បើសិនជាលោកអ្នកកំពុងមានបញ្ហាអត្តសញ្ញាណប័ណ្ណ មានខុសជាអក្សរឡាតាំង ហើយមិនដឹងត្រូវធ្វើបែបណា ពេលនេះអ្នកអាចដឹងកាន់តែច្បាស់ ហើយក៏ដឹងដំណោះស្រាយគួរធ្វើបែបណាដែរចាប់ពីពេលនេះ។
បើយោងតាមការចែករំលែកឱ្យដឹងរបស់ ឧត្តមសេនីយ៍ឯក សាយ ម៉េងឈាង អគ្គនាយករង និងជាអ្នកនាំពាក្យ របស់អគ្គនាយកដ្ឋានអត្តសញ្ញាណកម្ម បានបង្ហាញនូវដំណោះស្រាយទាក់ទងនឹងបញ្ហាការកែតម្រូវអក្សរឡាតាំងក្នុងអត្តសញ្ញាណប័ណ្ណសញ្ជាតិខ្មែរយ៉ាងដូច្នេះថា៖
«ករណីខុសអក្សរឡាតាំង ក្នុងអត្តសញ្ញាណប័ណ្ណសញ្ជាតិខ្មែរ លោកអ្នកត្រូវពិនិត្យមើលលើសេចក្តីចម្លងសំបុត្រកំណើតជាមុនសិន បើមានអក្សរឡាតាំង ហើយមន្ត្រីបញ្ចូលទិន្នន័យខុស ត្រូវយកទៅស្នើសុំប្តូរ ដោយភ្ជាប់ឯកសារយោងនោះ។
តែករណីសំបុត្រកំណើតអត់មានអក្សរឡាតាំង លោកអ្នកត្រូវទៅដាក់ពាក្យសុំបញ្ចូលអក្សរឡាតាំងក្នុងសំបុត្រកំណើតសិននៅសាលាក្រុង ស្រុក ខណ្ឌដែលចុះបញ្ជី ឬនៅនាយកដ្ឋានអត្រានុកូលដ្ឋានដោយភ្ជាប់ជាមួយឯកសារយោងដែលមានអក្សរឡាតាំង ដូចជា សញ្ញាបត្រ ឬ កាតនិស្សិត ។ល។ ក្រោយទទួលបានសេចក្តីសម្រេច និងសេចក្តីចម្លងសំបុត្រកំណើតត្រឹមត្រូវរួច ទើបទៅដាក់ពាក្យសុំកែតម្រូវអត្តសញ្ញាណប័ណ្ណសញ្ជាតិខ្មែរតាមក្រោយ»។
បន្ថែមពីនោះ លោកក៏បានណែនាំឱ្យមហាជន អាចធ្វើការទាញយកកម្មវិធី GDI eServices នៅលើ App Store ឬ Google Playដើម្បីមើល ឬសាកសួរព័ត៌មានតាមលេខទំនាក់ទំនង ១២៧១ / ០១៧ ៨៩៨ ៩១៥ រៀងរាល់ថ្ងៃច័ន្ទដល់សុក្រ ក្នុងម៉ោងធ្វើការ ព្រោះមន្ត្រីជំនាញរង់ចាំទទួល ផ្តល់ព័ត៌មាន និងដោះស្រាយជូនលោកអ្នកជានិច្ច៕
