ក្រោយទទួលបានជោគជ័យនូវការដំណើរការផ្សារទំនើបទី១ នៅថ្ងៃទី២៥ ខែមេសា ឆ្នាំ២០២៤ ក្រុមហ៊ុនអឺបេនលែន (Urbanland) បានប្រកាសបើកការដ្ឋានសាងសង់ផ្សារទំនើប ខេ ម៉ល (K Mall) ថ្មីមួយទៀតមានទីតាំងស្ថិតនៅតាមបណ្ដោយផ្លូវជាតិលេខ ២ ជាប់ច្រកចូលបុរីចន្ទគីរី។ ដោយផ្សារទំនើបថ្មីទី២នេះមានឈ្មោះថា ផ្សារទំនើប ខេ ម៉ល ព្រែកត្នោត (K Mall Prek Thnoat)។
នៅក្នុងពិធីបើកការដ្ឋានសាងសង់ផ្សារទំនើប ខេ ម៉ល ព្រែកត្នោត នេះដែរ គេឃើញក៏មានការអញ្ជើញចូលរួមពីលោក កាំង ហុក អគ្គនាយកប្រតិបត្តិនៃក្រុមហ៊ុនអឺបេនលែន ព្រមទាំងគណៈគ្រប់គ្រងជាន់ខ្ពស់ ក្រុមការងារ និងភ្ញៀវកិត្តិយសជាច្រើនរូបទៀត។
យោងតាមសេចក្ដីប្រកាសព័ត៌មានរបស់ក្រុមហ៊ុន Urbanland ផ្សារទំនើប ខេ ម៉ល ព្រែកត្នោត នេះគឺមានចម្ងាយត្រឹមតែប៉ុន្មាននាទីប៉ុណ្ណោះពីមហាវិថីសម្តេច ហ៊ុន សែន និងត្រឹមតែ ១៥ នាទីពីអាកាសយានដ្ឋានអន្តរជាតិតេជោ ដែលគ្រោងនឹងបើកដំណើរការផ្លូវការនាពាក់កណ្តាលឆ្នាំ ២០២៥ ខាងមុខនេះ ជាមួយនឹងដំណាក់កាលដំបូង។
សូមជម្រាបថា ក្រុមហ៊ុន Urbanland បានអភិវឌ្ឍន៍ផ្សារទំនើប K Mall ទីមួយរបស់ខ្លួននៅលើបណ្ដោយមហាវិថី វេង ស្រេង (ផ្សារទំនើប ខេ ម៉ល វេង ស្រេង) និងបានបើកដំណើរការកាលពីឆ្នាំ២០២១។ ហើយផ្សារទំនើបទី១នេះដែរ គឺមានដៃគូអាជីវកម្មចំនួន ៣៨ រួមមាន៖ ហាងទំនិញ ហាងកាហ្វេ និងភោជនីយដ្ឋានល្បីៗជាច្រើន។ ជារៀងរាល់ថ្ងៃផ្សារទំនើប ខេ ម៉ល វេង ស្រេង នេះបានស្វាគមន៍អតិថិជនប្រមាណជាង ៦ ៣០០ នាក់ឯណោះ។ ភាពជោគជ័យនេះហើយ ទើបក្រុមហ៊ុន Urbalnland សម្រេចនាំយកបទពិសោធន៍ផ្សារទំនើបសហគមន៍ដ៏សម្បូរបែបនេះ ទៅកាន់តំបន់ភាគខាងត្បូងរាជធានីភ្នំពេញបន្ថែមទៀត៕