ក្រោយក្លាយជាម្ចាស់កម្មសិទ្ធបណ្ដាញសង្គម Twitter មហាសេដ្ឋីលេខ១ Elon Musk បានធ្វើកំណែទម្រង់ជាច្រើននៅក្នុងក្រុមហ៊ុននេះ រហូតឈានដល់ការផ្លាស់ប្ដូររចនាសម្ព័ន្ធ ក្បាលម៉ាស៊ីនដឹងនាំក្រុមហ៊ុននេះថ្មីផងដែរ។
ជាក់ស្ដែង បើយោងតាម CNN សេដ្ឋីរូបនេះបានសម្រេចចិត្តផ្លាស់ប្ដូរក្បាលម៉ាស៊ីនដឹកនាំសំខាន់ៗ ចំនួន២រូបចេញផងដែររួមមានលោក Parag Agrawal ដែលត្រូវជានាយកប្រតិបត្តិ និងលោក Ned Segal ដែលជាប្រធានផ្នែកហិរញ្ញវត្ថុ។
ចំពោះមូលហេតុសម្រេចចិត្តផ្លាស់ប្ដូរនេះ មិនត្រូវបានលោកបង្ហើបឱ្យដឹងជាផ្លូវការនៅឡើយ ប៉ុន្តែលោកធ្លាប់មានប្រសាសន៍ចង់ធ្វើកំណែទម្រង់បណ្ដាញសង្គមនេះឱ្យកាន់តែមានភាពល្អប្រសើរឡើង។ Musk បាននិយាយថា គាត់គ្រោងនឹងគិតឡើងវិញនូវគោលនយោបាយសម្របសម្រួលមាតិការបស់ Twitter ក្នុងការផ្តល់វិធីសាស្រ្តអតិបរមាបន្ថែមទៀតចំពោះ "ការបញ្ចេញមតិដោយសេរី" ។ មហាសេដ្ឋីរូបនេះក៏បាននិយាយថាគាត់មិនយល់ស្របនឹងការអនុវត្តការហាមប្រាមជាអចិន្ត្រៃយ៍របស់ Twitter សម្រាប់អ្នកដែលបំពានច្បាប់របស់ខ្លួនម្តងហើយម្តងទៀតនោះទេ។
ទន្ទឹមនឹងការចង់កែប្រែបណ្ដាញសង្គមនេះឱ្យក្លាយជាកន្លែងបញ្ចេញមតិដោយសេរី តែលោកក៏មិនចង់ឱ្យអ្នកដែលបញ្ចេញមតិលើបណ្ដាញសង្គមនេះ តែលើរឿងឥតប្រយោជន៍ ឬមិនមានសារសំខាន់នោះដែរ។
គួរជម្រាបផងដែរថា នាពេលកន្លងមក សេដ្ឋីរូបនេះក៏ធ្លាប់បានលើកឡើងថា ការទិញយកបណ្ដាញសង្គមមួយនេះ គឺមិនបានធ្វើដើម្បីផ្តោតលើការរកលុយនោះទេ ប៉ុន្តែគឺដើម្បីធ្វើឱ្យបណ្ដាញសង្គមនេះក្លាយជាទីកន្លែងបញ្ចេញមតិជាសាធារណៈដ៏គួរឱ្យទុកចិត្តបំផុតមួយ ដែលមានសារៈសំខាន់បំផុតមួយសម្រាប់មនុស្សជាតិ៕