ធនាគារអភិវឌ្ឍន៍អាស៊ី (ADB) នឹងផ្តល់ឥណទានសម្បទាន និងហិរញ្ញប្បទានឥតសំណងក្នុងទំហំទឹកប្រាក់៤០៣ លានដុល្លារនៅក្នុងប្រទេសកម្ពុជាក្នុងឆ្នាំ២០២៤។ ខណៈកិច្ចព្រមព្រៀងនេះ ត្រូវបានចុះហត្ថលេខាកាលពីថ្ងៃទី១៧ ខែធ្នូ ឆ្នាំ២០២៤ ក្រោមអធិបតីភាពឯកឧត្ដម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Jyotsana Varma នាយក ADB ប្រចាំប្រទេស។
នៅក្នុងសេចក្ដីប្រកាសព័ត៌មានលោកស្រីJyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា បានឱ្យដឹងថា “ឆ្នាំនេះ គឺជាព្រឹត្តិការណ៍ដ៏សំខាន់មួយនៅក្នុងភាពជាដៃគូរបស់យើងជាមួយប្រទេសកម្ពុជា ជាមួយនឹងការអនុម័តឥណទានសម្បទាន និងហិរញ្ញប្បទានឥតសំណងចំនួន ៤០៣ លានដុល្លារ ក្រោមក្របខណ្ឌនៃយុទ្ធសាស្រ្តភាពជាដៃគូប្រទេសថ្មីរបស់យើងសម្រាប់ឆ្នាំ ២០២៤-២០២៨” ។
លោកស្រីបានបន្ថែមថា “ពីការពង្រឹងហេដ្ឋារចនាសម្ព័ន្ធសំខាន់ៗ ដល់ការពង្រឹងភាពធន់នឹងអាកាសធាតុ និងការអភិវឌ្ឍន៍ធនធានមនុស្ស គម្រោងទាំងនេះនឹងគាំទ្រដល់វឌ្ឍនភាពបន្តរបស់កម្ពុជាឆ្ពោះទៅរកអនាគតប្រកបដោយភាពរីកចម្រើនបរិយាបន្ន និងបៃតង”។
លោកស្រីVarma បានមានប្រសាសន៍ថាធនាគារអភិវឌ្ឍន៍អាស៊ី ក៏ប្តេជ្ញាក្នុងការជំរុញបរិយាកាសអំណោយផលសម្រាប់វិស័យឯកជន រួមទាំងការលើកកម្ពស់ពាណិជ្ជកម្ម និងការប្រកួតប្រជែង ជំរុញកំណើនសេដ្ឋកិច្ចប្រកបដោយចីរភាព និងការបង្កើតឱកាសសម្រាប់ទាំងអស់គ្នា៕
