីក្ររូបរាងមិនស្អាតជួបរឿងបរាជ័យស្ទើរកន្លះជីវិត ប៉ុន្តែភរិយាលោក Zhang Ying ពិតជាមិនរុញរានឹងហូបបាយកកជាមួយ Jack Ma ទេហើយលោកស្រីក៏ជាមនុស្សទី១ដែលមើល ឃើញពីអ្វីដែលអ្នកដទៃមិនឃើញពីប្តីរបស់ខ្លួន រហូតអាចជំរុញលោកឱ្យក្លាយជាមហាសេដ្ឋីមកទល់សព្វថ្ងៃនេះ។ ចំណុចនេះភរិយារបស់ Jack Ma បានបង្ហាញថាដៃគូកម្សត់កម្រជាមួយគ្នានៅគ្រាលំបាក មើលឃើញពីចំណុចល្អរបស់យើង និងបន្តបំពេញចំណុចដែលខ្វះខាតឱ្យគ្នា គឺជាដៃគូដែលយើងអាចពិចារណារៀបការជាមួយ។
៤. សេដ្ឋីបច្ចេកវិទ្យាវ័យក្មេង Mark Zuckerberg
“នាងជាទំនាញទាញចិត្តខ្ញុំតំាងពីដំបូង នាងជាមនុស្សដំបូងដែលគាំទ្រខ្ញុំ” ប្រពន្ធមេធំ Facebook លោកស្រី Priscilla Chan គឺជាស្រ្តីម្នាក់នៅពីក្រោយអនាគតលោក តាំងពីលោកមិនទាន់មានអ្វីច្បាស់លាស់សោះ ព្រោះកាលមុនពេល Facebook ចាប់កំណើតជាង១០ឆ្នាំជាងនេះ Mark ត្រឹមជាសិស្សក្រៅសាលាម្នាក់ប៉ុណ្ណោះ ប៉ុន្តែ Mark មានក្តីស្រមៃធំរហូតមានអ្នកខ្លះចម្អកថាវាជាគំនិតឆ្កួតលីលា។ ដោយឡែកចំពោះដៃគូម្នាក់នេះដែលលោកទើបជួបលើកដំបូងសោះបែរជាគាំទ្រលោកយ៉ាងពេញទំហឹងហើយក្លាយជាអតិថិជនដំបូងបំផុតរបស់ Facebook ទៀត។
ជាការពិតណាស់ដូចមានពាក្យមួយឃ្លាគេនិយាយថាតៗគ្នាថា នៅពីក្រោយបុរសជោគជ័យតែងមានស្រ្តីល្អម្នាក់ ព្រោះបើរើសគូស្រករត្រូវស្មើនឹងជីវិតជោគជ័យ៥០% ចំណែកឯ៥០%ទៀត អាស្រ័យលើការប្រឹងប្រែងរបស់បុគ្គលផ្ទាល់ខ្លួនដែរ។ ដៃគូល្អទៅបានអាស្រ័យចិត្តរបស់ភាគីសងខាង ជាអ្នកផ្តល់ឱ្យទៅតាមលក្ខណៈជាក់ស្តែង គ្រួសារនឹងមានសុភមង្គល ការរកស៊ីក៏រីកចម្រើនទៅតាមនោះដែរ៕
អត្ថបទដោយ៖ ពីង ជូអេង
