មនុស្សធម្មតាធ្វើការប្រហែលជា ៤០ម៉ោងប៉ុណ្ណោះក្នុង១សប្ដាហ៍ ប៉ុន្តែសម្រាប់មហាសេដ្ឋីលេខ ១ Elon Musk វិញ លោកធ្វើការស្មើនឹងមនុស្ស៣នាក់ឯនោះ ពោលគឺលោកធ្វើការជាមធ្យមខ្ទង់ ១២០ម៉ោងក្នុង១សប្ដាហ៍។ ទម្លាប់ធ្វើការធ្វើការខ្លាំងដូចជាម៉ាស៊ីននេះហើយ បានធ្វើឱ្យក្រុមហ៊ុនភាគច្រើនដែលលោកបង្កើត តែងតែទទួលបាននូវភាពជោគជ័យមហិមា និងពិបាកឱ្យដៃគូប្រជែងយកឈ្នះបំផុត។
ថ្វីត្បិតតែសល់ទ្រព្យមហាសាល ទោះចាយ៣ជំនាន់ទៀតក៏មិនអស់ក៏ដោយ ប៉ុន្តែលោកគឺពិតជាមានទម្លាប់គេងនិងធ្វើការគួរឱ្យខ្លាចបំផុតផងដែរ។ ជាក់ស្ដែងលោកបានបំប្លែងអូហ្វីសធ្វើការរបស់លោក ជាកន្លែងសម្រាប់គេង ហើយខ្លះទៀត លោកគេងនៅលើកម្រាលព្រំ តាមរោងចក្រដែលលោកធ្វើការក៏មាន។ មានថ្ងៃខ្លះ គាត់ធ្វើការតាំងតែពីពេលយប់ រហូតដល់ម៉ោង៤ព្រឹកក៏មានដែរ។
លោកធ្លាប់និយាយថា៖ «ថ្ងៃខ្លះខ្ញុំធ្វើការដល់ទៅ២២ម៉ោងក្នុង១ថ្ងៃ ហើយខ្ញុំនឹងត្រឡប់ទៅធ្វើការភ្លាមៗបើទោះបីជាម៉ោង៣ព្រឹក ឬថ្ងៃអាទិត្យក៏ដោយ ឱ្យតែមានបញ្ហាប្រឈមណាមួយទាមទារឱ្យខ្ញុំត្រូវដោះស្រាយជាបន្ទាន់ រហូតដល់ពេលខ្លះ គេងក្នុងរោងចក្រតែម្ដងក៏មាន»។
ថ្វីត្បិតតែសេដ្ឋីរូបនេះ ជាមនុស្សដែលឱ្យតម្លៃលើការងារលើសពីសុខភាពខ្លួនក៏ដោយ ប៉ុន្តែពេលនេះលោកនឹងសម្រេចចិត្តផ្លាស់ប្ដូរទម្លាប់ឈប់គេងយប់តិចម៉ោងដូចមុនទៀតហើយ ដោយជំនួសមកវិញគឺគេងឱ្យគ្រប់ ៦ម៉ោងក្នុង១យប់។ ចំពោះមូលហេតុដែលធ្វើឱ្យលោកសម្រេចចិត្តចិត្តឱ្យតម្លៃលើការគេងច្រើនជាងមុន ព្រោះដោយសារលោកមានបញ្ហាសុខភាព ជាពិសេសគឺសមត្ថភាពខួរក្បាលថយចុះ ព្រោះលោកថាការគេងតិចម៉ោងបានធ្វើឱ្យខួរក្បាលរបស់លោកមានអារម្មណ៍ឈឺចាប់បំផុត។
Musk បាននិយាយថា៖ «ខ្ញុំបានព្យាយាមគេងតិច ព្រោះគិតថាទោះបីជាខ្ញុំភ្ញាក់ពីគេងច្រើនម៉ោងក៏ដោយ ក៏ខ្ញុំធ្វើការងារបានតិចដែរ”។ ផ្ទុយទៅវិញកម្រិតនៃការឈឺចាប់ខួរក្បាលគឺអាក្រក់ ប្រសិនបើខ្ញុំគេងតិចជាងប្រាំមួយម៉ោងក្នុងមួយយប់»។
គួរបញ្ជាក់ថា ទាក់ទងនឹងការគេង បរិមាណនៃការគេងដែលល្អ គឺប្រែប្រួលពីមនុស្សម្នាក់ទៅមនុស្សម្នាក់ ប៉ុន្តែសម្រាប់មនុស្សពេញវ័យភាគច្រើនដែលមានអាយុចន្លោះពី ១៨ ទៅ ៦០ឆ្នាំ គួរតែគេងយ៉ាងហោចណាស់ ៧ម៉ោងក្នុងមួយយប់ នេះបើយោងតាមមជ្ឈមណ្ឌលគ្រប់គ្រង និងការពារជំងឺ ព្រោះការគេងមិនលក់មានទំនាក់ទំនងទៅនឹងជំងឺបេះដូង ជំងឺតម្រងនោម ជំងឺលើសឈាម ទឹកនោមផ្អែម ជំងឺដាច់សរសៃឈាមខួរក្បាល ធាត់ និងជំងឺធ្លាក់ទឹកចិត្ត។ ដូច្នេះទោះបីជាអ្នករវល់ការងារខ្លាំងយ៉ាងណា សូមកុំភ្លេចថែរក្សាសុខភាពឱ្យបានល្អទាំងការហូបចុក ការគេង និងកុំភ្លេចហាត់ប្រាណឱ្យបានញឹកញាប់ផងដែរ៕
