កាលពីពេលថ្មីៗនេះ ក្រុមហ៊ុនសម្លៀកបំពាក់ដ៏ល្បីល្បាញ Zara ទើបតែជះលុយប្រមាណជាង២៥៤លានដុល្លារអាមេរិកដើម្បីទិញអគារដ៏ធំស្កឹមស្កៃនៅទីក្រុង ក្លូស្កូប្រទេសស្កុតឡែន នេះបើយោងតាមការចេញផ្សាយដោយសារព័ត៌មាន Bloomberg។ Zara ជាប្រេនលំដាប់ថ្នាក់ពិភពលោកមួយដែលមានដើមកំណើតក្នុងឆ្នាំ១៩៧៥ នៅប្រទេសអេស្ប៉ាញដែលមានលោក AmanicoOrtegaជាស្ថាបនិក។ ដោយឡែកលោកត្រូវបានគេចាត់ទុកថាជាមហាសេដ្ឋីលេខ១មួយរូបនៅប្រទេសអេស្ប៉ាញ ដែលមានទ្រព្យសម្បត្តិច្រើនជាងគេក្នុងប្រទេសប្រមាណជាង៥៦.៤ពាន់លានដុល្លារគិតត្រឹមឆ្នាំ២០២២នេះ។
យ៉ាងណាមិញ តើមុនពេលដែលអាចកសាងយីហោZara ឱ្យមានភាពល្បីល្បាញ ត្រូវត្រូវគេស្គាល់ថាជាប្រេនសម្លៀកបំពាក់សម្ភារៈហ្វេសសិនផ្សេងៗដ៏ប្រណិតមួយក្នុងចំណោមប្រេនប្រណិតៗផ្សេងទៀតនៅជុំវិញពិភពលោក តើលោក AmanicoOrtega មានប្រវត្តិតស៊ូយ៉ាងណាខ្លះទៅ?
លោក AmanicoOrtega កើតនៅថ្ងៃទី២៨ ខែមីនា ឆ្នាំ១៩៣៦ ដោយបច្ចុប្បន្ននេះលោកមានអាយុ៨៦ឆ្នាំហើយលោកកើតនិងធំធាត់ឡើងនៅក្នុងទីក្រុងតូចមួយនាប្រទេសអេស្ប៉ាញ និងមានបងប្អូន៤នាក់ដោយមានម្តាយជាស្រ្តីបម្រើ និងឪពុកជាកម្មករសាងសង់ផ្លូវប៉ុណ្ណោះ។ការសិក្សាអប់រំរបស់លោកក៏មិនបានខ្ពង់ខ្ពស់អ្វីនោះដែរព្រោះតែជីវភាពគ្រួសារក្រីក្រខ្លាំងពេកដែរ ពោលគឺក្នុងវ័យ១៣ឆ្នាំលោកបានឈប់រៀនដើម្បីបម្រើការងារឱ្យ កន្លែងផលិតសម្លៀកបំពាក់បុរសមួយកន្លែង ដោយធ្វើជាអ្នកដឹកជញ្ចូនសម្លៀកបំពាក់ឱ្យហាងនោះ។
តាមរយៈការធ្វើការងារក្នុងវិស័យសម្លៀកបំពាក់ បានធ្វើឱ្យលោកអាចរកឃើញអ្វីដែលលោកស្រលាញ់ និងអាចយល់ដឹងច្រើនពីវិស័យដែលខ្លួនធ្វើ រហូតអាចចេញមកចាប់ផ្ដើមអាជីវកម្មក្នុងវិស័យសម្លៀកបំពាក់ រហូតល្បីល្បាញដូចបច្ចុប្បន្ន។ បើទោះបីជាការអប់រំរបស់លោកមិនបានខ្ពស់ក៏ពិតមែន ប៉ុន្តែលោកបានជោគជ័យក្នុងជំនួញរបស់លោកជាខ្លាំងទោះលោកទើបតែចាប់ផ្តើមនៅអាយុ៣៧ឆ្នាំហើយក្តី។ ការដឹកនាំនៅក្នុងអាជីវកម្មរបស់លោកគឺសាមញ្ញណាស់ គឺលោកមិនសូវជាចំណាយទុនលើការផ្សព្វផ្សាយពាណិជ្ជកម្មនោះទេដោយគិតតែផ្តោតទៅលើគុណភាពផលិតផលតែមួយគត់។ ពាណិជ្ជកររូបនេះជាមនុស្សសាមញ្ញណាស់ គឺភាគច្រើនលោកតែងតែទទួលទានអាហារថ្ងៃត្រង់នៅអូហ្វីស ជាមួយបុគ្គលិករបស់លោកជានិច្ច។ រឿងមួយដែលកាន់តែពិសេសគឺលោកតែងតែពាក់អាវគំរូតែមួយដូចៗគ្នាជារៀងរាល់ថ្ងៃ ដូចទៅនឹងលោកមហាសេដ្ឋីហ្វេកប៊ុក Mark Zuckerberg ដែរ ដើម្បីជានិមិត្តសញ្ញានៃប្រេនរបស់លោក និងការសន្សំសំចៃពេលវេលា។
គួរបញ្ចាក់ផងដែរថាពាណិជ្ជកររូបនេះក៏ធ្លាប់ជាប់ឈ្មោះជាមហាសេដ្ឋីលេខ១ មានទ្រព្យច្រើនជាងគេបំផុតចំនួន ១ថ្ងៃ ដោយវ៉ាដាច់សេដ្ឋី Bill Gate ឱ្យធ្លាក់មកលំដាប់លេខរៀងទី២ក្នុងឆ្នាំ២០១៦។
មេរៀនជីវិតរបស់អ្នកជំនួញរូបនេះបានបង្កប់គំនិតអប់រំដូច្នេះថា៖
១.ការដែលផ្តោតលើជំនាញអ្វីដែលពិតប្រាកដមួយពិតជាឱ្យយើងស្គាល់គោលដៅខ្លួនឯងច្បាស់
២.សាលារៀនជាថ្នាលអប់រំ ការងារជាតថភាពពិតនៃភាពជោគជ័យ
៣.អាយុគ្រាន់តែជាតួលេខប៉ុណ្ណោះ
៤. ចាប់ផ្ដើមរកអ្វីដែលខ្លួនស្រលាញ់ឱ្យបានកាន់តែលឿន និងផ្ដោតលើវាឱ្យបានខ្លាំង រហូតមានភាពលេចធ្លោខ្លាំងបំផុត៕
អត្ថបទដោយ ពីង ជូអេង
