នៅសល់តែ០២ថ្ងៃទៀតប៉ុណ្ណោះ ព្រឹត្តិការណ៍ប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ គឺឈានដល់ថ្ងៃបិទបញ្ចប់នៅថ្ងៃទី១៧ ខែឧសភា ឆ្នាំ២០២៣ ខាងមុខនេះ នៅពហុកីឡដ្ឋានជាតិមរតកតេជោ។
ក្នុងនោះដែរ បើតាមប្រសាសន៍របស់ ឯកឧត្តម វ៉ាត់ ចំរើន អគ្គលេខាធិការគណ:កម្មាធិការជាតិអូឡាំពិកកម្ពុជា និងជាអគ្គលេខាធិការ គណ:កម្មាធិការជាតិរៀបចំប្រកួតកីឡាអាស៊ីអាគ្នេយ៍លើកទី៣២ឆ្នាំ២០២៣ គឺឱ្យដឹងថា កម្មវិធីបិទព្រឹត្តិការណ៍កីឡាស៊ីហ្គេមនេះ គឺមានភាពពិសេសប្លែកដែលនឹងធ្វើឱ្យប្រជាជនខ្មែរ និងពិភពលោកចងចាំមិនភ្លេចទេ។
ត្រង់ចំណុចនេះគឺដោយសារតែកម្មវិធីបិទនេះ គឺត្រៀមនឹងសម្ដែងនូវទស្សនីយភាពថ្មីៗមួយចំនួនដែលខុសប្លែកពីពេលដែលបើក។ អ្វីដែលរឹតតែពិសេសនោះគឺកម្មវិធីបិទនេះនឹងមានអ្នកសម្ដែង ២០០០នាក់ ដែលមានសមាសភាពចម្រុះរួមមានទាំង កងទ័ព សិល្បៈករ សិល្បការិនី ដែលនឹងជួយញ៉ាំងកម្មវិធីឱ្យមានភាពរស់រវើក មានអារម្មណ៍ពិសេសចម្រុះគ្នាទាំងរីករាយ រំភើប មោទកភាព អារម្មណ៍អាឡោះអាល័យជាដើម ដែលទស្សនីយភាពទាំងនោះ នឹងដក់ជាប់ក្នុងក្រអៅបេះដូងអ្នកចូលរួមទាំងជនរួមជាតិកម្ពុជា និងបរទេស។
ដោយឡែកចំពោះទស្សនីយភាពថ្មីៗក្នុងព្រឹត្តិការណ៍បិទនេះដែរ គឺនឹងឆ្លុះបញ្ចាំងពីវប្បធម៌ អរិយធម៌ ប្រពៃណីរបស់កម្ពុជា ដែលមានភាពប្រណិតស្រស់ស្អាត ស្តង់ដាខ្ពស់ និងអស្ចារ្យបំផុត។
បើទោះបីជាយ៉ាងណាក៏ដោយ ឯកឧត្តមបន្តថា កម្មវិធីបិទព្រឹត្តិការណ៍កីឡាស៊ីហ្គេមលើកទី៣២នេះ CAMSOC នៅតែចាត់ទុកការងារ ការពារសន្តិសុខសណ្តាប់ធ្នាប់ជាអាទិភាពទីមួយ ដើម្បីធ្វើយ៉ាងណាការពារចំពោះសុខសុវត្ថិភាពរបស់ប្រជាពលរដ្ឋ និងអ្នកដែលបានមកចូលរួមទស្សនាក្នុងព្រឹត្តិការណ៍មួយនេះឱ្យបានល្អបំផុត៕
