តារាជួរមុខកូរ៉េខាងត្បូងកញ្ញា Hwang So-hee ដែលត្រូវបានគេស្គាល់ឈ្មោះហៅក្រៅ DJ Soda បានសាងកេរ្ដិ៍ឈ្មោះដ៏ល្បីល្បាញបំផុតក្នុងនាមជាអ្នកចាក់តន្ត្រីដ៏សំបូរបែបក្នុងមហោស្រពតន្ត្រីអាស៊ីមួយចំនួនរួមទាំង "S20 Songkran Musical Festival" ផងដែរ។
ដោយឡែក ការពីម្សិលមិញនេះកញ្ញាបានធ្វើការបង្ហោះវីដេអូមួយ ស្លៀកសម្លៀកបំពាក់ប្រពៃណីខ្មែរ លើទឹកដីអង្គរ ភ្ជាប់ជាមួយពាក្យសម្តីយ៉ាងដូច្នេះថា «ទឹកដីកម្ពុជាដ៏ស្រស់ផូរផង់។ ជួបគ្នានៅកម្មវិធី Sting Musicverse Festival យប់នេះ» នៅលើគណនី Facebook Page របស់កញ្ញាផ្ទាល់ដែលមានឈ្មោះថា DJ SODA មានអ្នកតាមដានរហូតដល់ទៅ ១០លាននាក់ឯណោះ។
គួរជម្រាបផងដែរថា DJ Soda ត្រូវបានគេទទួលស្គាល់ថាជា DJ កូរ៉េស្រីវ័យក្មេង មានមុខមាត់គួរឲ្យស្រលាញ់ និងកំពុងទាញចំណាប់អារម្មណ៍យ៉ាងខ្លាំង ដោយសារសម្រស់ និងជំនាញក្នុងការ Mix ភ្លេងរបស់នាង។ DJ វ័យ៣៣ឆ្នាំរូបនេះ បានសម្តែងនៅតាមបណ្តាប្រទេសជាច្រើនជុំវិញពិភពលោកដូចជា បាងកក សេអ៊ូល ចាកាតា និងកម្ពុជា ជាដើម៕
អត្ថបទដោយ៖ កាន់ ដារ៉ា (ស្មេរពនេចរ)
