ហាងឆេងមាសលើទីផ្សារអន្តរជាតិបានបន្តធ្លាក់ថ្លៃមកចំណុចទាបបំផុតក្នុងរយៈពេលជាង២ខែចុងក្រោយនេះ ហើយបើគិតត្រឹមព្រឹកថ្ងៃសុក្រសប្ដាហ៍នេះ ហាងឆេងមាសបានបន្តធ្លាក់ថ្លៃមក១៩៤២ដុល្លារក្នុងមួយអោន( ស្មើនឹង២,៣៣៩ដុល្លារក្នុងមួយតម្លឹង)។
បើទោះជាស្ថានភាពសេដ្ឋកិច្ចសកលស្ថិតនៅភាពមិនច្បាស់លាស់នៅឡើយក៏ពិតមែន តែព័ត៌មានវិជ្ជមានសម្រាប់សហរដ្ឋអាមេរិកបានបន្តដាក់សម្ពាធមកលើហាងឆេងមាសនៅប៉ុន្មានសប្ដាហ៍ចុងក្រោយនេះដែលធ្វើឲ្យមាសធ្លាក់ថ្លៃរយៈពេល២ខែជាប់ៗគ្នា។
ជាក់ស្ដែងកិច្ចចរចារដំឡើងពិដានបំណុលរវាងលោក Joe Biden និងបក្សប្រឆាំងហាក់ឃើញផលវិជ្ជមានអាចឈានដល់ការកាត់បន្ថយចំណាយនិងដំឡើងពិដានបំណុល( Debt ceiling) ដើម្បីអាមេរិកមានសាច់លុយផ្គត់ផ្គង់ការចំណាយសាធារណៈគឺកត្តាមួយនៅតែបន្តដាក់សម្ពាធលើតម្លៃមាសឲ្យដាំក្បាលចុះ។
លើសពីនេះ ប្រាក់ដុល្លារអាមេរិកឡើងថ្លៃក្រោយពីធនាគារណ្ដាលប្រកាសពីគម្រោងដំឡើងការប្រាក់គួបផ្សំនឹងប័ណ្ណបំណុលអាមេរិកឡើងថ្លៃទៀតនោះក៏ជាកត្តារួមផ្សំរុញមាសឲ្យធ្លាក់ចុះជាបន្តបន្ទាប់ផងដែរ។
មួយវិញទៀតកាលពីសប្ដាហ៍មុនបើយោងតាមរបាយការណ៍ចុងក្រោយនៃនាយកដ្ឋានការងាររបស់អាមេរិកបានបង្ហាញថាអត្រាអ្នកអត់ការងារធ្វើនៅអាមេរិកបានបន្តធ្លាក់ចុះពី២៤,២០០០មកត្រឹម២២,០០០នាក់នៅត្រឹមថ្ងៃទី១៣ខែឧសភានេះ ហើយកត្តាអត្រាអ្នកអត់ការងារធ្វើធ្លាក់ចុះបញ្ជាក់ថាសេដ្ឋកិច្ចអាមេរិកកាន់តែល្អប្រសើរ ដូច្នេះក៏កាន់តែធ្វើឲ្យមាសរងសម្ពាធថែមទៀត។
សម្រាប់ហាងឆេងមាសក្នុងស្រុកវិញគិតត្រឹមថ្ងៃនេះ ហាងឆេងមាសបានធ្លាក់មក២២៨ដុល្លារក្នុងមួយជី។ សូមបន្តតាមដានហាងឆេងមាសបន្តទៀតថាតើវានឹងបន្តដាំក្បាលចេះឬហក់ឡើងវិញ។
ចង់តាមដានព័ត៌មានទាក់ទងនឹងហិរញ្ញវត្ថុក៏ដូចជាការប្រើលុយឲ្យចំណេញ និងវិនិយោគលុយដើម្បីបង្កើនទ្រព្យ អាចតាមដាន Facebook page Toeuy Hong-ទឿយ ហុង និងចូលគ្រុបតេឡេក្រាម https://t.me/toeuy_hong៕
