មួយរយៈពេលចុងក្រោយនេះ ស្ថានភាពសេដ្ឋកិច្ចសកលតែងតែប្រែប្រួល ឡើងចុះៗមិនស្ថិតស្ថេរ។ គិតត្រឹមចុងឆ្នាំ២០២២ គេឃើញមាន ក្រុមហ៊ុនធំៗជាច្រើននៅលើពិភពលោក បានសម្រេចចិត្តកាត់បន្ថយបុគ្គលិកផង កាត់សាខាផង ហើយមានខ្លះទៀតដល់ថ្នាក់ដាក់ពាក់សុំក្ស័យធនតែម្ដងក៏មានដែរ។
ហេតុនេះហើយទើបធ្វើឱ្យមានអ្នកជំនាញខាងវិភាគសេដ្ឋកិច្ចមួយចំនួន មានដូចជាមហាសេដ្ឋី Elon Musk ជាដើម បានលើកឡើងពីការព្រួយបារម្ភចំពោះស្ថានភាពសេដ្ឋកិច្ចសកលនៅក្នុងឆ្នាំថ្មីនេះ។ ពាក់ព័ន្ធនឹងបញ្ហាទាំងអស់នេះដែរ ថ្ងៃនេះ Business Cambodia សូមលើកយកពីបញ្ហាអតិផរណានៅក្នុងប្រទេសអាស៊ានទាំង១០ ដែលរួមមានទាំងកម្ពុជាយើង ដើម្បីមកចែករំលែកឱ្យលោកអ្នកបានដឹងស្ថានភាព អតិផរណាសព្វថ្ងៃថាវាកំពុងស្ថិតនៅក្នុងកម្រិតណា។
ទិន្នន័យខាងក្រោយនេះ គឺជារបាយការណ៍ដែលបានមកពី គេហទំព័រ Trading Economics គិតត្រឹមចុងឆ្នាំ២០២២៖
១. ប្រទេសកម្ពុជា អត្រាអតិផរណាមាន ៣.៦%
២. ប្រទេសថៃ អត្រាអតិផរណាមាន ៥.៥៥%
៣. ប្រទេសវៀតណាម អត្រាអតិផរណាមាន ៤.៥៥%
៤. ប្រទេសម៉ាឡេស៊ី អត្រាអតិផរណាមាន ៤%
៥. ប្រទេសឥណ្ឌូនេស៊ី អត្រាអតិផរណាមាន ៥.៥១%
៦. ប្រទេសហ្វីលីពីន អត្រាអតិផរណាមាន ៨%
៧. ប្រទេសសិង្ហបុរី អត្រាអតិផរណាមាន ៦.៧%
៨. ប្រទេសមីយ៉ាន់ម៉ា អត្រាអតិផរណាមាន ១៩.៥៥%
៩. ប្រទេសឡាវ អត្រាអតិផរណាមាន ៣៨.៤៦%
១០. ប្រទេសព្រុយណេ អត្រាអតិផរណាមាន ៣.៥
គួរបញ្ជាក់ផងដែរថា អតិផរណា មានន័យថាជាការធ្លាក់ចុះនៃអំណាចទិញរបស់លុយ ឬនិយាយឱ្យងាយយល់គឺ ទំនិញនិងសេវាកម្មនៅលើទីផ្សារឡើងថ្លៃ ហើយលុយចុះថោក។ ក្រោយពីបានយល់ថាអ្វីជាអតិផរណា លោកអ្នកក៏ដឹងហើយថាការហក់ស្ទុះឡើងនៃអត្រាអតិផរណាមានផលអវិជ្ជមានបែបណាទៅលើសេដ្ឋកិច្ច។
បើតាមរបាយការខាងនោះ បានបង្ហាញឱ្យឃើញថា ឡាវ គឺជាប្រទេសមួយដែលកំពុងធ្លាក់ក្នុងវិបត្តិអតិផរណាជ្រៅជាងគេនៅអាស៊ាន ដែលមានចំនួនដល់ទៅ ៣៨.៤៦% ឯណោះ។ តួលេខនេះបានបញ្ជាក់ឱ្យឃើញថាទំនិញនៅក្នុងប្រទេសឡាវសព្វថ្ងៃកំពុងតែឡើងថ្លៃខ្លាំង ហើយលុយរបស់ប្រទេសឡាវត្រូវបាត់បង់តម្លៃអស់យ៉ាងច្រើន។
ចំណែកអតិផរណារបស់ប្រទេសកម្ពុជាយើងស្ថិតនៅក្នុងកម្រិតមិនគួរឱ្យបារម្ភនោះទេ ប៉ុន្តែទោះជាយ៉ាងណាក៏ដោយ ក៏ Business Cambodia សូមរំលឹកទៅកាន់មិត្តអ្នកអានជានិច្ចថា លោកអ្នកគួរតែមានការប្រុងប្រយ័ត្ន ចំពោះរឿងលុយកាក់។ ព្យាយាមសន្សំចំណេះដឹងពាក់ព័ន្ធនឹងការចាត់ចែងលុយឱ្យបានត្រឹមត្រូវ ហើយអានព័ត៌មានសេដ្ឋកិច្ចឱ្យបានច្រើន ទើបអាចតាមទាន់ស្ថានការសកល ដើម្បីបានត្រៀមខ្លួនទុកមុនពេលមានវិបត្តិអ្វីមួយកើតឡើងដោយចៃដន្យ អ្នកនឹងមិនធ្លាក់ខ្លួនដាច់លុយ៕
អត្ថបទដោយ៖ សូ សុខលី
