ការចេញរកស៊ីដំបូងៗ អ្វីដែលអ្នកលក់ខ្លាចបំផុតនោះគឺបញ្ហាគ្មានភ្ញៀវ គ្មានអ្នកគាំទ្រ ខណៈអាជីវកម្មខ្លះកំពុងទឹកភ្នែក និងបង្ខំចិត្តត្រូវបញ្ឃប់ពាក់កណ្តាលផ្លូវ ប៉ុន្តែក៏មានម្ចាស់អាជីវកម្មខ្លះទៀតកំពុងតែដើរផង វារផង ដើម្បីប្រយុទ្ធជាមួយបញ្ហាអស់ទាំងនោះ ព្រោះថា បញ្ហាទាំងអស់សុទ្ធតែមានដំណោះស្រាយរបស់វា គ្រាន់ថាពេលខ្លះ យើងដើរមិនទាន់ត្រូវផ្លូវតែប៉ុណ្ណឹង។​

ជាមួយគ្នានេះដែរ តាមរយៈបទសម្ភាសន៍ជាមួយក្រុមការងារ BUSINESS CAMBODIA អ្នកស្រី សំ សុជា  បានប្រាប់ឱ្យដឹងថា បច្ចុប្បន្ន លោកស្រីគឺជាស្ថាបនិកយីហោ ជាមុីញស៊ុបភ្លោះសុីឈ័ន​ ដោយគិតមកដលពេលនេះមានអស់រយៈពេលចូលជាង២ឆ្នាំហើយ ដែលការចាប់ផ្តើមលក់ដំបូងៗមិនសូវជាមានភ្ញៀវ និងអ្នកស្គាល់ច្រើនឡើយ ។

ប៉ុន្តែពីមួយថ្ងៃទៅមួយថ្ងៃ យីហោររបស់អ្នកស្រីមានអ្នកស្គាល់កាន់តែច្រើនឡើងៗ តាមរយៈក្បួនសមញ្ញៗ តែសំខាន់ចំនួន៤ខាងក្រោមនេះ អាចប្តូពីលក់មួយថ្ងៃមានមនុស្សចូលមួយៗ រហូតអាចកើនភ្ញៀវចូលពេញៗហាង៖​

១. ផ្សាយតារយៈបណ្តាញសង្គម៖ អ្នកស្រីបានលើកឡើងថា ការលក់ដំបូងៗតែជួបបញ្ហាគេមិនសូវទុកចិត្ត ដូច្នេះហើយក្រៅពីការថតរូបស្អាតៗទុកផុស អ្នកស្រីក៏បានព្យាយាមថតផុសពីសង្វាសនៃការងាររបស់អ្នកស្រីផងដែរ ដែលក្នុងនោះមានតាំងពីការលាងបន្លែ តាំងពីការជ្រើសរើសបន្លែសាច់ដែលមានគុណភាពល្អជាដើម។ ដោយការធ្វើបែបនេះបានទាញយកបេះដូងអតិថិជនជាច្រើន ឱមកចូល​ញ៉ាំដោយទំនុកចិត្ត មិនបារម្ភអំពីបញ្ហាធ្វើគ្មានអនាម័យឡើយ។​

២. ចេះច្នៃរសជាតិ៖ សហគ្រិនជាស្រ្តីរូបនេះបានបន្តទៀតថា ដោយសារតែស៊ុបរបស់អ្នកស្រីលក់ជាប្រភេទស៊ុបចិន ដូច្នេះហើយរសជាតិអាចមិនស៊ីជាមួយប្រជាជនខ្មែរ ម្ល៉ោះហើយទើបអ្នកស្រីបានច្នៃរសជាតិធ្វើយ៉ាងណា ទាំងឃ្លិន និងរសជាតិអាចទទួលយកសម្រាប់ប្រជាពលរដ្ធខ្មែរ ហើយពិតណាស់នៅពេលភ្ញៀវសាករបស់យើងម្តងហើយឆ្ងាញ់ នោះលើកក្រោយគាត់នឹងត្រឡប់មកវិញម្តងទៀត។

៣. ពីមាត់់មួយទៅមាត់មួយ៖ នៅពេលដែលរសជាតិរបស់យើងមានគុណភាពល្អ និងមានអនាម័យខ្ពស់ អ្នកដែលញ៉ាំហើយ នឹងជួយណែនាំបន្តទៀតទៅកាន់ បងប្អូន មិត្តភ័ក្រ សាច់ញាតិរបស់គាត់បន្តទៀត ដូច្នេះហើយទើបអ្នកស្រីត្រូវតែធានាថា ស៊ុបដែលអ្នកស្រីធ្វើចេញត្រូវតែជាស៊ុបដែលភ្ញៀវហូបទៅមានក្តីសុខ រីករាយនឹងញ៉ាំ ជាមួយរសជាតិដែលឆ្ងាញ់ ហើយភ្ញៀវដែលមកហើយត្រូវតែមកម្តងទៀត។

៤.​ ពង្រឹងលើបុគ្គលិក៖​ អ្នកស្រីបានបន្ថែមទៀតថា អ្នកស្រីបានបង្វឹកបុគ្គលិកឱ្យធ្វើការយ៉ាងសកម្ម ជាក់ស្តែងពេលមានភ្ញៀវដើរចូលពួកគាត់អោនលំទោន រួសរាយរាក់ទាក់ ហើយអ្វីដែលសំខាន់នោះពួកគាត់មានភាពរហ័សរហួន មិនឱ្យភ្ញៀវអង្គុយចាំយូរទេ។ ទន្ទឹមទាំងនេះដែរបុគ្គលិករបស់អ្នកស្រី ទាំងអស់សឹតតែមានចំណេះដឹងទាក់ទងការថែរក្សាអនាម័យ មិនឱ្យសម្រាមមាននៅក្នុងហាងសូម្បីតែមួយ។ ត្រឡប់មកវិញ ដោយសារតែចំណុចទាំងអស់នេះហើយ ទើបធ្វើឱ្យហាងរបស់អ្នកស្រីទទួលបានការគាំទ្រខ្លាំងពីមួយថ្ងៃទៅមួយថ្ងៃ។

គួរជម្រាបផងដែរថា សម្រាប់បងប្អូនចង់សាក ចង់ដឹងរសជាតិ បងប្អូនអាចទៅញ៉ាំដោយផ្ទាល់បាន ដោយទីតាំងស្ថិតនៅ​ ទីតាំងហាងស្ថិតនៅលេីផ្លូវ៧មករា (វិទ្យាល័យអង្គរ) ទល់មុខមីនីម៉ាត់​ ខេត្តសៀមរាប​ ឬអាចធ្វើការទំនាក់ទំនងតាមរយៈលេខទូរស័ព្ទ 095 689 992 | 070 689 992 | 060 689 992។​