កាលពីសប្ដាហ៍មុនហើយធ្លាយដល់សប្ដាហ៍នេះ យើងមានការព្រួយបារម្ភពីបញ្ហានៃការដួលរលំធនាគាររបស់សហរដ្ឋអាមេរិក រហូតភ្លេចចាប់អារម្មណ៍ទីផ្សារមាស ព្រោះពេលមានបញ្ហាទាក់ទងនឹងសេដ្ឋកិច្ចហាងឆេងមាសតែងតែប្រែប្រួល។

 ចុះបន្ទាប់ពីធនាគាររបស់សហរដ្ឋអាមេរិកដួលរលំ តើហាងឆេងមាសប្រែប្រួលដល់ណាហើយ?

បើយោងតាមវេបសាយ goldprice បានឲ្យបង្ហាញថាតម្លៃហាងឆេងមាសលើទីផ្សារអន្តរជាតិបានហក់ឡើងដល់១,៩៥០ដុល្លារក្នុងមួយអោន(ស្មើនឹង២,៣៤៩ដុល្លារក្នុងមួយតម្លឹង)ពោលគឺឡើងថ្លៃ១.៥២%ធៀបនឹងតម្លៃម្សិលមិញ។

 មានកត្តាជាច្រើនដែលរុញតម្លៃមាសឲ្យហក់ឡើងយ៉ាងខ្លាំងនៅអំឡុងសប្ដាហ៍នេះ។ កត្តាដែលធ្វើឲ្យហាងឆេងមាសឡើងថ្លៃនោះគឺដោយសារតែសន្ទស្សន៍ប្រាក់ដុល្លារអាមេរិកបានធ្លាក់ចុះក៏ដូចជាប័ណ្ណបំណុលរបស់អាមេរិកធ្លាក់​ចុះ បានរុញតម្លៃមាសឲ្យងើបឡើងខ្លាំង។ វាជារឿងធម្មតាទៅហើយ កាលណាប្រាក់ដុល្លារថយចុះមាសតែងតែឡើង តែមាសចុះប្រាក់ដុល្លារតែងតែឡើងថ្លៃ។

 ក្រៅពីកត្តាខាងលើ មានកត្តាមួយទៀតដែលជាកត្តាធំធ្វើឲ្យមាសឡើងថ្លៃនោះគឺការដួលរលំនៃធនាគាររបស់សហរដ្ឋអាមេរិក។ ជាការពិតណាស់ការដួលរលំធនាគារនៅអាមេរិកបានបង្កភាពច្របូកច្របល់ដល់ពលរដ្ឋជាពិសេសអ្នកវិនិយោគតែម្ដង។ ជាក់ស្ដែងបន្ទាប់ពីធនាគារនៅអាមេរិកដួលរលំធ្វើឲ្យមានការព្រួយបារម្ភពីបញ្ហាវិបត្តិសេដ្ឋកិច្ចអាចនឹងកើតមាន ដូច្នេះហើយអ្នកវិនិយោគបានយកលុយទៅទិញមាសដែលត្រូវបានគេចាត់ទុកជាទ្រព្យសុវត្ថិភាពដែលធ្វើឲ្យហាងឆេងមាសកាន់តែឡើងថ្លៃ។

បើយើងងាកមកហាងឆេងមាសទីផ្សារស្រុកយើងវិញឃើញថា ហាងឆេងមាសក៏ឡើងថ្លៃផងដែរ។ គិតត្រឹមថ្ងៃនេះ ហាងឆេងមាសបានហក់ឡើងដល់ប្រមាណជាជាង២៣០ដុល្លារហើយក្នុងមួយជីហើយវាអាចនឹងបន្តហក់ឡើងថែមទៀតប្រសិនបើស្ថានភាពសេដ្ឋកិច្ចនៅតែច្របូកច្របល់។

ចង់តាមដានព័ត៌មានទាក់ទងនឹងហិរញ្ញវត្ថុក៏ដូចជាការប្រើលុយឲ្យចំណេញ និងវិនិយោគលុយដើម្បីបង្កើនទ្រព្យ អាចតាមដាន Facebook page Toeuy Hong-ទឿយ ហុង និងចូលគ្រុបតេឡេក្រាម   https://t.me/toeuy_hong៕