កាលពីពេលថ្មីៗនេះ ក្រុមហ៊ុន Mobile World ដែលយើងស្គាល់ឈ្មោះមួយទៀតថា Bluetronics ចាប់ផ្ដើមរើហាងលក់របស់ខ្លួនចេញពីប្រទេសកម្ពុជាស្ទើរតែទាំងអស់ ខណ:បច្ចុប្បន្នមានហាងចំនួន២ប៉ុណ្ណោះដែលនៅបើកដំណើរការបន្ទាប់ពីឈរជើងរកស៊ីក្នុងស្រុកខ្មែ៦ឆ្នាំ។ នេះបើយោងតាមការចេញផ្សាយរបស់កាសែត vnexpress។ ចុះតើនរណាឈរពីក្រោយក្រុមហ៊ុននេះ និងមានប្រវត្តិបែបណាខ្លះ?

​បុរសខ្លាំងឈរពីក្រោយខ្សែសង្វាក់ហាងលក់ទូរស័ព្ទចល័តខាងលើ មានឈ្មោះថា Nguyen Duc Tai កើត​នៅ​ថ្ងៃ​ទី​៣០ ខែ​ឧសភា ឆ្នាំ​១៩៦៩ នា​ទីក្រុង​ហូជីមិញ ប្រទេសវៀតណាម។ លុះធំដឹងក្តីចូលដល់វ័យពេញកំលោះ Tai បានជ្រើសរើសសិក្សាជំនាញផ្នែកហិរញ្ញវត្ថុ-គណនេយ្យ នៅសាកលវិទ្យាល័យសេដ្ឋកិច្ចក្នុងទីក្រុងហូជីមិញ និង​បាន​បន្ត​សិក្សា​ថ្នាក់​អនុបណ្ឌិត​ផ្នែក​គ្រប់គ្រង​ពាណិជ្ជកម្ម​នៅ​សាលា​គ្រប់គ្រង​បារាំង-វៀតណាម CFVG។

ក្រោយបញ្ចប់ការសិក្សា យុវជនមានអនាគតភ្លឺស្វាងរូបនេះ បានក្លាយជានាយកផ្នែកហិរញ្ញវត្ថុសម្រាប់សាជីវកម្មស្វីសនៅប្រទេសវៀតណាម និងបានកាន់មុខតំណែងក្នុងក្រុមហ៊ុនជាច្រើនដូចជា ប្រធានសាខានៅក្រុមហ៊ុន Phuong Huy 21st Century Company, ប្រធានផ្នែកអភិវឌ្ឍន៍យុទ្ធសាស្រ្តនៅ S-Fone ពីឆ្នាំ ២០០៣ ដល់ឆ្នាំ ២០០៤។ ស្របពេលការងារមានស្ថេរភាពគឺជាបំណងប្រាថ្នាសម្រាប់យុវជនជាច្រើននាក់នាគ្រានោះ លោក Tai បានបោះសម្តីថា៖ «ខ្ញុំ​មិន​ចង់​ឲ្យ​អ្វីៗមើលទៅ​មាន​ភាព​ស្ងប់​ស្ងាត់​ពេក​ទេ»។ ក្នុងឆ្នាំ២០០៤ លោកក៏សម្រេចចិត្តបោះជំហានចាប់ផ្តើមបង្កើតក្រុមហ៊ុន Mobile World Joint Stock Company ដោយមានកិច្ចប្រតិបត្តិការរវាងរូបលោក និងមិត្តភក្តិ៤នាក់ទៀត។

អត្ថបទគួរអានបន្ទាប់៖ ក្រោយសម្រេចចិត្ត បិទហាងស្ទើរទាំងអស់នៅខ្មែរ មេធំរបស់ប្រេន Bluetronics លើកឡើងបែបនេះ

ទំព័រជីវិតថ្មីលើវិថីជំនួញ លោក Tai ត្រូវភាពបរាជ័យវាយដំស្ទើរសន្លប់ ធ្លាក់ខ្លួនពីនាយកក្រុមហ៊ុនធំ មកធ្វើការជាកម្មករស៊ីឈ្នួល ប៉ុន្តែលោកពុំបានអស់សង្ឃឹមរត់ចោលក្តីស្រមៃឡើយ ពោលគឺឆ្លៀតរៀនសូត្របណ្តើរ កែលម្អចំណុចខ្វះខាតបណ្តើរ។ លុះកន្លងទៅមួយរយៈ បន្ទាប់ពីការបរាជ័យដំបូង លោកនិងដៃគូបានចាប់ដៃគ្នាម្តងទៀតបើកហាង Mobile World ចំនួន៣ ក្នុងពេលតែមួយ។ ទោះយ៉ាងណាក្តី ដោយសារហាងមានចំនួនច្រើន តែពុំមានអតិថិជន ទើបលោកនិងសហការីជួបការលំបាកដូចទឹកបាក់ទំនុប។ យកបទពិសោធន៍ធ្វើជាគ្រូ ជំនួសឱ្យបរិមាណ លោកនិងអ្នកដឹកនាំផ្សេងទៀតបានងាកមកផ្តោតលើហាងតែមួយវិញ ទាំងគុណភាព ទំហំ និងផលិតផល ដល់សេវាកម្ម និងបុគ្គលិក។ បុរសពោរពេញដោយឆន្ទៈ និងថាមពលរូបនេះបានលើកឡើងថា៖ «សម្រាប់ខ្ញុំ នាយកប្រតិបត្តិល្អត្រូវហ៊ានប្តេជ្ញា ហ៊ានបរាជ័យ មានភាពជឿជាក់ និងស្មោះត្រង់»។

គូសវាសផ្លូវដើរតាមគោលនយោបាយថ្មី បានបង្កើតការភ្ញាក់ផ្អើលធំសម្រាប់ Mobile World ដោយបាននាំម៉ាកយីហោនេះហោះគ្របដណ្តប់ទូទាំងប្រទេសជាមួយនឹងការបង្កើតសាខាថ្មីតូច ធំជាបន្តបន្ទាប់ រហូតដល់មានហាងទូរស័ព្ទជាង ១០០០ទីតាំង, ហាង Dien May Xanh មាន ៧៧១ទីតាំង និងហាង Green Department មានជាង ៣០០ទីតាំង ក៏ត្រូវបានពង្រាយខ្លួនទូទាំងផ្ទៃប្រទេសផងដែរ។ ក្នុងនាមជាស្ថាបនិក និងជាប្រធានក្រុមហ៊ុន Mobile World (MWG) លោក Nguyen Duc Tai បានថ្លែងយ៉ាងដូច្នេះថា៖ «អ្នកមានជម្រើសពីរ! ទី១ អ្នកបន្តធ្វើការនៅប្រទេសជប៉ុន ឥឡូវអ្នកគណនាប្រាក់បៀវត្សរ៍កើនឡើង២០%ក្នុងមួយឆ្នាំ អ្នកបូកបន្ថែមវាក្នុងរយៈពេល៣ឆ្នាំ តើប្រាក់ចំណូលប៉ុន្មានដែលអ្នកទទួលបាន?។ ទី២ ដើរតាមក្តីស្រមៃ បើហ្គេមនេះបរាជ័យ អ្នកអាចសល់បាតដៃទទេ ឬត្រូវប្រឹងងើបពីក្រោមសូន្យឡើងវិញ តែបើហ្គេមនេះជោគជ័យ ខ្ញុំធានាជូនអ្នកនូវអនាគតដ៏ត្រចះត្រចង់ និងតួលេខក្នុងកុងធនាគាររបស់អ្នក»។ លោកបានបន្ថែមថា៖ «បើអ្នកបន្តធ្វើការធម្មតាៗដូចស៊ីឈ្នួលគេក្នុងថ្ងៃនេះ អ្នកគ្រាន់តែជាសណ្តែកដីក្នុងឃ្លាំងទ្រព្យសម្បត្តិប៉ុណ្ណោះ»។

យ៉ាងណាមិញ បច្ចុប្បន្នលោក Nguyen Duc Tai ស្ថិត​ក្នុង​កំពូល​អ្នក​មាន​បំផុត​ទាំង​១០​នៅ​ផ្សារ​ហ៊ុន​វៀតណាម រីឯយីហោរបស់លោកទទួលបាន៥០% នៃចំណែកទីផ្សារក្នុងប្រទេសកំណើតយ៉ាងឆាប់រហ័សក្នុងឧស្សាហកម្មទូរស័ព្ទ និងកាន់កាប់ទ្រព្យសម្បត្តិសុទ្ធប្រមាណ ៣,២៦០,៨៨ពាន់លានដុង (ប្រហែលជាង ១៤ពាន់លានដុល្លារ) គិតត្រឹមឆ្នាំ២០២០។ នេះបើយោងតាមការឲ្យដឹងពីគេហទំព័រវៀតណាម invert.vn។

គួរជម្រាបផងដែរថា ក្រុមហ៊ុន Mobile World បាន​បើក​ហាង​ដំបូង​គេ​នៅ​កម្ពុជាមាន​ឈ្មោះ BigPhone ​កាល​ពី​ជិត៦ឆ្នាំ​មុន ដោយរំពឹងយ៉ាងខ្លាំងថា ហាងនីមួយៗនឹងអាចរកចំណូលបានខ្ទង់ ២ពាន់លានដុង ឬស្មើនឹង ៨៤,៧០០ដុល្លារក្នុងមួយខែ។ ទោះអាចរកចំណូលកើនឡើងជាបីខ្ទង់ក្នុងរយៈពេលជិត ៤ឆ្នាំជាប់ៗគ្នា ដែលជិតដល់ ៥០០ពាន់លានដុងក្នុងឆ្នាំ២០២១ ក៏ពិតមែន ប៉ុន្តែចំណូលនេះនៅតែបានតិចជាង ០.៥% នៃប្រាក់ចំណូលសរុបរបស់ក្រុមហ៊ុន។ ក្នុងនោះក្រុមហ៊ុន Mobile World បានឲ្យដឹងដែរថា៖ «ខ្សែសង្វាក់អាជីវកម្មនេះ មិនមានសក្តានុពលក្នុងការរួមចំណែកក្នុងប្រាក់ចំណូល និងប្រាក់ចំណេញដ៏សំខាន់នាពេលអនាគតរបស់ក្រុមហ៊ុននោះទេ ដូច្នេះយើងបានបិទវាជាបន្តបន្ទាប់ ដើម្បីកាត់បន្ថយបន្ទុកផ្សេងៗទៀត»។

ជាមួយគ្នានេះ បើតាមទិន្នន័យលើគេហទំព័រ Bluetronics ក្រុមហ៊ុននេះបានចាប់ផ្ដើមរើហាងលក់របស់ខ្លួនចេញពីប្រទេសកម្ពុជា ស្ទើរតែទាំងអស់ ដើម្បីឈោងចាប់ទីផ្សារថ្មីទៅកាន់ប្រទេសឥណ្ឌូណេស៊ី ខណ:សព្វថ្ងៃហាង Bluetronics ប្តូរពីចំនួន ៥៥កន្លែង មកសល់ត្រឹមចំនួន២ប៉ុណ្ណោះដែលនៅបើកដំណើរការក្នុងស្រុកខ្មែរ៕

អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦