Steve Adcock គឺជាសេដ្ឋីដែលចូលនិវត្តន៍នៅអាយុត្រឹមតែ៣៥ឆ្នាំតែប៉ុណ្ណោះ គាត់បានមើលឃើញពីមូលហេតុសំខាន់មួយដែលអាចឱ្យគាត់រស់សុខស្រួលទាំងវ័យក្មេងបែបនេះគឺ ការកាត់ចោលគំនិតចាស់គំរឹលមួយចំនួន ដែលវាមិនត្រូវជាមួយនឹងស្ថានភាពជីវិតរបស់គាត់។
សេដ្ឋីវ័យក្មេងបានរកឃើញថា មានដំបូន្មានហិរញ្ញវត្ថុ ៤ ដែលទាញមនុស្សឱ្យចេញឆ្ងាយពីការ រកលុយបានច្រើន ហើយខាងក្រោមនេះជាមូលហេតុ និងអ្វីដែលគាត់ធ្វើជំនួសឱ្យការធ្វើតាមដំបូន្មានទាំងនោះ។
លោក Steve និយាយថា ការធ្វើនូវអ្វីដែលយើងស្រលាញ់ចូលចិត្តគឺជារឿងល្អ ប៉ុន្តែយើងមិនអាចធ្វើវាបានទេបើមិនបានលុយ ព្រោះមនុស្សយើងត្រូវការលុយមកផ្គត់ផ្គង់ជីវភាព។ នៅពេលដែលគិតអំពីអាជីពការងារ សូមពិចារណា និងដឹកនាំខ្លួនឯងជាមួយនឹង ជំនាញនិងភាពខ្លាំង ជាជាងចំណង់ចំណូលចិត្តរបស់អ្នក។ ជួនកាលការងារដែលអ្នកចូលចិត្តវាមិនមានទីផ្សារ ហេតុនេះអ្នកត្រូវប្រើជំនាញដែលមានទីផ្សារយកមកធ្វើការរកចំណូល តែទោះជាយ៉ាងណាអ្នកក៏អាចធ្វើអ្វីដែលអ្នកចូលចិត្តនៅពេលទំនេរបានដែរ។
២. កុំបារម្ភពីការសន្សំ គ្រាន់តែរកចំណូលឱ្យបានច្រើន
សេដ្ឋីវ័យក្មេងបានលើកឡើងថា សឹងតែពាក់កណ្ដាលនៃជីវិតហើយដែលគាត់បានឮគេប្រាប់ថា វាមិនសំខាន់លើសន្សំបានប៉ុន្មានទេឱ្យតែរកលុយបានច្រើនទៅ ប្រាកដជាមានភាពងាយស្រួលហើយ។ លោកបន្តថា មានចំណូលខ្ពស់គឺអស្ចារ្យណាស់ ប៉ុន្តែបើមិនចាត់ចែងឱ្យបានល្អ ទោះចំណូលខ្ពស់ប៉ុណ្ណាក៏មិនសល់ដែរ ហេតុនេះហើយគាត់បានបង្កើតទម្លាប់ចំណាយដ៏ល្អមួយសម្រាប់ខ្លួនឯង។
៣. រាល់ការវិនិយោគជាល្បែង
ត្រង់ចំណុចនេះ Steve ពន្យល់ថា ការវិនិយោគវាតែងភ្ជាប់ជាមួយហានិភ័យ ប៉ុន្តែប្រវត្តិសាស្រ្តបានបង្ហញថា ការវិនិយោគទៅលើភាគហ៊ុនគឺជាវិធីដ៏ល្អបំផុតសម្រាប់ការកសាងទ្រព្យសម្បត្តិតាមពេលវេលា។ បើនិយាយពីការវិនិយោគ លោកបានបន្តថា គ្មានអ្នកណាអាចដឹងពីរឿងដែលនឹងកើតក្នុងអនាគតនោះទេ ហេតុនេះការសិក្សា និងការសាកល្បងទិញភាគហ៊ុន និងរូបិយប័ណ្ណគ្រីបតូ គឺជាវិធីសាស្រ្តរយៈពេលវែងដ៏រឹងមាំ ដែលបានដំណើរការល្អសម្រាប់លោកក្នុងពេលកន្លងមក។
៤. ប្រញាប់ប្រញាល់គ្រប់ពេល
ត្រង់ន័យនេះលោកបានលើកឡើងថា វប្បធម៌កប់ខ្លួនឯងជាមួយនឹងការងារមិនមែនជារឿងល្អឡើយ ព្រោះថាមនុស្សយើងត្រូវការពេលវេលាសម្រាប់សម្រាក។ ប្រសិនបើអ្នកធ្វើការគ្រប់ពេលខួរក្បាល និងសុខភាពផ្លូវចិត្តរបស់អ្នកប្រាកដជាចុះខ្សោយ លុយសំខាន់ណាស់ប៉ុន្តែអ្នកប្រាកដជាមិនរីករាយទេបើខ្លួនអ្នកហត់នឿយ ហេតុនេះហើយសុខភាពគឺសំខាន់បំផុត។ Steve និយាយទៀតថាគាត់តែងតែចំណាយពេលចុងសប្តាហ៍ធ្វើអ្វីដែលគាត់ចូលចិត្ត ដូចជាដើរថតរូប ឬមើលកុនជាដើម។
មែនទែនទៅអ្វីដែលលើកឡើងនៅខាងលើវា គ្រាន់តែជាគំនិតរបស់ Steve Adcock ដែលផ្អែកលើស្ថានភាពរស់នៅរបស់គាត់តែប៉ុណ្ណោះ ហេតុនេះចំណុចខ្លះអាចនឹងមិនស្របជាមួយនឹងគំនិតរបស់អ្នកផ្សេងទៀតឡើយ។ ទោះជាយ៉ាងណាក៏គំនិតទាំងអស់នៅតែអាចឈរជាគន្លឹះ សម្រាប់ប្រិយមិត្តអ្នកអាន យកទៅពិចារណាតាមស្ថានភាពរស់នៅជាក់ស្ដែងរៀងៗខ្លួនដើម្បីទទួលបានជីវិតសុខស្រួលតាមក្ដីប្រាថ្នា៕