កាលពីរសៀលថ្ងៃច័ន្ទ ទី04 ខែកក្កដា ឆ្នាំ2022 កន្លងទៅនេះនៅបរិវេណនៃផ្សារទំនើប The Olympia Mall គឺមានការរៀបចំប្រារព្ធកម្មវិធីមហាព្រឹត្តិការណ៍ព្រំក្រហម Honor ដើម្បីសម្ពោធដាក់លក់ជាផ្លូវការនូវម៉ូដែលទូរស័ព្ទដ៏ទំនើបបីគ្រឿងគឺ Honor X 7, Honor X 8 និង Honor X 9។ ចំពោះមហាព្រឹត្តិការណ៍ព្រំក្រហមមួយនេះគឺមានការចូលរួមដ៏ឱឡារិកអធិកអធមពីសំណាក់ថ្នាក់ដឹកនាំរបស់ក្រុមហ៊ុន Honor ព្រមទាំងមានការចូលរួមពីភ្ញៀវកិត្តិយសដ៏ច្រើនផងដែរ។
រួមជាមួយគ្នាផងដែរវត្តមានរបស់លោក Johny ដែលជានាយកគ្រប់គ្រងនៃក្រុមហ៊ុន Honor ប្រចាំប្រទេសកម្ពុជាបានលើកឡើងយ៉ាងដូច្នេះថា ថ្វីត្បិតតែ Honor ទើបតែលេចវត្តមាននៅក្នុងប្រទេសកម្ពុជាក៏ពិតមែនប៉ុន្តែយីហោស្មាតហ្វូនមួយនេះគឺជាប់ចំណាត់ថ្នាក់លេខមួយក្នុងប្រទេសចិន។ លើសពីនេះទៅទៀត Honor រចនាឡើងដោយផ្តោតទៅលើភាពទាន់សម័យ ក៏ដូចជាតម្លៃសមរម្យផងដែរ។
យ៉ាងណាមិញ វត្តមានរបស់ Honor X Series ដែលបានធ្វើការសម្ពោធដាក់លក់ជាផ្លូវការក្នុងប្រទេសកម្ពុជានេះ គឺជាប្រភេទស្មាតហ្វូនដែលមានរចនាបថដ៏ទាក់ទាញ មានកម្រាស់ស្តើង មានទំហំថ្មធំកាន់បានយូរ ហើយម៉ូដែលទាំង3បានបំពាក់ទៅដោយលែនកាមេរ៉ាចំនួន 4គ្រាប់ដូចគ្នា លើសពីនេះទៅទៀត Honor X Series ទាំង 3ម៉ូដែលទៀតសុទ្ធសឹងតែមានលក្ខណៈពិសេសផ្សេងៗគ្នាទាំងអស់។
ចំពោះ Honor X 7 មានកម្រាស់ស្តើងត្រឹមតែ 8.6mm តែប៉ុណ្ណោះ រួមជាមួយនឹងអេក្រង់ទំហំ 6.74អិញដែលមានកាមេរ៉ាបែបដំណក់ទឹកផងដែរ។ ហើយវាដំណើរការទៅដោយប្រព័ន្ធប្រត្តិបត្តិការ Android 11 Magic UI និងបំពាក់ទៅដោយឈីប SD 680 4G មាន RAM 6GB និង អង្គផ្ទុក 128GB Refresh Rate 90Hz មានថ្មទំហំ 5000mAh អាចសាកល្បឿនលឿន 22.5W ថែមទៀតផង។
រីឯម៉ូដែល Honor X 8 វិញមានរាងកាន់តែស្តើងកាលីបដោយមានកម្រាស់ 7.5mm មានអេក្រង់ទំហំ 6.7អិញមានកាមេរ៉ាទម្លុះចំពីលើ ដោយមានប្រព័ន្ធប្រតិបត្តិការ OS System និងឈីបដូចគ្នាទាំង3ម៉ូដែល ហើយ Honor X 8 មាន RAM 6GB អង្គផ្ទុក 128GB Refresh Rate 90Hz កាមេរ៉ាក្រោយទំហំ 64MP Ultra-Clear និងមានថ្មទំហំ 4000mAh អាចគាំទ្រការសាកល្បឿនលឿន 22.5W ផងដែរ។
សម្រាប់ចុងក្រោយ Honor X 9 គឺរចនារូបរាងបែប Flagship មានកម្រាស់ 8.1mm មានអេក្រង់ទំហំ 6.81អិញមានកាមេរ៉ាទម្លុះចំពីលើជាមួយនឹង Refresh Rate 90Hz ដូចគ្នា។ លើសពីនេះទៅទៀត Honor បានបំពាក់មកជាមួយនឹង Honor Turbo RAM 8GB និងអង្គផ្ទុក 128GBផងដែរ ហើយថែមទាំងមានថ្មទំហំ 4800mAh និងអាចគាំទ្រការសាកល្បឿនលឿនរហូតដល់ 66W ឯណោះ។
គូសបញ្ជាក់ផងដែរថាចំពោះតម្លៃនៃ Honor X Series ទាំងបីនេះគឺពិតជាសមរម្យ ដោយម៉ូឌែល Honor X 7 តម្លៃត្រឹមតែ ១៩៩ដុល្លារ ចំពោះ Honor X 8 មានតម្លៃត្រឹមតែ ២៤៩ដុល្លារ និងម៉ូដែលចុងក្រោយ Honor X 9 មានតម្លៃត្រឹមតែ ២៩៩ដុល្លារតែប៉ុណ្ណោះ។
អត្ថបទដោយ៖ រិន មករា
