បញ្ហាឈឺក្បាលមួយរបស់មនុស្សគឺពេលចាប់ផ្តើមធ្វើដំបូង ច្រើនតែរងចាំឱ្យគ្រប់យ៉ាងល្អឥតខ្ចោះ ហើយមើលរំលងនូវតម្លៃរឿងរ៉ាវតូចៗជានិច្ចជាកាល។ ពិតណាស់គ្រប់ការចាប់ផ្តើមមិនមែនទាល់តែមានគ្រប់យ៉ាងនោះទេ ជាក់ស្តែងលោក ឆុន វាសនា អ្នកជំនាញរកលុយតាមយូធូប មានបទពិសោធន៍រយៈពេល១០ឆ្នាំលើវិស័យនេះបានបង្ហើបប្រាប់ច្បាស់ៗអំពីមាតិកា ៣ប្រភេទ អាចរកលុយបានច្រើនពី Youtube ទោះបីប្រើតែទូរស័ព្ទថតក្តី។
នៅក្នុងបទសម្ភាសន៍ជាមួយ Business Cambodia ម្ចាស់ឆានែលយូធូប CHHON Veasna បានថ្លែងជាមួយក្តីរីករាយថា “ជាដំបូងយើងត្រូវដឹងថាយូធូប មានផ្នែកធំ២ សម្រាប់ឱ្យយើងរើស ថាតើយើងចង់ធ្វើផ្នែកប្រភេទណា? សម្រាប់ទី១នោះគឺផ្នែកសម្រាប់មាតិកាអប់រំ និងទី២គឺផ្នែកកម្សាន្ត ដែលយើងត្រូវរើសមកផលិត បន្ទាប់មកនៅក្នុងនោះគេមានបែងចែកទៀតថាតើ ផ្នែកអប់រំមានមាតិកាវីដេអូបែបណាខ្លះ ផ្នែកកម្សាន្តមានមាតិកាវីដេអូបែបណាខ្លះ”។
Youtuber បែបអប់រំមួយនេះបានបន្តថា “បន្ទាប់ពីយើងដឹងថា អ្វីជាជម្រើសរបស់យើងហើយ យើងអាចមកដឹងអំពីមាតិកាផ្សេងៗនៅផ្នែកនីមួយ ហើយនៅក្នុងនោះសម្រាប់បទពិសោធន៍ខ្ញុំ មានមាតិកា ៣ប្រភេទដែលអាចរកលុយបានច្រើននៅស្រុកយើងនោះ មានដូចជា ទី១មាតិកា Review Product យើងអាចធ្វើការវាយតម្លៃឬបទបង្ភាញអំពីផលិតផលនិងបច្ចេកវិទ្យាថ្មីៗជាដើម ទី២ Restoring Product មាតិកានេះគឺធ្វើការកៃច្នៃរបស់ថ្មីប្លែក ដូចជាការធ្វើបង្កើតថ្មី ឬច្នៃរបស់ចាស់ឱ្យទៅជាថ្មីផ្សេងៗពីគ្នា ចំណែកឯទី៣គឺ មាតិកាទាក់ទិននឹងនិន្នាការសង្គម“។
ប្រធាននាយកដ្ឋានបច្ចេកទេសនៃវិទ្យុជាតិ និងជាអតីតគ្រូបង្រៀនផ្នែកអាយធីរូបនេះបានបន្ថែមថា “ខ្ញុំសូមលើកទឹកចិត្តឱ្យយុវជនយើង បើសិនជាធ្វើមាតិកាអ្វីគួរតែផ្តោត១ឱ្យចំ ហើយបង្កើតវីដេអូបែបលក្ខណៈជារបស់ខ្លួនឯង ព្រោះថាយើងមានសិទ្ធិពេញលេញ និងមិនមានហានិភ័យខ្ពស់ក្នុងការបាត់ឆានែល ហើយអាចរកចំណូលបានច្រើនពីវីដេអូនោះ ជាជាងយករបស់គេមកកាត់ផុស ទោះបីជាមិនមានកាមេរ៉ាថ្លៃៗក្តី ព្រោះកាលខ្ញុំចាប់ផ្តើមខ្ញុំប្រើត្រឹមទូរស័ព្ទចាស់មួយគ្រឿងប៉ុណ្ណោះទាំងការថតនិងកាត់តផងដែរ ខ្ញុំធ្វើបានអ្នកទាំងអស់គ្នាក៏ធ្វើបានដែរ”។
គួរបញ្ជាក់ផងដែរថាម្ចាស់រង្វាន់ប៊ូតុងប្រាក់ ដែលមាន Channel Subscribe រហូតដល់ទៅ 144K រូបនេះក៏មាន Facebook Page ឈ្មោះថា CHHON Veasna - ឆុន វាសនា ដែលមានអ្នកតាមដានប្រមាណជាង 55K និងតែងតែចែករំលែកចំណេះដឹងថ្មីៗក្នុងការធ្វើវីដេអូនិងយូធូប ដោយឥតគិតថ្លៃផងដែរ៕
អត្ថបទដោយ៖ ពីង ជូអេង
