ក្រុមហ៊ុនផលិតប្រេងខ្នាតយក្សមួយរបស់សហរដ្ឋអាមេរិក ដែលមានឈ្មោះថា Chevron Corp បានផ្អាកផលិតកម្មភ្លាមៗបន្ទាប់ពីមានឧបទ្ទវហេតុកើតឡើងទៅលើបគ្គលិករបស់ខ្លួន។ នេះយោងតាមការចេញផ្សាររបស់សារព័ត៌មាន REUTERS កាលពីថ្ងៃទី២០ ខែមីនា ឆ្នាំ២០២៣។
ប្រភពដដែលបានឱ្យដឹងចំពោះឧបទ្ទវហេតុនេះបានកើតឡើង កាលពីសប្តាហ៍មុន នៅឯកប៉ាល់ផ្ទុកប្រេង ដែលបានបណ្តាលឱ្យទឹកសមុទ្រលេចធ្លាយចូលទៅក្នុងនាវានោះ ដោយបានសម្លាប់សមាជិកនាវិកម្នាក់ ។
ក្នុងនោះដែរអ្នកនាំពាក្យក្រុមហ៊ុន Chevron បាននិយាយនៅក្នុងសេចក្តីថ្លែងការណ៍យ៉ាងដូច្នេះថា “យើងបានស្រង់សាកសពមិត្តរួមការងាររបស់យើងដែលរងរបួសយ៉ាងធ្ងន់ធ្ងរកាលពីថ្ងៃទី ១៣ ខែមីនា ហើយយើងក៏កំពុងរៀបចំប្រគល់សាកសពទៅឱ្យគ្រួសារជនរងគ្រោះផងដែរ” ។
យ៉ាងណាមិញ ក្រុមហ៊ុន Chevron ក៏បានធ្វើការបញ្ជាក់យ៉ាងច្បាស់ នៅក្នុងសេចក្តីថ្លែងការណ៍នោះផងដែរថា ឧបទ្ទវហេតុនេះ គឺមិនបានធ្វើឱ្យមានផលប៉ះពាល់ទៅដល់បរិស្ថាននោះឡើយ ។
ទន្ទឹមនឹងនេះ ក្រុមហ៊ុនថាមពលរបស់សហរដ្ឋអាមេរិកមួយនេះ បាននិយាយទៀតថា ” ការផ្តោតអារម្មណ៍របស់យើងនាពេលបច្ចុប្បន្ននេះ គឺធ្វើការឆ្លើយតបទៅនឹងឧបទ្ទវហេតុនេះ ដូច្នេះយើងមិនអាចធ្វើការចាប់ផ្តើមផលិតកម្មរបស់យើងឡើងវិញ នៅឡើយនោះទេ ” ។
សូមជម្រាបផងដែរថា យោងតាមទិន្នន័យដែលទទួលបានពីរដ្ឋាភិបាលថៃ បានបង្ហាញឱ្យដឹងថា អណ្តូងប្រេង Benchamas អាចមានសមត្ថភាពផលិតបានប្រហែល ១៣ ០០០ បារ៉ែល ក្នុងមួយថ្ងៃ និងឧស្ម័នធម្មជាតិបានប្រហែល ៤៥លានហ្វីតគូប ៕
អត្ថបទដោយ៖ ឌឿក ស្រីនុត
