BROWN ដែលជាយីហោកាហ្វេដ៏ល្បីបំផុតមួយនៅកម្ពុជាបង្កើតកូនខ្មែរបានសម្រេចគម្រោងក្នុងក្ដីស្រមៃរបស់ខ្លួនគឺបើកសាខាហាងកាហ្វេប្រោននៅក្នុងផ្ទះលោកតា វណ្ណ ម៉ូលីវណ្ណដែលផ្ដល់ឱកាសឲ្យសាធារណជនទូទៅអាចចូលទស្សនានិងសិក្សាពីស្នាដៃស្ថាបត្យកម្មដ៏ល្អឯករបស់លោកតា វណ្ណ ម៉ូលីវណ្ណ។

 លោក កាំង ហុក ដែលជាសហស្ថាបនិកកាហ្វេ BROWN បានឲ្យដឹងថាគម្រោងបើកសាខាកាហ្វេប្រោនក្នុងផ្ទះលោកតា វណ្ណ ម៉ូលីវណ្ណគឺជាគម្រោងដោយស្ថិតនៅក្នុងក្ដីស្រមៃរបស់BROWN ជាយូរហើយ។

លោកបានបន្តទៀតថាមុនឈានដល់ការបើកហាងកាហ្វេនៅផ្ទះនេះ លោកបានមកទស្សនាផ្ទះនេះនៅអំឡុងឆ្នាំ២០០៨ហើយបានជួបលោកតាវណ្ណ ម៉ូលីវណ្ណ ដែលធ្វើឲ្យលោកមានអារម្មណ៍កើតស្ញប់ស្ញែងនូវស្នាដៃស្ថាបត្យកម្មរបស់លោកតាជាខ្លាំង។  ហើយជំនួបនេះធ្វើឲ្យលោកចាប់ផ្ដើមស្រលាញ់ស្ថាបត្យកម្មទំនើបរបស់ខ្មែរយើង ហើយក៏ចាប់ផ្ដើមសិក្សាឲ្យបានស៊ីជម្រៅទៅលើការងារស្ថាបត្យកម្មរបស់លោកតា។

បន្ទាប់មកពីឆ្នាំ២០០៨ដល់២០២២ជារឿយៗលោកតែងតែជិះកាត់ផ្ទះនេះ ហើយឃើញការកែប្រែ ឃើញការផ្លាស់ប្ដូរនូវផ្ទះនេះជាច្រើនលើកច្រើនសារ។ ក្នុងពេលនោះក្ដីស្រមៃរបស់លោកគឺថាបើមានឱកាសមួយល្អនោះគឺចង់ធ្វើម៉េចអភិរក្សផ្ទះ ជួសជុលផ្ទះនេះឲ្យបានគង់វង្សព្រោះវាជាបេតិកភណ្ឌស្ថាបត្យកម្មមួយដ៏ល្អនិងជាគម្រូរបស់ស្ថាបត្យកម្មខ្មែរយើង។

លោកបានបន្តទៀតថាឱកាសបានមកដល់ពេលដែលលោកបានជួបនឹងកូនប្រុសរបស់លោកតាវណ្ណ ម៉ូលីវណ្ណនៅក្នុងផ្ទះនេះតែម្ដងហើយក៏បានអញ្ជើញលោក លីវ ឈួងដែលជាសហស្ថាបនិកប្រោនបង្ហាញពីគម្រោងមួយក៏ពិសេសគឺ អភិរក្ស ជួសជុលផ្ទះនេះឲ្យបានល្អ បន្ទាប់មកអាចផ្លាស់ប្ដូរខ្លះៗនៃមុខងាររបស់ផ្ទះនេះដើម្បីប្រជាជនខ្មែរអាចមកទស្សនាផ្ទះនេះបាន។

បន្ទាប់ពីជួបកូនប្រុសលោកតា វណ្ណ ម៉ូលីវណ្ណច្រើនដង លោកក៏បានទទួលផ្ទះនេះមកអភិរក្ស ជួសជុលឲ្យក្លាយទៅជាហាងកាហ្វេប្រោន ដោយរក្សានូវទ្រង់ទ្រងដើមទាំងស្រុង គ្មានLogo របស់ប្រោនដាក់លើអគារលោកតាឡើយ ដោយដាក់នៅខាងក្រៅ ដូច្នេះអគារនេះគេមើលមកពីមិនមែនជាហាងកាហ្វេនោះគឺជាផ្ទះទាំងស្រុងតែម្ដង។

ត្រង់នេះលោកបានសង្កត់ធ្ងន់ថាគម្រោងកែប្រែផ្ទះលោកតា វណ្ណ ម៉ូលីវណ្ណទៅជាសាខារបស់ប្រោនគឺលោកធ្វើឡើងដោយការគោរពនិងការស្រលាញ់ ដូច្នេះក្នុងនាមលោកជាស្ថាបត្យករ លោកមិនបានបញ្ចេញស្នាដៃនូវការរចនានៅក្នុងផ្ទះដែលធ្វើឲ្យប៉ះពាល់អវិជ្ជមានណាមួយទៅលើអគារនេះដែលជាស្នាដៃលោកតាឡើយ។

លោក កាំង ហុកបានលើកឡើងថាចំពោះលោកផ្ទាល់ពិតជាមានអារម្មណ៍ក្ដុកក្ដួលដែលប្រោនសម្រេចក្ដីស្រមៃបើកសាខាក្នុងផ្ទះលោកតា វណ្ណ ម៉ូលីវណ្ណព្រោះផ្ទះនេះស្អាតខ្លាំងណាស់ហើយវាជានិមិត្តរូបមួយដ៏ល្អដែលឆ្លុះបញ្ចាំងទៅលើស្ថាបត្យកម្មជំនាន់ថ្មីរបស់ខ្មែរ។

ជាចុងក្រោយលោក កាំង ហុកបានបង្ហើបថាគម្រោងដែលសម្រេចបាននូវការបើកហាងកាហ្វេប្រោននៅក្នុងផ្ទះលោកតា វណ្ណ ម៉ូលីវណ្ណគឺជាឱកាសមួយសម្រាប់ស្ថាបត្យករក្នុងស្រុកទាំងអស់បានមកមើល ស្រូបយកនូវកម្លាំងចិត្តពីផ្ទះនេះហើយអាចធ្វើគម្រោងណាមួយដែលលេចធ្លោទៅមុខទៀតហើយជាការងារដ៏ល្អមែនទែនដែលស្ថាបត្យករអាចសិក្សាពីស្នាដៃស្ថាបត្យកម្មរបស់លោកតា វណ្ណ ម៉ូលីវណ្ណ។

គួរបញ្ជាក់ផងដែរថា សាខាកាហ្វេប្រោននៅក្នុងផ្ទះលោកតា វណ្ណ ម៉ូលីវណ្ណបើកជាផ្លូវការនៅថ្ងៃទី៥ខែមេសាឆ្នាំ២០២៥នេះ ដោយមានទីតាំងស្ថិតលើបណ្ដោយមហាវិថីម៉ៅសេទុង ក្បែរស្ថានទូតចិន រាជធានីភ្នំពេញ៕