ផ្លូវល្បឿនលឿនភ្នំពេញ-បាវិត ត្រូវបានសិក្សារនឹងត្រៀមបើកការដ្ឋានសាងសង់នៅឆ្នាំថ្មី២០២៣ ខាងមុខនេះហើយ។ អ្វីដែលកាន់តែពិសេសគម្រោងផ្លូវល្បឿនលឿនទី២ របស់កម្ពុជានេះ ក៏នឹងត្រូវតភ្ជាប់ជាមួយផ្លូវល្បឿនលឿននៃប្រទេសវៀតណាម នៅច្រកព្រំដែនក្រុងបាវិតផងដែរ។

ទាក់ទងនឹងការតភ្ជាប់ខាងលើ កាលពីពេលថ្មីៗកន្លងទៅឯកឧត្ដមទេសរដ្ឋមន្រ្ដី ស៊ុន ចាន់ថុល រដ្ឋមន្រ្ដី ក្រសួងសាធារណការ និងដឹកជញ្ជូន ក៏បានបង្ហាញពីទីតាំងនៃការតភ្ជាប់គ្នារវាងផ្លូវល្បឿនលឿននៃប្រទេសទាំងពីរផងដែរ ដោយទីតាំងដែលត្រូវតភ្ជាប់នេះគឺស្ថិតនៅចំណុចគីឡូម៉ែត្រលេខ ១៦៤។

ថ្លែងនៅពិធីចុះហត្ថលេខាលើកិច្ចព្រមព្រៀងក្របខ័ណ្ឌ សម្រាប់គម្រោងសាងសង់ផ្លូវល្បឿនលឿនតភ្ជាប់ពីភ្នំពេញ-បាវិត រវាងរាជរដ្ឋាភិបាលកម្ពុជា និងក្រុមហ៊ុនសាជីវកម្មស្ពាន និងថ្នល់ចិន (CRBC) កាលពីថ្ងៃទី១០ វិច្ឆិកា ២០២២ ឯកឧត្ដមទេសរដ្ឋមន្រ្ដីបានលើកឡើងដូច្នេះថា «ចំពោះទីតាំង តាមយើងមើលផែនដាក់បង្ហាញឲ្យគាត់មើល គឺប្រហែលមិនខុសគ្នានោះទេ ផ្លូវគាត់រត់មកតាមផ្លូវលេខ ២២ របស់គាត់មកតភ្ជាប់នឹង ផ្លូវល្បឿនលឿនរបស់យើង នៅបង្គោលគីឡូម៉ែត្រ ១៦៤ ។ ប៉ុន្ដែគាត់នឹងធ្វើជាលាយលក្ខណ៍អក្សរ ប្រាប់យើងទីតាំងពិតប្រាកដ ដើម្បីយើងរៀបចំគូរប្លង់ ឬទិញដី ឲ្យបានត្រឹមត្រូវនៅទីតាំងដែលយើងតភ្ជាប់ជាមួយគ្នា»។

ឯកឧត្ដម ស៊ុន ចាន់ថុល បញ្ជាក់ថា ផ្លូវល្បឿនលឿននេះមានសារៈសំខាន់ណាស់ក្នុងការតភ្ជាប់ការដឹកជញ្ជូនទាំងពីប្រទេសចិន មកភូមា មកប្រទេសថៃ មកកម្ពុជា ទៅវៀតណាម ខណៈផ្លូវនេះគឺជាចំណែកនៃផ្លូវអាស៊ានលេខ ១ ផងដែរ។ ដោយសារបច្ចុប្បន្នរាជរដ្ឋាភិបាលបានកំពុងពង្រីកផ្លូវពី ២ គន្លងទៅ ៤ គន្លង ពីប៉ោយប៉ែតមកភ្នំពេញ ហើយតភ្ជាប់ពីភ្នំពេញទៅបាវិតតាមផ្លូវល្បឿនលឿននេះតែម្ដង។

សូមជម្រាបផងដែរថា គម្រោងផ្លូវល្បឿនលឿនភ្នំពេ-បាវិត នឹងត្រូវបើកការដ្ឋានសាងសង់នៅឆ្នាំថ្មី២០២៣ ហើយគ្រោងបញ្ចប់នៅចុងឆ្នាំ២០២៦ ឬដើមឆ្នាំ២០២៧ ខណៈផ្លូវល្បឿនលឿនរបស់វៀតណាម ក៏គ្រោងបញ្ចប់នៅពេលវេលាដូចគ្នាផងដែរ។

គម្រោងផ្លូវល្បឿនលឿនភ្នំពេញ-បាវិត នេះត្រូវបានវិនិយោគដោយក្រុមហ៊ុន CRBC ហើយផ្លូវនេះដែរនឹងត្រូវប្រើប្រាស់ថវិកាសម្រាប់ការសាងសង់ចំនួន ១ ៦៣៨ លានដុល្លារ។ ហើយការសាងសង់ផ្លូវល្បឿនលឿននេះ ក៏នឹងមានការសាងសង់ស្ពានដ៏វែងមួយផងដែរនៅតំបន់ល្វាឯម៕

អត្ថបទ៖ កឹម ប៊ុនធឿន