អាជីវកម្មជួលសម្លៀកបំពាក់គឺជារបរដ៏ពេញនិយមមួយនៅប្រទេសសឹង្ហបុរី រហូតធ្វើឱ្យប្តីប្រពន្ធមួយគូគឺ Lim និង Halim អាចបង្កើតក្រុមហ៊ុនតម្លៃ៣០លានដុល្លារ ពីរបរជួលសម្លៀកបំពាក់នេះ។ហើយបើគិតមកដល់ពេលបច្ចុប្បន្នអាជីវកម្មជួសរបស់ពួកគេទាំងពីរមានសមាជិកជួល ២០០,០០០នាក់នៅទូទាំងប្រទេសសិង្ហបុរី និងឥណ្ឌូនេស៊ី។

យោងតាមការចុះផ្សាយរបស់សារព័ត៌មាន CNBC បានឱ្យដឹងថា ដំបូងឡើយអ្នកនាង Chris Halim គ្រាន់តែជាបុគ្គលិកធនាគារម្នាក់ប៉ុណ្ណោះ ប៉ុន្តែនោះអំឡុងឆ្នាំ ២០១៦ នាងបានរកឃើញគំនិតរកស៊ីមួយទាក់ទងទៅនឹងការជួលសម្លៀកបំពាក់ ក្រោយមកនាងក៏បានយកគំនិតនេះទៅពិភាក្សាជាមួយស្វាមី។បន្ទាប់ពីបានជជែកគ្នារួចអ្នកនាង Chris Halim ម្ចាស់ហាងនិង Appជួលសម្លៀកបំពាក់ Style Theory ក៏បានសម្រេចចិត្តបោះបង់ការងារ ហើយងាកមកបោះទុនខ្ទង់៤ម៉ឺនដុល្លារបង្កើត App និងហាងជួលសម្លៀកបំពាក់វិញ។

បើតាមការលើកឡើងរបស់អ្នកនាង Chris Halim បានឱ្យដឹងថា “មូលហេតុដែលធ្វើឱ្យខ្ញុំចិត្តសឿងហ៊ានបោះបង់ការងារចោលហើយចេញរកស៊ីខ្លួនឯង ដោយសារតែគាត់មើលឃើញថា ជាញឹកញាប់ខ្ញុំតែងតែឮមនុស្សស្រីរអ៊ូពីបញ្ហាសម្លៀកបំពាក់ថាគ្មានអ្វីពាក់ ពាក់ដដែលៗទាំងដែលខ្លួនឯងមានសម្លៀកបំពាក់ពេញទូ ហេតុនេះទើបខ្ញុំចង់បង្កើតអាជីវកម្មនេះ ដើម្បីជួយឱ្យមនុស្សស្រីអាចផ្លាស់ប្តូរស្ទាយ៍ថ្មីៗ ហើយចំណាយតិចមិនចាំបាច់ទិញទុកឱ្យណែនទូ”។

ដោយសារតែចេះរកពីចំណុចបញ្ហាតូចមួយនេះបានធ្វើឱ្យអាជីវកម្មជួលសម្លៀកបំពាក់របស់ Chris Halim និងស្វាមីអាចទទួលបានការគាំទ្រយ៉ាងខ្លាំងពីប្រជាជនសិង្ហបុរី ជាពិសេសនៅអំឡុងឆ្នាំ ២០២០ និង ២០២១។ ម្ចាស់ហាងវ័យក្មេងរូបនេះបានបញ្ជាក់ទៀតថា មនុស្សស្រីមិនចូលចិត្តការស្លៀកសម្លៀកបំពាក់ដដែលៗនោះទេ ហេតុនេះហើយទើបពួកគាត់ចូលចិត្តការជួលសម្លៀកបំពាក់ពីហាងរបស់នាងតាមអេប Style Theory ដែលនៅទីនោះមានជម្រើសសម្លៀកបំពាក់ចំនួន ៥០,០០០ និងកាបូបច្រើនជាង ២,០០០ម៉ូត ហើយជាទូទៅចំពោះសេវាកម្មជួលសម្លៀកបំពាក់នេះ ត្រូវបង់ប្រាក់ថ្លៃជួលចំនួន ៩៥ដុល្លារក្នុងមួយខែ។

គូសបញ្ជាក់ផងដែរថា នេះជាគំនិតអាជីវកម្មថ្មីមួយសម្រាប់ប្រជាជនកម្ពុជាយើង ជាពិសេសសម្រាប់អ្នកដែលមានទុនច្រើន អាចពិចារណាទៅលើរបរថ្មីមួយនេះ ព្រោះនៅខ្មែរយើងមានជាលក្ខណៈជួលរ៉ូបការធម្មតា ប៉ុន្តែសម្រាប់ការជួលសម្លៀក កាបូបជាប្រចាំថ្ងៃដូច Style Theory អាចនឹងមិនទាន់មាននោះទេ៕