ហាង KFC នៅឥណ្ឌូនេស៊ី បានប្រកាសបិទហាងរបស់ខ្លួនចោលចំនួន៤៧កន្លែង និងបញ្ឈប់បុគ្គលិករហូតដល់ទៅ ២,២៧៤នាក់ ក្រោយប្រកាសពីការខាតទឹកប្រាក់ជាង ៣៦លានដុល្លារអាមេរិកបើគិតត្រឹមត្រីមាសទី៣ នៃឆ្នាំ២០២៤។ នេះបើតាមការចេញផ្សាយដោយសារព័ត៌មាន VN.Express។

នៅក្នុងរបាយការណ៍ហិរញ្ញវត្ថុរបស់ខ្លួន ម្ចាស់ KFC នៅឥណ្ឌូនេស៊ី ក៏បាននិយាយថា ក្នុងរយៈពេល៩ខែដំបូងនៃឆ្នាំនេះ ក្រុមហ៊ុនបានកាត់បន្ថយចំនួនហាងរបស់ខ្លួនពី ៧៦២ កន្លែង មកសល់ត្រឹម ៧១៥ កន្លែងវិញ។ ខណៈកម្លាំងបុគ្គលិកក៏បានថយចុះផងដែរ ដោយនាពេលនេះបុគ្គលិកនៅសល់ត្រឹមតែ ១៣៧០០នាក់ប៉ុណ្ណោះ។

លើសពីនេះទៅទៀត កត្តាដ៏សំខាន់បំផុតដែលនាំឱ្យប្រាក់ចំណូលរបស់ KFC កាន់តែធ្លាក់ចុះនោះ ដោយសារការលក់អាហារ និងភេសជ្ជៈកាន់តែថយចុះជាខ្លាំង ដោយនៅក្នុងឆ្នាំនេះមានការថយចុះរហូតដល់ទៅ ២២,៤% ផងដែរ។

គូសបញ្ជាក់ថា មេដឹកនាំ KFC បានចាត់ទុកថា ការធ្លាក់ចុះទាំងនេះគឺបណ្តាលមកពីផលប៉ះពាល់នៃការរាតត្បាតនៃជំងឺកូវីដ១៩ បើទោះបីជាមានការងើបឡើងមកវិញក៏ដោយតែនៅមិនអាចជួយក្រុមហ៊ុនឱ្យសម្រេចបាននូវគោលដៅដែលខ្លួនបានរំពឹងទុកនោះទេ ខណៈដែលលក្ខខណ្ឌទីផ្សារកាន់តែយ៉ាប់យ៉ឺនខ្លាំងទៅ៕