ជារឿងដ៏កម្រ និងភ្ញាក់ផ្ដើលមួយ ដោយថ្មីៗនេះកម្ពុជាបានរកឃើញផូស៊ីលឈើមួយដែលមានអាយុកាលប្រមាណ ២៥០ លានឆ្នាំមុខ មានទីតាំងស្ថិតនៅក្នុងខេត្ដបន្ទាយមានជ័យ។ នេះបើតាមការបញ្ជាក់ពីឯកឧត្ដម សាយ សំអាល់ ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់។

តាមការបញ្ជាក់នៅក្នុងសារចែករំលែកលើបណ្ដាញសង្គមហ្វេសប៊ុក កាលពីថ្ងៃទី៥ ខែតុលា ឆ្នាំ២០២៤ ឯកឧត្ដមបានសរសេរថា «ផូស៊ីលឈើរកឃើញនៅក្នុងភូមិសាស្ត្រខេត្តបន្ទាយមានជ័យ។ តាមការសិក្សាបឋមឈើប្រភេទនេះគឺរស់នៅក្នុងសម័យកាល ភ័រមាន ប្រមាណ២៥០លានឆ្នាំមុន»។

សូមជម្រាបថា ការរកឃើញផូស៊ីលដែលមានអាយុកាលរាប់លានឆ្នាំនេះ មិនមែនកើតឡើងលើកទី១នោះទេនៅកម្ពុជា។ ជាក់ស្ដែងកាលពីឆ្នាំ២០២២ ក្រសួងបរិស្ថានក៏បានរកឃើញផូស៊ីលឆ្អឹងស្មងជើងខាងឆ្វេងរបស់ដាយណូស័រ មានប្រវែង៧០ស.ម និងទទឹង២០ស.ម នៅក្នុងខេត្ដកោះកុង។ ដោយផូស៊ីលសត្វដ៏កម្រមួយនេះអាចមានអាយុកាល ៦៥លាន-១៩០លានឆ្នាំឯណោះ៕