នៅព្រឹកថ្ងៃស្រុកនេះបណ្ដាញអ៊ិនធឺណេតរបស់ក្រុមហ៊ុនទូរស័ព្ទនិងក្រុមហ៊ុនផ្ដល់សេវាអ៊ិនធឺណេតមួយចំនួននៅប្រទេសកម្ពុជាមានភាពរអាក់រអួលបន្ទាប់ពីរដ្ឋាភិបាលប្រទេសកម្ពុជាប្រកាសថានឹងឈប់ប្រើប្រាស់អ៊ិនធឺណេតដែលមានប្រភពមកពីប្រទេសថៃ។
ជុំវិញបញ្ហានៃការរអាក់រអួលអ៊ិនធឺណេតនេះដែរ ក្រុមហ៊ុនសែលដែលជាក្រុមហ៊ុនបម្រើសេវាទូរស័ព្ទនិងអ៊ិនធឺណេតនិងក្រុមហ៊ុន Smart Axiata បានជូនដំណឹងភ្លាមៗពីការអាក់រអួលនៃសេវាអ៊ិនធឺណេតរបស់ខ្លួនរៀងៗខ្លួន។
បើយោងតាមសេចក្ដីប្រកាសរបស់ក្រុមហ៊ុនសែលកាតបានឲ្យដឹងថាក្រុមហ៊ុនកំពុងបង្វែរទិសដៅ International IP Transit ក្នុងគោលបំណងដើម្បីបង្កើតឯករាជ្យភាពឌីជីថលពេញលេញ។ នៅក្នុងដំណើរការនេះបងប្អូននឹងជួបការរំខានបណ្ដោះអាសន្នដូចជា ល្បឿនយឺតឬដាច់បណ្ដាញជាបណ្ដោះអាសន្ន មិនថាទូរស័ព្ទចល័ត Wifi តាមផ្ទះនិងសហគ្រាសនោះទេ។ យ៉ាងណាមិញភាពរអាក់រអួលនេះនឹងមានត្រឹមរយៈពេលខ្លីប៉ុណ្ណោះ។
ចំណែកក្រុមហ៊ុន Smart Axiata បានចេញសេចក្ដីប្រកាសថានឹងធ្វើការប្ដូរទិសដៅ IP Transit អន្តរជាតិចម្បងរបស់កម្ពុជា ហើយនៅក្នុងដំណើរការនៃការប្ដូរIP Transit នេះក្រុមហ៊ុនសូមអភ័យទោសចំពោះភាពរអាក់រអួល ហើយក្រុមការងារបច្ចេកទេសរបស់Smart កំពុងធ្វើការយ៉ាងហ្មត់ចត់ដើម្បីស្ដារសេវាកម្មនិងល្បឿនអ៊ិនធឺណេត។
