កាលពីថ្មីៗនេះ លោក Edi Rana ដែលជានាយករដ្ឋមន្រ្តីនៃប្រទេសអាល់បានី បានប្រកាសថា ខ្លួននឹងបិទ Tik Tok ចោលទាំងស្រុងនៅក្នុងឆ្នាំ២០២៥ នេះ ក្រោយពីកម្មវិធីមួយនេះបានពង្វក់ក្មេងៗសិស្សាសាលាជាខ្លាំងរហូតធ្វើឱ្យលោកភ័យខ្លាចចំពោះឥទ្ធិពលនៃប្រព័ន្ធផ្សព្វផ្សាយសង្គមលើកុមារ។ នេះបើតាមការចុះផ្សាយដោយសារព័ត៌មាន CNN។

ប្រភពដដែលបានបន្តឱ្យដឹងទៀតថា Tik Tok នេះបានជះឥទ្ធិពលយ៉ាងខ្លាំងទៅដល់យុវជននិងក្មេងៗសិស្សសាលាឱ្យចេះប្រើប្រាស់អំពើហិក្សា ខណៈកាលពីខែមុនមានសិស្សសាលាម្នាក់បានបាត់បង់ជីវិតនិងមានក្មេងៗជាច្រើនបានរងរបួសយ៉ាងធ្ងន់ធ្ងរ។

នាយករដ្ឋមន្រ្តីបាននិយាយថា ឧបទ្ទវហេតុនេះបានកើតឡើងបន្ទាប់ពីមានការឈ្លោះប្រកែកគ្នារវាងក្មេងប្រុសសិស្សសាលាបានឌឺដងគ្នានៅលើប្រព័ន្ធផ្សព្វផ្សាយសង្គម TikTok រហូតធ្វើឱ្យពួកគាត់បានប្រើប្រាស់អំពើហិក្សាដាក់គ្នារហូតឈានដល់ការបាត់បង់ជីវិតបែបនេះ។

គួរបញ្ជាក់ថា ក្រៅពីប្រទេសអាល់បានីប្រកាសបិទ Tik Tok ចោលសូម្បីតែប្រទេសមួយចំនួននៅអឺរ៉ុប រួមទាំងប្រទេសបារាំង អាល្លឺម៉ង់ និងបែលហ្ស៊ិក ក៏បានអនុវត្តការរឹតបន្តឹងលើការប្រើប្រាស់ប្រព័ន្ធផ្សព្វផ្សាយសង្គម Tik Tok សម្រាប់កុមារផងដែរ៕