គេថាស្រ្តីវិលចង្រ្កាន​មិនជុំ មិនបាច់រៀនខ្ពស់ពេកទេ ព្រោះអនាគតនឹងត្រូវមានស្វាមីចិញ្ចឹមហើយ នៅថែផ្ទះសម្បែងមើលតែកូនទៅគ្រប់គ្រាន់ហើយ។ ជាក់ស្តែងងាកមកមើលស្រ្តីខ្មែរ​រូបនេះវិញ ចេញរកស៊ីដំបូងប្រើដើមទុនត្រឹម៣ពាន់$ លើមុខរបរសម្រស់ ​ដោយប្រើរយៈពេលត្រឹម៣ឆ្នាំអាចបង្កើតប្រេនធំ១នៅអាមេរិក បានផ្តាំហេតុផលធំ៥ជួយឱ្យស្រ្តីជោគជ័យក្នុងមុខជំនួញ។

ថ្លែងក្នុងបទសម្ភាសន៍ជាមួយកាសែតអាមេរិក​​​​ Medium អ្នកស្រី គា ច័ន្ទនិមល ស្ថាបនិកផលិតផលថែរក្សាសម្រស់​​ BESOMA គឺជាសហគ្រិនស្រ្តីខ្មែរ-អាមេរិក បានបង្ហើបថា “ធំឡើងនៅស្រុកខ្មែរខ្ញុំឃើញប្រជាជន ប្រើប្រាស់ផលិតផលសម្រស់ដែលប៉ះពាល់សុខភាព ព្រោះកាលណោះ​ចំណេះដឹងអំពី SkinCare គឺនៅមានកម្រិត ដូច្នេះហើយខ្ញុំត្រូវតែរកដំណោះស្រាយ ដោយការស្វែងរកផលិតផលល្អៗ ហេតុនេះនៅឆ្នាំ២០១៦ ក្រោយពីរៀនចប់និងរស់នៅអាមេរិកបានរយៈពេល២ឆ្នាំ ខ្ញុំក៏បានចាប់ផ្តើមធ្វើជាអ្នកប្រឹក្សាអំពីសម្រស់បន្ទាប់ពីខ្ញុំ​បានរៀននិងស្រាវជ្រាវពីអំពីវាទាំងយប់ទាំងថ្ងៃ ហើយខ្ញុំក៏បានចាប់ផ្តើមលក់ផលិតផលរបស់អាមេរិកជាមួយដើមទុន៣ពាន់$ បន្ទាប់ពីនោះការលក់ដូរក៏កាន់តែរីកចម្រើនទៅមុខ ខ្ញុំក៏បានចាប់ផ្តើម BESOMA ឡើងនឹងមានការទទួលស្គាល់ពីជំនាញនៅអាមេរិក ត្រឹមរយៈពេល៣ឆ្នាំ ពោលពីឆ្នាំ២០១៩ ដល់ឆ្នាំ២០២១”។

យ៉ាងណាមិញនៅក្នុងបទសម្ភាសន៍ដដែលនោះ អ្នកស្រី និមល បានផ្តាំថាមនុស្សស្រីត្រូវមានកត្តារួមផ្សំ៥យ៉ាងដើម្បីជាស្ពានចម្លងនាំខ្លួនឯងឆ្ពោះទៅរកភាពជោគជ័យ៖

១. ជឿជាក់​លើ​ខ្លួន​ឯង  

កុំ​ទុក​ឱ្យ​ខ្លួន​ឯងឱ្យនៅ​សង្ស័យ ឬមានថាមពលអវិជ្ជមានណាមួយឱ្យអ្នកបោះ​បង់​ ​នៅពេល​ស្ថានភាព​លំបាក ព្រោះជួនកាលអាជីវកម្មអាចមានភាពយឺតយ៉ាវខ្លះ ហើយវាអាចធ្វើឱ្យអ្នកអស់សង្ឃឹមនៅ អ្វីដែលអ្នកកំពុងធ្វើ ហើយពេលខ្លះចង់បោះបង់។ ផ្ទុយទៅវិញចូរបន្តរុញខ្លួនឯងទៅមុខឱ្យខ្លាំង ហើយបន្តធ្វើវាម្តងហើយម្តងទៀតព្រោះជីវិតគឺពិបាក ហើយអាជីវកម្មក៏ដូចគ្នាដែរ តែអ្នកត្រូវតែជឿជាក់លើខ្លួនឯង ទោះមានរឿងអ្វីកើតឡើងក៏ដោយ។

២. មានគោលដៅច្បាស់លាស់

គោលបំណងច្បាស់លាស់ ហើយស្វែងយល់ឱ្យស៊ីជម្រៅអំពីមូលហេតុដែលយើងត្រូវធ្វើវា ហើយកុំចាត់ទុកលុយជាប្រភពនៃការលើកទឹកចិត្តតែមួយមុខគត់ អ្វីដែលសំខាន់គឺត្រូវដឹងថាហេតុអ្វីបានជាអ្នកកំពុងធ្វើអ្វីដែលអ្នកកំពុងធ្វើនេះ បើមិនដូច្នេះទេនៅថ្ងៃដែលលំបាកអ្នកនឹងបោះបង់។

៣. ស្តាប់បេះដូងអតិថិជនជានិច្ច

នៅពេលទទួលការរិះគន់វាអាចនឹងពិបាកក្នុងការទទួលយក ប៉ុន្តែប្រសិនបើវាជាការស្ថាបនា នោះវាពិតជាសំខាន់ណាស់ក្នុងការស្តាប់បេះដូងអ្នកដទៃ ហើយត្រូវធ្វើអ្វីមួយដើម្បីវា ដូច្នេះអតិថិជនអាចឃើញការកែលម្អរបស់អ្នក។ លើសពីនេះពួកគេនឹងកាន់តែមានភាពស្មោះត្រង់ចំពោះផលិតផលរបស់អ្នក បន្ទាប់ពីពួកគេឃើញការផ្លាស់ប្តូរដែលអ្នកបានធ្វើ។

៤. អត់ធ្មត់

ថ្ងៃខ្លះពិបាក ហើយប្រសិនបើអ្នកមិនដឹងពីរបៀបតបតនឹងវា អ្នកប្រហែលជាមិនអាចរួចផុតពីសមរភូមិនោះទេ អ្នក​ត្រូវ​មាន​ចិត្ត​គំនិត​រឹងមាំ​មិន​បោះបង់​ពេល​ជួប​ឧបសគ្គនិងពុះពារឱ្យបានដល់លទ្ធផលចុងក្រោយដែលអ្នកចង់សម្រេចបាន។

៥.ផ្តោតលើលទ្ធផល

វាពិតជាងាយស្រួលណាស់សម្រាប់ភាពបរាជ័យ ដែលមករារាំងការងារអ្នក ប៉ុន្តែប្រសិនបើអ្នកបន្តផ្តោតលើលទ្ធផលតែ១គត់ វានឹងអាចនាំអ្នកឱ្យ មករកផ្លូវត្រូវ ហើយបន្តផ្តោតលើការសម្រេចគោលដៅចុងក្រោយបំផុតរបស់អ្នក។

គួរជម្រាបផងដែរថា អ្នកស្រី គា ចាន់និមល គឺស្ថាបនិកផលិត BESOMA ដែលជាផលិតផលថែរក្សាសម្រស់បង្កេីតឡេីងដោយកូនខ្មែរ​ សហការ​ជាមួយ​ក្រុមអ្នកជំនាញ​នៅសហរដ្ឋ​អាមេរិក​ និងមានក្រុមហ៊ុនចែកចាយនៅស្រុកខ្មែរផងដែរ៕

អត្ថបទដោយ៖ ពីង ជូអេង