តើនរណាខ្លះមានក្តីស្រមៃចង់ដើរលេងជុំវិញពិភពលោក? កញ្ញា Kesi Irvin បានលាឈប់ពីការងារ ដើម្បីចំណាយពេលហោះជុំវិញផែនដីហើយថែមទាំងអាចកើបចំណូលពីដំណើរកម្សាន្តនេះទៀតផង។ នាងបាននិយាយថា៖ «ខ្ញុំដឹងថាខ្ញុំនឹងសោកស្តាយប្រសិនបើខ្ញុំមិនបានធ្វើវា»។
ស្ត្រីវ័យ៣២ឆ្នាំខាងលើ បានសម្រេចចិត្តលាឈប់ពីការងារពេញម៉ោង ប្រាក់ខែខ្ពស់ តួនាទីធំ ដើម្បីដើរតាមក្តីស្រមៃរបស់ខ្លួនដោយធ្វើដំណើរជុំវិញពិភពលោក។ នាងបានប្រាប់ CNBC យ៉ាងដូច្នេះថា៖ «កាលខ្ញុំនៅតូច ខ្ញុំតែងជាមនុស្សម្នាក់ដែលពូកែគ្រប់បែបយ៉ាងដែលខ្ញុំបានធ្វើ។ នៅក្នុងសាលាខ្ញុំបាននិទ្ទេស A ខ្ញុំមានមុខតំណែងជាអ្នកដឹកនាំ ខ្ញុំតែងគិតថាខ្លួនឯងពូកែណាស់សមនឹងទទួលបានការងារប្រាក់ខែខ្ពស់ និងធ្វើតាមអ្វីដែលឪពុកម្តាយរបស់ខ្ញុំបានធ្វើ»។
បន្ទាប់ពីបានបញ្ចប់ការសិក្សាពីសាកលវិទ្យាល័យ Pennsylvania ក្នុងឆ្នាំ២០១២ ក្តីស្រមៃកាលពីកុមារភាពរបស់នាងបានក្លាយជាការពិត នាងបានផ្លាស់ទៅទីក្រុង New York និងធ្វើការជាអ្នកវិភាគហិរញ្ញវត្ថុ។ ទោះជាយ៉ាងណាក៏ដោយ នាងបានដឹងភ្លាមៗថា ជីវិតការងារពុំមានតុល្យភាពច្រើនទេ ខណៈកំពុងធ្វើការនៅ Wall Street។ នាងបានបន្ថែមថា «ខ្ញុំចាប់ផ្តើមគិតពីអត្ថន័យជីវិតពិតប្រាកដ»។
Irvin តែងប្រើពេលវេលាវិស្សមកាលដែលមានកំណត់របស់នាងសម្រាប់ដំណើរកម្សាន្តអន្តរជាតិ ប៉ុន្តែវាមិនអាចទៅរួចទេក្នុងការមើលឃើញពិភពលោកទាំងមូលក្នុងរយៈពេលពីរសប្តាហ៍។ អស់រយៈពេលពីរឆ្នាំ នាងសន្សំប្រាក់បានប្រហែល ១,០០០ ដុល្លារក្នុងមួយខែ ដោយមានបំណងឈប់សម្រាកពីការងារមួយឆ្នាំ ដើម្បីធ្វើដំណើរជុំវិញពិភពលោក និងបានលាឈប់ពីការងារជាផ្លូវការក្នុងឆ្នាំ២០១៥។ នាងនិយាយថា៖ «ខ្ញុំដឹងថាខ្ញុំនឹងសោកស្តាយប្រសិនបើខ្ញុំមិនបានធ្វើវា ខ្ញុំនៅក្មេងនៅលីវ គ្មានកូន ហើយមិនចាំបាច់ចំណាយច្រើននោះទេ ដែលធ្វើឲ្យវាងាយស្រួលក្នុងការសម្រេចក្តីស្រមៃមួយនេះ»។
បច្ចុប្បន្ន Irvin រស់នៅក្នុងទីក្រុង Rennes ប្រទេសបារាំង ជាអ្នកសរសេរប្លុកធ្វើដំណើរពេញម៉ោង។ ប្លុកទេសចរណ៍របស់នាង "Kesi To and Fro" មានអ្នកតាមដានជិត ១៥,០០០ នាក់នៅលើ Instagram និងបង្កើតជាប្រភពចំណូលសំខាន់សម្រាប់ Irvin។
ក្នុងនាមជាអ្នកវិនិយោគលុយ ៥០០ដុល្លារដើម្បីរៀនជំនាញសរសេរប្លុកទេសចរណ៍ Irvin រកលុយតាមមធ្យោបាយជាច្រើន ទោះបីជាម៉ាកយីហោ ដែល Irvin ផ្សព្វផ្សាយផលិតផល ក្រុមហ៊ុន ឬរបស់ផ្សេងទៀតមួយចំនួននៅលើវេទិការបស់នាង គឺជាការប្រម៉ូតហ្រ្វីក៏ដោយ។ Irvin ប៉ាន់ប្រមាណថានាងបានទទួលប្រាក់ពី ៣០០ ទៅ ២,០០០ ដុល្លារក្នុងមួយកិច្ចសហការ ហើយនាងទទួលបានប្រាក់នោះតាមរយៈការផ្ទេរប្រាក់តាមធនាគារ ឬគណនីជំនួញ PayPal របស់នាង។
លំហូរនៃប្រាក់ចំណូលផ្សេងទៀតរួមមានការធ្វើដំណើរជាក្រុមដែលនាងរៀបចំ និងធ្វើជាម្ចាស់ផ្ទះ។ ការសរសេរការធ្វើដំណើរបង់ប្រាក់ ទីផ្សារសម្ព័ន្ធ និងចំណូលពីការផ្សាយពាណិជ្ជកម្មពីគេហទំព័ររបស់នាង។ Irvin កត់សម្គាល់ថា៖ «ខ្ញុំមិនរកលុយបានច្រើនពីប្រភេទទាំងពីរចុងក្រោយនេះទេ ប៉ុន្តែបេសកកម្មចម្បងរបស់ខ្ញុំនៅពេលនេះ គឺដើម្បីបង្កើនទីផ្សារ និងប្រាក់ចំណូលពីការផ្សាយពាណិជ្ជកម្មសម្រាប់ប្លុករបស់ខ្ញុំ»។
គួរជម្រាបផងដែរថា មុនពេលរកប្រាក់ពីប្លុក Irvin ពឹងផ្អែកលើការសន្សំទាំងស្រុង ហើយបានធ្វើការជាអ្នកនាំភ្ញៀវស្នាក់នៅផ្ទះជួលតាមរដូវកាលនៅប្រទេសក្រូអាត ក្រិក ថៃ និងប្រទេសផ្សេងទៀតដើម្បីគាំទ្រការធ្វើដំណើររបស់នាង។ ឥឡូវនេះ Irvin កំពុងរកចំណូលបានប្រហែល ១,០០០ដុល្លារក្នុងមួយខែពីប្លក់របស់នាង។ នាងនិយាយថា៖ «ខ្ញុំកំពុងធ្វើការរស់នៅប្រកបដោយនិរន្តរភាពពីការងាររបស់ខ្ញុំ ហើយការរស់នៅប្រកបដោយផាសុខភាពក្នុងប្រទេសបារាំងក្នុងនាមជាអ្នកសរសេរប្លុកទេសចរណ៍។ វាផ្តល់ឱ្យខ្ញុំនូវទំនុកចិត្តបន្ថែមទៀតក្នុងការរស់នៅក្នុងប្រទេសផ្សេងទៀតក្នុងនាមជាអ្នកសរសេរប្លុកទេសចរណ៍ ហើយនេះពិតជាអាជីពចម្បងរបស់ខ្ញុំ»៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
