រៀនភាសាយូរឆ្នាំហើយ ចេះខ្លះដែរតែប្រើការមិនកើត ចេះអានតែមិនចេះសរសេរ អានរត់មាត់រូលតែបកប្រែមិនចេញ។ នេះក៏ព្រោះតែមិនដឹងក្បួនរៀនត្រឹមត្រូវ ហើយវាបានក្លាយទៅជាបញ្ហាដ៏រសើបមួយសម្រាប់អ្នកសិក្សាទូទៅមួយចំនួន។ ចុះតើត្រូវធ្វើដូចម្តេច ទើបអាចរៀនប្រកបដោយគុណភាពខ្ពស់?

ឆ្លើយតបទៅនឹងបញ្ហាខាងលើលោក សុខ គឹមភ័ស្ថ ស្ថាបនិកនិងជាអគ្គនាយក សាលាអន្តរជាតិ ជានចុងអ៊ីង (Jain Zhong Ying International Academy) បានប្រាប់រូបមន្តពិសេស១ ដែលរួមផ្សំចេញពីធាតុទាំង៤គឺ ការសរសេរ(Writing) ការស្តាប់(Listening) ការនិយាយ(Speaking) ការអាន(Reading) ទោះរៀនភាសាអ្វីក៏ចេះដែរ។

ទី១/. ការសរសេរ(Writing)៖ គឺជាធាតុផ្សំដ៏សំខាន់បំផុតក្នុងចំណោមធាតុផ្សំទាំងបួន។ លោក សុខ គឹមភ័ស្ថ បានលើកឡើងយ៉ាងដូច្នេះថា៖ «ខ្ញុំឃើញសិស្សភាគច្រើនគាត់ចង់ចេះណាស់ ប៉ុន្តែគាត់ខ្ជិលសរសេរ ដល់ពេលអីចឹងវាធ្វើឲ្យអក្សរដែលគាត់ត្រូវចាំក្នុងខួរក្បាលមិនដិតជាប់ទេ។ តែបើចង់ចេះភាសាចិនបានល្អវាផ្តើមចេញពីការសរសេរនេះឯង ត្រូវសរសេរឲ្យបានច្រើនដូចអ្វីដែលខ្លួនចង់ចេះ»។

ទី២/. ការស្តាប់(Listening)៖ ជាធម្មតា បើចង់អភិរឌ្ឍជំនាញនៃការស្តាប់ឲ្យកាន់តែប្រសើរ គួរគប្បីស្តាប់តាម Audio រៀនស្តាប់ពីជនជាតិដើម ស្តាប់តាម Youtube ឬក៏ Facebook page ជាដើម។ លោកនាយកសាលាខាងលើបានឲ្យដឹងថា៖ «ពេលស្តាប់យើងពុំចាំបាច់មើលរូប មើលឃ្លីប មើលវីឌីអូអីទេ យើងបើកមកជាលក្ខណកិច្ចសន្ទនាតែម្តង ធ្វើបែបនេះទើបទៅមុខលឿន»។

ទី៣/. ការនិយាយ(Speaking)៖ ចង់និយាយបានល្អ លុះត្រាអានសៀវភៅឲ្យបានច្រើន ចេះឃ្លាច្រើន ហើយត្រូវតែនិយាយ។ «យើងព្យាយាមបើកមាត់និយាយ អនុវត្តដោយប្រើមាត់យើងតែម្តង។ ក្នុងនោះប្រសិនបើយើងចេះពាក្យច្រើន ចេះឃ្លាបានច្រើន ប៉ុន្តែអត់បើកមាត់និយាយ ទោះបីជាបុគ្គលម្នាក់នោះចេះច្រើនយ៉ាងណា គឺនិយាយអត់ចេញទេ បើនិយាយចេញក៏រដាក់រដុបដែរ»។ លោក សុខ គឹមភ័ស្ថ បានបន្ថែម។

ទី៤/. ការអាន(Reading)៖ ឲ្យតែពាក់ព័ន្ធជាមួយអក្សរចិន ឬអង់គ្លេស ឬក៏អ្វីដែលយើងចង់ចេះ ត្រូវអានវាឲ្យបានច្រើន មិនថាជាប្រភេទអត្ថបទ ឬសៀវភៅនោះទេ។ លោកនាយកសាលាអន្តរជាតិ ជានចុងអ៊ីង បានថ្លែងថា៖ «ការអានសៀវភៅច្រើនវាធ្វើឲ្យយើងពង្រីកវិសាលភាពនៃចំណេះដឹង ពាក់ព័ន្ធនឹងប្រពន្ធខួរក្បាលរបស់យើង វាធ្វើឲ្យយើងចេះបានច្រើន»។

យ៉ាងណាមិញ ឆ្លងកាត់បទពិសោធន៍ធ្វើជាគ្រូបង្រៀនអស់រយៈពេលជាច្រើនឆ្នាំកន្លងមកនេះ ជំនាញទាំង៤ដែលបានរៀបរាប់ខាងលើមានសារសំខាន់ទាំងអស់ ប៉ុន្តែចំពោះរូបលោកផ្ទាល់យល់ថា ការសរសេរជារឿងអទិភាពដែលអ្នកសិក្សាត្រូវផ្តោតការយកចិត្តទុកដាក់ឲ្យខ្លាំងបំផុត។ លោក សុខ គឹមភ័ស្ថ បានលើកឡើងយ៉ាងដូច្នេះថា៖ «នៅពេលដែលយើងសរសេរបានច្រើន យើងប្រើដៃ ប្រើខួរក្បាល ប្រើភ្នែក វត្ថុទាំងបីនេះនឹងជួយឲ្យខួរក្បាលយើងកត់ត្រាបានច្រើន ច្បាស់និងជាក់លាក់ ត្បិតខួរក្បាលប្រៀបដូចបញ្ជីកត់ត្រាមួយអីចឹង។ តែបើខ្ជិលសរសេរ គ្រាន់តែអាន និយាយ និងស្តាប់ លុះអត់ចេះសរសេរ ហើយអត់ចេះអក្សរ ចង់ខ្លាំងទៅមិនរួចទេ»។

គួរជម្រាបផងដែរថា សាលាអន្តរជាតិ ជានចុងអ៊ីង (Jain Zhong Ying International Academy) មានកម្មវិធីសិក្សាថ្នាក់មតេយ្យពេញម៉ោង និងថ្នាក់ក្រៅម៉ោងភាសាចិន អង់គ្លេស សម្រាប់កុមារនិងយុវវ័យ។ កាន់តែពិសេស ក្នុងឱកាសបើកវគ្គសិក្សាថ្មីនេះ សាលាអន្តរជាតិ ជានចុងអ៊ីង មានការផ្តល់ជូនការបញ្ចុះតម្លៃរហូតដល់១០% ចូលរៀនចាប់ពីថ្ងៃទី០១ ខែមីនា ឆ្នាំ២០២៣ និងបន្តទទួលចុះឈ្មោះជារៀងរាល់ថ្ងៃ។

ចំពោះបងប្អូនដែលចាប់អារម្មណ៍អាចធ្វើការទំនាក់ទំនងតាមរយៈលេខទូរស័ព្ទ ០៩៨ ៤៤៥ ៥៣៨ / ០៧៧ ២០០ ៧៨៨ ឬចូលទៅកាន់ទំព័រ Facebook page សាលាអន្តរជាតិ ជានចុងអ៊ី ឬអាចទៅកាន់អាស័យដ្ឋានដោយផ្ទាល់ដែលមានពីរទីតាំង ទីតាំងទី១ស្ថិតនៅ ក្រោយសាលាបឋមសិក្សាច្បារអំពៅ១ និងទីតាំងទី២ស្ថិតនៅ ភូមិតាង៉ូវ សង្កាត់និរោធ ខណ្ឌច្បារអំពៅ៕

អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦