«ធ្វើមនុស្សកុំមើលងាយមនុស្ស ព្រោះវាសនាអនាគតមើលមិនឃើញ» លោក Khaby Lame តារា TikTok ដ៏ល្បីល្បាញដែលជាអតីតកម្មករអត់ការងារធ្វើ ត្រូវបានតែងតាំងជាទូតសុច្ឆន្ទៈ FIFA World Cup Qatar 2022 នៅប្រទេសកាតា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Billionaires Africa ចុះនាថ្ងៃទី០៧ ខែតុលា ឆ្នាំ២០២២។
កំលោះវ័យ២២ឆ្នាំ Khaby Lame ត្រូវបានគេស្គាល់ថាជាបុគ្គលម្នាក់ដែលទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម TikTok តាមរយៈការបង្ហោះជាវីឌីអូបែបកាយវិការនិងទឹកមុខកំប្លែងស្ងួត ដែលមានចំនួនអ្នកតាមដានរហូតដល់ទៅ ១៥០លាននាក់ឯណោះ។ អ្វីដែលគួរឲ្យចាប់អារម្មណ៍ភាពល្បីល្បាញនេះកើតឡើងក្រោយលោកបានបាត់បង់ការងារជាកម្មកររោងចក្រមួយកន្លែងអំឡុងពេលជំងឺរាតត្បាតកូវីដ-១៩ កាលពីឆ្នាំ២០២០។ មកដល់ពេលនេះតារា TikTok សេណេហ្កាល់ខាងលើ អាចរកបានប្រាក់ចំណូលរហូតដល់ទៅ ៧៤ម៉ឺនដុល្លារពីការផុសវីឌីអូមួយលើកៗ។
យ៉ាងណាមិញកាលពីពេលថ្មីៗនេះ Khaby Lame ត្រូវបានតែងតាំងជាទូតសុច្ឆន្ទៈសម្រាប់ព្រឹត្តិការណ៍ FIFA World Cup ឆ្នាំ២០២២ នៅប្រទេសកាតា។ តំណែងនេះ ត្រូវបានធនាគារជាតិកាតា (QNB) ដែលជាធនាគារដ៏ធំជាងគេបង្អស់ក្នុងតំបន់មជ្ឈឹមបូពា៍ និងអាហ្វ្រិក ជាអ្នកប្រកាសតែងតាំង។
គួរជម្រាបផងដែរថា បុរសជនជាតិសេណេហ្គាល់លោក Khaby Lame បច្ចុប្បន្នកំពុងរស់នៅលើទឹកដីប្រទេសអ៊ីតាលី ជាមួយនឹងទ្រព្យសម្បត្តិសុទ្ធប្រមាណ ១៣លានដុល្លារ គិតត្រឹមពាក់កណ្តាលខែសីហា ឆ្នាំ២០២២ ចេញផ្សាយដោយគេហទំព័រ caknowledge៕
ខ្វះគំនិតរកស៊ី ចង់បានសៀវភៅចែកជូនហ្វ្រី ចង់ជួបវាគ្មិនដែលជាសហគ្រិនល្បីៗ សូមកុំភ្លេចមកចូលរួមពិព័រណ៍ Startup Expo 2022 សូមចូលក្នុងគ្រុបនេះ https://t.me/startupexpo2022
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ក្រដាស១សន្លឹក»
ទំនាក់ទំនងតាមរយៈ៖ Facebook Page: Kan Dara ឬ Telegram: 0964997366
