បន្ទាប់ពីលោកស្រី Droupadi Murmu បានហៅខ្លួនឯងថា «ប្រធានាធិបតី Bharat» នៅលើលិខិតអញ្ជើញភ្ញៀវកិត្តិយសចូលរួមក្នុងកិច្ចប្រជុំកំពូល G20 ក្នុងទីក្រុងញូវដេលី បានបង្កភាពចម្រូងចម្រាសផ្ទុះឡើងពេញប្រទេសឥណ្ឌា និងត្រូវបានគេរំពឹងទុកថារដ្ឋាភិបាលប្រហែលជានឹងផ្លាស់ប្តូរឈ្មោះប្រទេស។ នេះបើយោងតាមការឲ្យដឹងពីទីភ្នាក់ងារសារព័ត៌មាន Reuters នាថ្ងៃទី០៧ ខែកញ្ញា ឆ្នាំ២០២៣។
យ៉ាងណាមិញ ក្នុងរដ្ឋធម្មនុញ្ញរបស់ឥណ្ឌា ប្រទេសនេះគឺមានឈ្មោះផ្លូវការ ២ ដោយអាចហៅថា «ឥណ្ឌា» ក៏បាន ឬ «បារ៉ាត់ (Bharat)» (ភាសាហិណ្ឌូ) ក៏បាន ប៉ុន្តែនៅជុំវិញពិភពលោក ភាគច្រើនលើសលប់គេស្គាល់តែ «ឥណ្ឌា» ប៉ុណ្ណោះដែលជាឈ្មោះផ្លូវការ។
ដោយសារមនោគមវិជ្ជាជាតិនិយមហិណ្ឌូនៃរដ្ឋាភិបាលដឹកនាំដោយនាយករដ្ឋមន្ត្រី Narendra Modi និងការជំរុញឱ្យមានការបង្កើនការប្រើប្រាស់ភាសាហិណ្ឌូ រដ្ឋាភិបាលនេះបាននឹងកំពុងប្តូរឈ្មោះទីក្រុងនានា និងអគារសំខាន់ៗរបស់ជាតិ ដែលត្រូវបានដាក់ដោយអាណានិគម រហូតប្រើឈ្មោះ «បារ៉ាត់ (Bharat)» ជំនួសឲ្យពាក្យ «ឥណ្ឌា» ក្នុងលិខិតអញ្ជើញ គឺដើម្បីចង់លុបបំបាត់ចិត្តគំនិតនៃទាសភាព ដែលឈ្មោះជាប្រទេសឥណ្ឌាធ្លាប់ឆ្លងកាត់រឿងរ៉ាវឈឺចាប់កាលពីអតីតកាល។
ប៉ុន្តែដើម្បីអាចផ្លាស់ប្តូរឈ្មោះប្រទេស «ឥណ្ឌា» ទៅជា «បារ៉ាត់ (Bharat)» តែមួយគត់ គឺត្រូវធ្វើវិសោធកម្ម រដ្ឋធម្មនុញ្ញទាមទារឱ្យមានសំឡេងគាំទ្រ ២ភាគ៣ នៃសភាជាន់ទាប និងសភាជាន់ខ្ពស់ឥណ្ឌា នេះបើយោងតាមមាត្រា១ នៃរដ្ឋធម្មនុញ្ញឥណ្ឌា។
ក្នុងនោះរដ្ឋាភិបាលឥណ្ឌា ក៏បានកោះប្រជុំសភាពិសេសរបស់ខ្លួនផងដែរនៅថ្ងៃទី ១៨-២២ ខែកញ្ញា ឆ្នាំ២០២៣ខាងមុខ។ ប្រព័ន្ធផ្សព្វផ្សាយក្នុងស្រុកបាននិយាយថា ក្នុងអំឡុងពេលកិច្ចប្រជុំនេះ រដ្ឋាភិបាលរបស់នាយករដ្ឋមន្ត្រី Modi នឹងបង្ហាញដំណោះស្រាយដើម្បីផ្លាស់ប្តូរឈ្មោះប្រទេស «ឥណ្ឌា» ទៅជា «បារ៉ាត់ (Bharat)» វិញ។
គួរជម្រាបផងដែរថា ប្រភពដើមនៃឈ្មោះ «បារ៉ាត់ (Bharat)» គឺមានជាប់ពាក់ព័ន្ធនឹងដំណើររឿងដ៏យូរអង្វែងក្នុងប្រវត្តិសាស្ត្រឥណ្ឌា។ ពាក្យនេះគឺក្លាយមកពាក្យ ក្នុងភាសាសំស្រ្កឹតថា «Bharata» មានន័យថា «ភ្លើង» ឬជាឈ្មោះរបស់ស្ដេចឥណ្ឌាមួយអង្គឈ្មោះ Bharata នៅក្នុងរឿងព្រេងបុរាណរបស់អ្នកកាន់សាសនាហិណ្ឌូ ដែលត្រូវបានគេចាត់ទុកថាជាបុព្វបុរសហិណ្ឌូ។ រីឯពាក្យឥណ្ឌាវិញ គឺក្លាយមកពីពាក្យ Sindhu នៅក្នុងភាសាសំស្រ្តឹតមានន័យ «ទន្លេ» ដែលអារ៉ាប់ និងក្រិក ហៅថាហិណ្ឌ (Hind) និងក្រោយមកត្រូវបានហៅថា «ឥណ្ឌា»។ ឈ្មោះ «ឥណ្ឌា» ត្រូវបានហៅយ៉ាងទូលំទូលាយ នៅអំឡុងពេលប្រទេសនេះស្ថិតក្រោមអាណានិគមអង់គ្លេស៕
អត្ថបទដោយ៖ កាន់ ដារ៉ា (ស្មេរពនេចរ)
