ជាទូទៅនៅតំបន់ស្រុកស្រែចំការភាគច្រើនដីដែលនៅជុំវិញផ្ទះក្រៅពីការដាំដំណាំផ្លែឈើហូបផ្លែបន្តិចបន្តួច ពួកគាត់តែងតែទុកចន្លោះឱ្យទំនេរចោល ដោយមិនបានដាក់ដាំអ្វីបន្ថែមនោះទេ។ដោយឡែកសម្រាប់អ្នកមីង រូបនេះវិញ បានច្នៃដីដែលមាននៅជិតៗផ្ទះមកដាំបន្លែអាចរកចំណូលមួយខែៗរាប់ពាន់ដុល្លារ។
ជាក់ស្តែង បើតាមការលើកឡើងរបស់ អ្នកមីង ប៊ិល ហ៊ុន ជាប្រជាកសិករដាំបន្លែនៅខេត្តពោធិ៍សាត់ បានឱ្យដឹងថា គាត់បានដាំស្ពៃក្តោប ដោយប្រើប្រព័ន្ធតំណក់ទឹក លើផ្ទៃដីចំនួន១០អា អាចប្រមូលផលជាបណ្តើៗបានចំនួន ១តោន បន្ទាប់ពីគាត់បានដាំកូនបានរយៈពេល ៧០-៩៥ថ្ងៃ និងបានលក់ស្ពៃក្តោបក្នុងតំលៃ ៣០០០៛ /ក្នុង១គីឡូក្រាម ទៅឱ្យអ្នកដែលរស់នៅក្នុងភូមិ ដែលមកប្រមូលទិញដល់ផ្ទះ និងពេលខ្លះទៅលក់រាយនៅទីកាន់ទីផ្សារផងដែរ។
អ្នកមីងបានលើកឡើងបន្ថែមថា តាមរយៈការប្រមូលផលកន្លងមក ជាមធ្យមបរិមាណផលសរុប មិនតិចជាង៣តោននោះទេ ក្នុងផ្ទៃដី១០អា ។ ចំពោះការចំណាយធាតុចូលក្នុង១វដ្ដផលិតកម្មដំណាំស្ពៃក្តោប សរុប ២.៥០០.០០០៛ បូកទាំងកំលាំងពលកម្ម ហើយទទួលបានប្រាក់ចំណូល ៩.០០០.០០០រៀល ទទួលបានចំណេញសុទ្ធ ស្មើ ៥.៥០០.០០០រៀល។
តាមរយៈការរៀបរាប់ខាងលើនេះ សបញ្ជាក់ឱ្យឃើញថា សម្រាប់បងប្អូនដែលមានដីទំនេរមិនថាតូចមិនថាធំ ឱ្យតែអាចមានចន្លោះដាក់ដាំបន្លែបង្ការបាន បងប្អូនគួរតែសាកល្បងធ្វើ ព្រោះក្រៅពីដាំដើម្បីបរិភោគខ្លួនឯងបានដោយសុវត្ថិភាពហើយនោះ បងប្អូនក៏អាចលក់យកប្រាក់កម្រៃផ្គត់ផ្គង់គ្រួសារបានផងដែរ៕
អត្ថបទដោយ៖សម្បត្តិ សុខឡាង