កម្ពុជាដែនដីដែលគ្រប់គ្នាហៅថាសុវណ្ណភូមិ ក្រៅពីមានវប្បធម៌ដ៏ចំណាស់ ប្រាសាទអង្គរវត្តដែលធំជាងគេលើលោក និងប្រជាជនមាន IQ ខ្ពស់វ៉ាដាច់ប្រទេសនៅក្នុងអាស៊ានកាលពីឆ្នាំ២០២២ផងនោះ កម្ពុជាក៏មានព្រឹត្តិការណ៍ធំៗ៣ ប្រចាំឆ្នាំ២០២៣ ធ្វើឱ្យកម្ពុជាស្មើមុខស្មើមាត់លើឆាកអន្តរជាតិដែលកូនខ្មែរគួរចងចាំ៖
១. ព្រឹត្តិការណ៍ថ្ងៃរះចំកំពូលប្រាសាទអង្គរវត្ត ចំថ្ងៃសុំភ្លើងអគ្គិជ័យកីឡាពីព្រះអាទិត្យ
ព្រះរាជពិធីសុំភ្លើងអគ្គិជ័យកីឡាពីព្រះអាទិត្យនៅមុខប្រាសាទអង្គរវត្ត ដែលប្រារព្ធឡើងនៅថ្ងៃទី២១ខែមីនា ពោលចំថ្ងៃសមរាត្រីដែលជា«បាតុភូតធម្មជាតិព្រះអាទិត្យរះចំកណ្តាលកំពូលប្រាសាទអង្គរវត្ត» ឬហៅថា EQUINOX ដែលបានកើតឡើងចន្លោះថ្ងៃទី ២១-២២ឬ២៣ ខែមីនា ឆ្នាំ២០២៣ជាទស្សនីយភាពដ៏ពិសេសមួយសម្រាប់ភ្ញៀវទេសចរជាតិនិងអន្តរជាតិបានចូលរួមទស្សនាភ្លូកទឹកភ្លូកដី នៃព្រឹត្តិការណ៍ដ៏អស្ចារ្យនេះ ដែលជាផ្នែកមួយនៃយុទ្ធនាការ «ឆ្នាំទស្សនាកម្ពុជា ២០២៣» ក្រោមពាក្យស្លោក «គ្រប់ថ្ងៃគឺជាអច្ឆរិយភាព»។
បាតុភូតធម្មជាតិនេះមានរយៈពេល២ដងប៉ុណ្ណោះក្នុង១ឆ្នាំ គឺនៅខែមីនានិងខែកញ្ញាម្តងទៀត ដែលមហាជនទទួលស្គាល់ថាព្រឹត្តិការណ៍ដ៏អស្ចារ្យនេះគឺជាការគន់គូរសាងសង់ស្ថាបត្យកម្មអង្គរវត្ត របស់ដូនតាខ្មែរយ៉ាងល្អិតល្អន់បំផុតជាមួយធម្មជាតិនិងតារាសាស្រ្ត។
២. កម្ពុជាជាម្ចាស់ផ្ទះកីឡាស៊ីហ្គេមនិងអាស៊ានប៉ារ៉ាហ្គេមលើកដំបូងបំផុត
ក្នុងឆ្នាំ២០២៣នេះកម្ពុជាបានទទួលសិទ្ធិរៀបចំខ្លួនធ្វើជាម្ចាស់ផ្ទះស៊ីហ្គេមលើកទី៣២ ជាលើកដំបូងបំផុត ក្រោយបរាជ័យក្នុងការរៀបចំខ្លួនចំនួន២លើក។ ក្នុងនោះប្រទេសទាំង១១ក្នុងតំបន់អាស៊ីអាគ្នេយ៍នឹងត្រូវប្រកួតប្រជែងគ្នាលើ ៣៨ប្រភេទកីឡា ចាប់ពីថ្ងៃទី៨-១៧ ខែឧសភា ឆ្នាំ២០២៣នៅកីឡដ្ឋានជាតិមរតកតេជោ។
ចំណែកឯកីឡាអាស៊ានប៉ារ៉ាហ្គេម ប្រកួតកីឡាជនពិការលើកទី១២ នឹងប្រព្រឹត្តទៅចាប់ផ្ដើមពីថ្ងៃទី ៣-៩ ខែមិថុនា ឆ្នាំ២០២៣ ក្រោយខាកខានមិនបានប្រកួតនៅប្រទេសជាសមាជិកចំនួន២លើកជាប់គ្នា។ យ៉ាងណាមិញគិតត្រឹមថ្ងៃនេះនៅសល់តែ៤២ថ្ងៃទៀតប៉ុណ្ណោះ ដំណើរឆ្ពោះទៅព្រឹត្តិការណ៍ស៊ីហ្គេម និង អាស៊ានប៉ារ៉ាហ្គេមនឹងប្រារព្ធឡើង ខណៈការដង្ហែភ្លើងអគ្គិជ័យកីឡា នៅប្រទេសជាសមាជិកប្រកួតស៊ីហ្គេមកំពុងដំណើរការ ក្រោយហែចេញពីកម្ពុជាកាលពីថ្ងៃ២២មីនា កន្លងទៅ។
៣. កម្ពុជាឈ្នះពានរង្វាន់ទេសចរណ៍ លេខ១ នៅអាស៊ី
យោងតាមការចេញផ្សាយដោយក្រសួងទេសចរណ៍បានឱ្យដឹងថា កម្ពុជាទើបទទួលបានពានរង្វាន់ជ័យលាភី «យុទ្ធនាការទីផ្សារទេសចរណ៍អន្តរជាតិឈានមុខគេឆ្នាំ២០២២» ពីកម្មវិធីពានរង្វាន់ទេសចរណ៍ និងបដិសណ្ឋារកិច្ចអាស៊ី (Asian Tourism and Hospitality Awards) របស់សមាគម AHHRA នៃប្រទេសម៉ាឡេស៊ីដែលបានធ្វើឡើងនាថ្ងៃទី១៧ ខែមីនា ឆ្នាំ២០២៣។
ពានរង្វាន់នេះគឺជាការបោះឆ្នោតតាមប្រព័ន្ធឌីជីថលពីសាធារណជន៤៧,៥១៥នាក់ ទទួលបាន៥៤,៨៥០ពិន្ទុ មានបេក្ខភាពចូលរួមជាង២០០នាក់ មកពី២៣ប្រទេសជុំវិញពិភពលោក ចែកជាប្រភេទផ្សេងៗរួមមាន ក្រុមប្រឹក្សាទេសចរណ៍ សណ្ឋាគារ រមណីយដ្ឋាន ភោជនីយដ្ឋាន ក្រុមហ៊ុនបច្ចេកវិទ្យា និងអ្នកដឹកនាំដែលចូលរួមយ៉ាងសកម្មក្នុងឧស្សាហកម្មទេសចរណ៍។
នេះជាលើកទី១ ដែលសមាគម AHHRA សហការជាមួយក្រុមហ៊ុន TIN Media ក្នុងការរៀបចំកម្មវិធីពានរង្វាន់ទេសចរណ៍ និងបដិសណ្ឋារកិច្ចអាស៊ី ដើម្បីប្រគល់ពានរង្វាន់ដល់ប្រទេសជ័យលាភី ក្នុងនោះមានប្រទេសកម្ពុជា តង់សានី ប៊ុលហ្ការី ឥណ្ឌា ហ្វីលីពីន និងម៉ាឡេស៊ី ទទួលដោយផ្ទាល់ ខណៈប្រទេសផ្សេងទៀតបានទទួលពានរង្វាន់តាមអនឡាញ៕
អត្ថបទដោយ៖ ពីង ជូអេង
