ប្រិយមិត្តមានចាំទេកាលពីឆ្នាំ ២០១៩ កន្លងទៅនេះ ប្រទេសថៃបានបង្កើតវេទិកាដេញថ្លៃទុរេនមួយផ្លែមានតម្លៃរហូតដល់ ៤៨,០០០ដុល្លារ ដែលធ្វើឱ្យល្បីពេញពិភពលោក ហើយនាំឱ្យទុរេនថៃកាន់តែមានប្រជាប្រិយ ហើយក៏លក់បានថ្លៃទៀត ។ ស្រដៀងគ្នានេះដែរក្រឡេកទៅមើលសណ្ឋាគារមួយមានឈ្មោះថា Baiyoke Sky នៅក្នុងប្រទេសថៃ ថ្មីៗនេះគេបានរៀបចំកម្មវិធីមួយជាលក្ខណៈប៊ូហ្វេទុរេន ដែលមនុស្សចាយលុយប្រមាណជាង១០ដុល្លារប៉ុណ្ណោះ ប៉ុន្តែអាចញ៉ាំមួយឆ្អែត នេះបើយោងតាមការចុះផ្សាយគេហទំព័ REALDURIAN កាលពីពេលកន្លងទៅនេះ ។
កម្មវិធីមួយដែលមានឈ្មោះថា Durian Buffet Festival ត្រូវបានគេរៀបចំឡើងនៅក្នុងសណ្ឋាគារ Baiyoke Sky ជាន់ទី១៨ ដែលក្នុងនោះមានបង្អែមទុរេនចំនួនរហូតទៅដល់ ៥០មុខ ដូចជាបង្អែមទុរេន ប្រភេទទុរេនអង្ករដំណើប ទុរេនចាហួយ ទុរេនការ៉េម ទុរេនចំហុយ និងមានប្រភេទទុរេនជាច្រើនមុខទៀតសម្រាប់ឱ្យមនុស្សចូលទៅញ៉ាំមួយឆ្អែត ។
យ៉ាងណាមិញចំពោះការចូលទៅញ៉ាំក្នុងម្នាក់ចំណាយ ៤៩០ បាត ស្មើនឹង ១៤ដុល្លារក្នុងមួយវគ្គ ដែលក្នុងនោះគេកំណត់ពេលត្រឹមតែ ១ ម៉ោង៣០នាទីតែប៉ុណ្ណោះ និងមានអ្នកចាំឈរមើល៣នាក់ក្នុងមួយតុ ជាមួយគ្នានេះដែរក្នុងករណីដែលញ៉ាំមិនអស់ពីចាន មានន័យថាមិនអស់ ១ភាគ៣នៃទុរេនក្នុងចាន គេនឹងត្រូវនិន័យ ២៩ដុល្លារ។
ខាងលើនេះវាគ្រាន់តែជាបទពិសោធន៍ថ្មីមួយ សម្រាប់បងប្អូនដែលនិយម និងចូលចិត្តទទួលទានទុរេន ហើយវាក៏ជាល្បិចមួយដែរ នៅក្នុងការធ្វើយុទ្ធសាស្រ្តទីផ្សារទុរេននៅក្នុងស្រុកថៃ ពោលគឺគេតែងតែមានក្បួនថ្មីៗជានិច្ច ដើម្បីឱ្យកសិករដែលជាអ្នកដាំដុះទុរេនមានទីផ្សារ ទុរេនមានប្រជាប្រិយល្បីដល់ពិភពលោក និងអាចនាំចេញបានច្រើនថែមទៀត ។
សូមជម្រាបថា មុននឹងបងប្អូនអាចចូលញាំកន្លែងខាងលើបាន បងប្អូនត្រូវប្រាកដថា យើងគ្មានជំងឺអ្វីមួយនៅជាប់ខ្លួន ដូចជាទឹកនោមផ្អែម ឬមានបញ្ហាសុខភាពផ្សេងៗ ហើយនៅកន្លែងនោះក៏ គេមានរៀបចំឡានពេទ្យរួចជាស្រេច ដើម្បីការពារនៅពេលដែលមានបញ្ហាអ្វីមួយចំពោះអ្នកដែលចូលរួមញ៉ាំទុរេននៅក្នុងកម្មវិធីនោះ ។
អត្ថបទដោយ៖ នៅ ថាត់សណា
