លោកស្រី Marine Le Pen ត្រូវបានមជ្ឈដ្ឋានទូទៅចាប់អារម្មណ៍ជាខ្លាំង បន្ទាប់ពីស្ត្រីដ៏មានឥទ្ធិពលរូបនេះ ទទួលបានសំឡេងគាំទ្រច្រើនបំផុតឈរលើលំដាប់លេខរៀងទីពីរ នៃការបោះឆ្នោតជុំទីពីរផ្តាច់ព្រ័ត្រកាលពីពាក់កណ្តាលឆ្នាំ២០២២ ខណៈឈរលើលេខរៀងទីមួយគឺលោក Emmanuel Macron ដណ្តើមកៅអីប្រធានាធិបតីបារំាង។ ចុះតើអ្នកដឹងទេ ទម្រាំតែមានថ្ងៃនេះ ស្ត្រីខាងលើបានឆ្លងកាត់នូវការលំបាកជាច្រើន ជាពិសេសស្ទើតែបាត់បង់ជីវិតក្នុងគ្រោះធំមួយថែមទៀតផង។
Marine Le Pen កើតនៅថ្ងៃទី០៥ ខែសីហា ឆ្នាំ១៩៦៨ (វ័យ៥៣ឆ្នាំ) ក្នុងទីក្រុងប៉ារីស ប្រទេសបារាំង។ នាងជាកូនពៅក្នុងចំណោមបងប្អូនស្រីបីនាក់ ព្រមទាំងត្រូវជាកូនរបស់លោក Jean Marie Le Pen ជាអ្នកនយោបាយ ជាមេដឹកនាំបក្ស National Front និងអតីតជាទាហានប៉ារ៉ាម្នាក់ និងលោកស្រី Pierrette Lalanne។ ក្នុងឆ្នាំ១៩៧៦ ខណៈដែលកុមារី Marine ស្ថិតក្នុងវ័យ០៨ឆ្នាំនៅឡើយ នាងបានរួចផុតជីវិតពីការវាយប្រហារដោយគ្រាប់.បែក ទៅលើគ្រួសារទាំងមូលខណៈពួកគេកំពុងគេង ប៉ុន្តែជាសំណាងល្អគ្រប់សមាជិកទាំងអស់ពុំមាននរណារងគ្រោះថ្នាក់ឡើយ។ លើសពីនេះ Marine ក៏ជាក្មេងស្រីម្នាក់ដែលមិនបានទទួលភាពកក់ក្តៅគ្រួសារផងដែរ បន្ទាប់ពីឪពុកម្តាយរបស់នាងបានលែងលះគ្នា ក្នុងឆ្នាំ១៩៨៧។
ពីតូចកុមារី Marine បានសិក្សានៅសាលា Florent Schmitt នៅទីក្រុងSaint-Cloud។ លុះធំដឹងក្តី នាងបានសិក្សានៅសកលវិទ្យាល័យ Pantheon-Assas ព្រមទាំងបញ្ចប់ថ្នាក់អនុបណ្ឌិតឯកទេសច្បាស់ក្នុងឆ្នាំ១៩៩១ និងបញ្ចប់ផ្នែកច្បាប់ឧក្រិដ្ឋកម្មក្នុងឆ្នាំ១៩៩២។ Marine បានបញ្ចប់ជីវិតជាយុវវ័យ នាងបានចំណាយពេលអស់រយៈពេល០៦ឆ្នាំ (ពីឆ្នាំ១៩៩២ ដល់ឆ្នាំ១៩៩៨) ដើម្បីធ្វើជាមេធាវី។ បន្ទាប់មកនាងបានប្រឡូកចូលក្នុងកិច្ចការបក្ស National Front ក្នុងឆ្នាំ១៩៨៦ ដោយមានឪពុកនាងធ្លាប់ជាមេដឹកនាំបក្សនេះផ្ទាល់។ លោកស្រីត្រូវបានគេបោះឆ្នោតធ្វើជាទីប្រឹក្សាតំបន់ក្នុងឆ្នាំ១៩៩៨ នឹងបន្តកាន់ដំណែងដល់បច្ចុប្បន្ន និងជាសមាជិកសភាអឺរ៉ុបពីឆ្នាំ២០០៤ដល់បច្ចុប្បន្ន។ ក្រោយមកក៏ក្លាយជាទីប្រឹក្សាក្រុង ចាប់ពីឆ្នាំ២០០៨ដល់ឆ្នាំ២០១១។ លោកស្រីក៏បានជាប់ឆ្នោតក្លាយជាមេដឹកនំាបក្សនេះបន្តពីឪពុក ក្នុងឆ្នាំ២០១១ ផងដែរ។
លោកស្រី Marine Le Pen បានឈរឈ្មោះបោះឆ្នោតជ្រើសរើសប្រធានាធិបតី ជាលើកទីបីក្នុងឆ្នាំ២០២២នេះ។ លោកស្រីបានជាប់ឈរលើលំដាប់លេខរៀងទីពីរជាមួយនឹងគូប្រជែងគឺលោក Emmanuel Macron។ ស្ត្រីរូបនេះត្រូវបានជាប់ចំណាប់ថ្នាក់ ក្នុងនាមជាមនុស្សមានឥទ្ធិពលបំផុតក្នុងឆ្នាំ២០១១ និងឆ្នាំ២០១៥ ដោយទស្សនាវដ្តី Time 100។ ជាថ្មីម្តងទៀតក្នុងឆ្នាំ២០១៦ លោកស្រីត្រូវបានជាប់ចំណាច់ថ្នាក់ជាបុគ្គលដ៏មានឥទ្ធិពលទីពីរក្នុងនាមជាសមាជិកសភាអឺរ៉ុប បន្ទាប់ពីប្រធានសភាអឺរ៉ុប លោក Martin៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
