១. ធ្វើការឱ្យខ្លាំងជាងមុន

អ្នកស្រីបានលើកឡើងថា​ “ការពង្រឹងសមត្ថភាពចំពោះការងារដែលយើងកំពុងតែមាន គឺជាចំណុចចាប់ផ្ដើមសំខាន់បំផុត”។ អ្នកគួរតែបំពេញការងារឱ្យបានល្អ ដើម្បីបានឡើងតួនាទី និងទទួលបានប្រាក់ខែកាន់តែខ្ពស់។ ទន្ទឹមនឹងនោះអ្នកក៏ត្រូវ ឆ្លៀតឱកាសពេលកំពុងធ្វើការនេះ សន្សំបទពិសោធន៍ ចំណេះដឹង និងទំនាក់ទំនងក្នុងសង្គមឱ្យបានទូលំទូលាយ ដើម្បីទុកជាទុន បង្កើតចំណូលបន្ថែមទៀតនៅពេលណាមួយ។

២. លក់ជំនាញ

ក្រៅពីធ្វើការអ្នកក៏អាចឆ្លៀតពេលលក់ជំនាញនិងបទពិសោធន៍ដែលអ្នកកំពុងតែមាន តាមរយៈការចងក្រងជាសៀវភៅ ឬបើកវគ្គបណ្ដុះបណ្ដាលជាដើម។ ចំណេះដឹងនិងបទពិសោធន៍គឺជាទុនសំខាន់ណាស់ ពេលដែលអ្នកមានវាហើយត្រូវប្រើវាឱ្យអស់លទ្ធភាព កុំទុកចោលឱ្យសោះ ព្រោះថា សមត្ថភាពដូចជាលុយ បើទុកចោលមិនចេះចាយឱ្យត្រូវ វាក៏គ្មានថ្ងៃកើន។

៣. វិនិយោគ

អ្នកជំនាញហិរញ្ញវត្ថុរូបនេះបញ្ជាក់ថា “ការវិនិយោគសំខាន់ណាស់ ព្រោះវាជាប្រភពនៃចំណូលអកម្មដែលបុគ្គលគ្រប់រូបត្រូវតែមាន ប៉ុន្តែសូមវិនិយោគលើអ្វីដែលយើងចេះពិតប្រាកដដើម្បីបង្ការហានិភ័យធ្ងន់ធ្ងរ”។ មានន័យថា ជំហានដំបូងអ្នកត្រូវវិនិយោគលើចំណេះដឹង បន្ទាប់មកចាំដាក់ទុនទៅលើគម្រោងណាមួយដែលអ្នកបានរៀនសូត្រចេះច្បាស់។

ជាក់ស្ដែងការវិនិយោគមានច្រើនបែបដូចជា ជួលផ្ទះ ជួលដី ចូលហ៊ុន​ ទិញភាគហ៊ុន ឬការបង្កើតអាជីវកម្មផ្ទាល់ខ្លួនជាដើម។ ឧទារហណ៍ថាអ្នកចង់វិនិយោគលើអចលនទ្រព្យ ដូចជាការទិញផ្ទះដាក់ជួល អ្នកត្រូវរៀនសូត្រឱ្យចេះសិនថា តើគេទិញផ្ទះរបៀបម៉េច រើសទីតាំងបែបណា គួរទិញដាច់ឬរំលស់ បង់ជាមួយធនាគារឬម្ចាស់ផ្ទះ។ សូមជម្រាបថារាល់មេរៀន និងចំណេះដឹងដែលអ្នកចង់បាន គួរតែស្វែងរកពីបុគ្គលជំនាញលើផ្នែកទាំងអស់នោះពិតប្រាកដ រៀនពីបទពិសោធន៍អ្នកដើរមុន ពិចារណាពីទីផ្សារបច្ចុប្បន្ន។

គួរបញ្ជាក់ផងដែរថា សូមកុំធ្វើការទន្ទឹងប្រាក់ខែ តែគួរធ្វើការសន្សំជំនាញ ទាញយកបទពិសោធន៍ ស្រូបទំនាក់ទំនងសង្គម និងប្រើប្រាស់អ្វីដែលរកបានទាំងអស់នោះឱ្យត្រូវផ្លូវ ធ្វើបានតែប៉ុននេះចំណូលរបស់អ្នកនឹងកើន ហើយទោះជាចង់ក្រក៏ពិបាកដែរ៕