កាលពីថ្ងៃម្សិលមិញនេះ ធនាគារជាតិនៃកម្ពុជាបានចេញសេចក្ដីប្រកាសដល់គ្រឹះស្ថានធនាគារនិងហិរញ្ញវត្ថុនិងសាធារណជនពីក្រដាសប្រាក់ដុល្លារក្លែងក្លាយដែលកំពុងត្រូវបានចរាចរនៅប្រទេសកម្ពុជា ហើយក៏ណែនាំឲ្យបងប្អូនធ្វើការត្រួតពិនិត្យមុននឹងទទួលយកក្រដាសប្រាក់ដុល្លារអាមេរិក។

 ដើម្បីចៀសវាងទទួលបានក្រដាសប្រាក់ដុល្លារក្លែងក្លាយក៏ដូចជាការជួយទប់ស្កាត់ក្រដាសប្រាក់ដុល្លារក្លែងក្លាយតាមសេចក្ដីប្រកាសរបស់ធនាគារជាតិ ថ្ងៃនេះ Business Cambodia សូមចែករំរបៀបមើលក្រដាសប្រាក់ដុល្លារពិតប្រាកដដែលបងប្អូនគួរដឹងដូចខាងក្រោមនេះ។

១. មើលលើ Serial number

លេខserial number គឺបង្ហាញថាក្រដាស១០០ដុល្លារនោះជាស៊េរីក្រដាសប្រាក់បោះពុម្ពនៅឆ្នាំណា។ ជាក់ស្ដែងបើក្រដាស១០០ដុល្លារបោះពុម្ពចាប់ពីឆ្នាំ២០០៩មកដល់ច្ចុប្បន្នគឺSerial number គួរតែចាប់ផ្ដើមដោយអក្សរ J និងអក្សរL។ សូមមើលរូបខាងក្រោមនេះ។

២. យកម្រាបដៃស្ទាប់លើស្មាតា១០០ដុល្លារ

 មកអ្នកទទួលបានក្រដាស១០០ដុល្លារពីអ្នកណាម្នាក់ អ្នកអាចយកម្រាបដៃស្ទាបលើកអាវឬស្នារបស់លោកតា១០០ដុល្លារ។ ពេលអ្នកស្ទាប់ អ្នកនឹងមានអារម្មណ៍ថាវាមានសភាពគ្រើមៗ ដែលនេះបញ្ជាក់ថាដុល្លារពិតប្រាកដ។

៣. រូបជួងនឹងប្ដូរពីពណ៌ទង់ដែងទៅបៃតង

នៅខាងមុខក្រដាសប្រាក់ដែលមានរូបតាដុល្លារ អ្នកនឹងឃើញរូបជួងមួយដែលមានពណ៌ទង់ដែង។ ត្រង់នេះបើអ្នកយកក្រដាសប្រាក់មកកាន់ហើយផ្អៀងមើលឬមើលពំហៀង អ្នកនឹងឃើញរូបជួងនឹងប្ដូរពីពណ៌ទង់ដែងមកពណ៌បៃតង។ សូមមើលរូបខាងក្រោម។

៤. មើលចំណុចខៀវចំកណ្ដាលក្រដាសប្រាក់

ចំណុចកណ្ដាលពណ៌ខៀវៗ បើអ្នកសង្កេតមើលនឹងឃើញថាវាចោះទម្លុះក្រដាសប្រាក់ពីលើមកក្រោម។ មិនតែប៉ុណ្ណោះត្រង់ចំណុចខៀវៗនេះក៏មានបង្កប់នូវលេខ១០០ជាច្រើន ហើយលេខ១០០នេះវានឹងធ្វើចលនា បើអ្នកយកក្រដាសប្រាក់មកធ្វើចលនាផ្អៀងចុះឡើងនោះលេខ១០០វានឹងធ្វើចលនាចុះឡើងដូចគ្នា។ សូមមើលរូបខាងក្រោម។

៥. ស្រមោលតា១០០ដុល្លារ

ពេលទទួលបានក្រដាសប្រាក់១០០ដុល្លារ អ្នកអាចយកមកកាន់ហើយដាក់ឲ្យត្រូវនឹងពន្លឺនោះអ្នកនឹងឃើញស្រមោលរូបតាដុល្លារដែលស្ថិតនៅផ្នែកខាងស្ដាំនៃក្រដាសប្រាក់ ដែលនេះគឺជាចំណុចស្គាល់មួយថាវាជាក្រដាសប្រាក់ពិតប្រាកដ។

គួរបញ្ជាក់ផងដែរថា បើអ្នកជាអ្នករកស៊ី លក់ដូរដែលទទួលក្រដាសប្រាក់ច្រើនៗ អ្នកអាចប្រើម៉ាស៊ីនក្នុងការត្រួតពិនិត្យក្រដាសប្រាក់ដើម្បីចៀសវាងប៉ះចំក្រដាសប្រាក់ក្លែងក្លាយ៕