ក្រោយមេធំ Alibaba លោក Jack Ma បានលេចមុខត្រឡប់មកវិញនឹងរៀបចំក្រុមហ៊ុន Alibaba ឡើងវិញដោយបានផ្លាស់ប្តូរអ្នកកាន់ក្បាលម៉ាស៊ីនថ្មីគឺលោក Eddie Wu ក្នុងនាមជានាយកប្រតិបត្តិថ្មីនៅថ្ងៃទី១០ ខែកញ្ញា នេះ។
អង្គុយលើកៅអីបាន៣ថ្ងៃក្នុងនាមជា CEOថ្មី មិនទាន់បានក្តៅគូទផងឈាមថ្មីរូបនេះ បានធ្វើការនិយាយ ទៅកាន់បុគ្គលិកនៅក្នុងក្រុមហ៊ុន Alibaba ទាំងមូលថា ក្រុមហ៊ុននឹងបាត់មុខពីពិភពគុន ប្រសិនបើមិនដើរឱ្យទាន់សម័យកាលពិភពលោកក្នុងការប្រើប្រាស់បច្ចេកវិទ្យា AI ដោយផ្តល់នូវបទពិសោធន៍ដល់អ្នកប្រើប្រាស់, ដាក់ចេញនូវយុទ្ធសាស្រ្ត និងបង្កើតវេទិកាថ្មីដែលដើរដោយបច្ចេកវិទ្យា AI ដល់អតិថិជនដែលប្រើប្រាស់។ នេះបើយោងតាមការចុះផ្សាយពីសារព័ត៌មាន CNBC។
នៅក្នុងសារមួយដែលCEO វ័យក្មេងរូបនេះបានផ្ញើទៅកាន់បុគ្គលិកក្នុងនៅក្នុងប្រទេសចិនកាលពីថ្ងៃអង្គារថា “ពេលវេលាកំពុងផ្លាស់ប្តូរ ដូច្នេះ Alibaba ត្រូវតែផ្លាស់ប្តូរ! នៅពេលដែលពិភពលោករីកចម្រើន Alibaba ត្រូវតែវិវឌ្ឍន៍លឿនជាងមុន!” ។
បន្ថែមពីនោះលោក Wu បាននិយាយថា ”អាជីវកម្មរបស់យើងនីមួយៗបង្កើតករណីសម្រាប់ប្រើប្រាស់យ៉ាងច្រើន ដូច្នេះយើងត្រូវបំប្លែងករណីប្រើប្រាស់ទាំងនេះទៅជាកម្មវិធីសម្រាប់បច្ចេកវិទ្យា AI ដោយជំរុញឱ្យមានការចែករំលែក បទពិសោធន៍របស់អ្នកប្រើប្រាស់ផ្ទាល់ និងគំរូអាជីវកម្មតាមរយៈការច្នៃប្រឌិតនៃបច្ចេកវិទ្យាថ្មី"។
លោកបានសង្កត់ធ្ងន់ថាប្រសិនបើយើងមិនតាមដានការផ្លាស់ប្តូរនៃយុគសម័យ AI នោះទេ យើងនឹងត្រូវផ្លាស់ប្តូរទីលំនៅហើយយើង ចាំបាច់ត្រូវបន្តវិនិយោគនៅក្នុង ”សកលភាវូបនីយកម្ម”។
យ៉ាងណាមិញក្រុមហ៊ុន Alibaba ក៏នឹងសម្លឹងរកការលើកកម្ពស់យុវជនដែលមានទេពកោសល្យវ័យក្មេងហើយ ក្នុងរយៈពេល ៤ ឆ្នាំខាងមុខក្រុមហ៊ុននឹងស្វែងរកមនុស្សដែលកើតក្រោយឆ្នាំ ១៩៨៥ និងទសវត្សរ៍ឆ្នាំ ១៩៩០ ដើម្បីបង្កើតជាក្រុមស្នូលនៃក្រុមដើម្បីគ្រប់គ្រងអាជីវកម្មរបស់ Alibaba ៕
អត្ថបទដោយ៖ ពីង ជូអេង
