ក្រុមហ៊ុនអាកាសចរណ៍ Air Asia គឺជាក្រុមហ៊ុនអាកាសចរណ៍ធំគេរបស់ប្រភេទម៉ាឡេស៊ី ក្រុមហ៊ុននេះមានទីស្នាក់ការធំកណ្តាលនៅជិតទីក្រុង Kuala Lumpur។ក្រៅពីមានទីស្នាក់ការធំនៅប្រទេសកំណើត Air Asia ក៏បានពង្រាយសាខារបស់ខ្លួនទៅកាន់បណ្តាលប្រទេសនៅអាស៊ីផ្សេងៗទៀតផងដែរ រួមមាន ៖ប្រទេសហ្វីលីពីន ប្រទេសថៃ ជាដើម ហើយកាលពីពេលថ្មីៗនេះដែរ មេធំក្រុមហ៊ុន Air Asia មានបំណងចង់ធ្វើការបើកក្រុមហ៊ុនរបស់ខ្លួននៅលើទឹកដីនៃប្រទេសកម្ពុជាយើងផងដែរ។

ជាក់ស្តែង កាលពីថ្ងៃព្រហស្បតិ៍ ទី០៨ ខែធ្នូ ឆ្នាំ២០២២ នៅទីស្តីការក្រសួងទេសចរណ៍ ឯកឧត្តម ជា បូរ៉ា រដ្ឋលេខាធិការតំណាងដ៏ខ្ពង់ខ្ពស់ឯកឧត្តម ថោង ខុន រដ្ឋមន្រ្តីក្រសួងទេសចរណ៍បានទទួលជួប ពិភាក្សា​ការងារជាមួយតំណាងក្រុមហ៊ុនអាកាសចរ Air Asia លើការបង្កើតក្រុមហ៊ុនអាកាសចរ​ Air Asia នៅកម្ពុជា អោយឈ្មោះថា Air Asia Cambodia ដែលនឹងធ្វើពិធីចុះហត្ថលេខា និងប្រកាសជាផ្លូវការនៅថ្ងៃទី ០៩ ខែ ធ្នូឆ្នាំ ២០២២ នេះ។បន្ទាប់ពីចុះហត្ថលេខានិងប្រកាសជាផ្លូវការហើយនោះ កម្ពុជានឹងក្លាយជាប្រទេសទី៥ក្នុងតំបន់អាស៊ី ដែលមានទីស្នាក់ការរបស់ក្រុមហ៊ុន Air Asia។

 គួរបញ្ជាក់ផងដែរថា ក្រុមហ៊ុនគ្រោង Air Asia គ្រោងនឹងចាប់ផ្តើមដំណើរការជើងហោះហើរនៅកម្ពុជាក្នុងឆ្នាំ២០២៣ ខាងមុខនេះ។ ដោយខាងក្រុមហ៊ុនមានគម្រោងទាក់ទាញទេសចរជាតិ និងអន្តរជាតិឱ្យបាន ៣-៤លាននាក់/ឆ្នាំ តាមផែនការនៃក្រុមហ៊ុនរបស់ខ្លួន ដោយជំហានដំបូង គ្រោងដាក់ដំណើរការយន្តហោះចំនួន០៤គ្រឿង ដែលជាប្រភេទ​ Boeing A321 ដោយតភ្ជាប់គោលដៅអន្តរជាតិក្នុងតំបន់អាស៊ាន, ចិន និងឥណ្ឌា និងគោលដៅក្នុងស្រុកពីរាជធានីភ្នំពេញ-សៀមរាប និងភ្នំពេញ-ខេត្តព្រះសីហនុ៕

អត្ថបទដោយ៖សម្បត្តិ សុខឡាង