ជារឿងដ៏គួរឲ្យកោតសរសើរមួយ ដែលយុវជន-យុវតីខ្មែរវ័យក្មេងមានទេពកោសល្យ និងសមត្ថភាពគ្រប់គ្រាន់ ឆ្លងកាត់ការបណ្តុះបណ្តាលត្រឹមត្រូវអាចបញ្ជាបក្សីស្លាបដែក ត្រឹមវ័យខ្ទង់២០ឆ្នាំ។ ខាងក្រោមនេះគឺជាទំពាំងកម្ពុជា៣រូប មានសមត្ថភាពក្លាយជាអាកាសយានិកទាំងវ័យក្មេងល្ហក់៖
១/. លោក សេង ស៊ុយហាក់៖ បានទៅសិក្សាជំនាញបើកបរយន្តហោះនៅសហរដ្ឋអាមេរិកចាប់ពីថ្ងៃទី១០ ខែតុលា ឆ្នាំ២០១៩ រហូតដល់ថ្ងៃទី២៥ ខែកញ្ញា ឆ្នាំ២០២០ ហើយក៏បានត្រឡប់មកកម្ពុជា កាលពីថ្ងៃទី ១០ ខែ តុលា ឆ្នាំ២០២០ កន្លងមកនេះ។ យុវជន ស៊ុយហាក់ បានសិក្សាជំនាញបើកយន្តហោះនៅសាលាឈ្មោះថា US Aviation Academy (USAA ) លើទឹកដីសហរដ្ឋអាមេរិក ដែលមានគ្រូជនជាតិអាមេរិក ឥណ្ឌា និងសិង្ហបុរី ខណៈមិត្តរួមថ្នាក់វិញ ក៏មានចម្រុះជាតិសាសន៍ផងដែរ។
២/. កញ្ញា ហុង ចិន្តា៖ ក៏ជាអ្នកបង្កើតប្រវត្តិសាស្រ្តថ្មីមួយសម្រាប់សមត្ថភាពស្រ្តីនៅក្នុងប្រទេសកម្ពុជា នាសតវត្សរ៍ទី២១ នេះផងដែរ។ កញ្ញាបានឆ្លងកាត់ការបណ្តុះបណ្តាលក្នុងប្រទេសវៀតណាម និងបានបន្តការសិក្សាអនុវត្តបើកយន្តហោះផ្ទាល់នៅប្រទេសហ្វីលីពីន រួមទាំងបានរៀនបើកយន្តហោះខ្នាតធំប្រភេទ Airbus នៅកូរ៉េខាងត្បូង ដោយគិតសរុបប្រើពេលអស់៤ឆ្នាំ សម្រាប់ការសិក្សាផ្នែកអាកាសយានិកនេះចាប់តាំងពីឆ្នាំ២០១៦- ២០១៩។ បច្ចុប្បន្នយុវតីវ័យ៣១ឆ្នាំរូបនេះ កំពុងតែបម្រើការងារជាអាកាសយានិកានៅក្រុមហ៊ុនអាកាសចរណ៍ចិនឈ្មោះ Lanmei Airlines ដោយកញ្ញា គឺជាអ្នកបើកយន្តហោះប្រភេទ Airbus 320។
៣/. យុវសិស្ស ផាន់ ឧត្តមបញ្ចឫទ្ធិ៖ ជាសិស្សនៃសាលារៀន អន្តរទ្វីប អាមេរិកាំង និងបានប្រឡងជាប់ជាអ្នកបើកបរយន្តហោះ កាលពីថ្ងៃទី១៩ ខែកុម្ភៈ ឆ្នាំ២០២០ កន្លងទៅដោយត្រូវទៅសិក្សានៅទីក្រុងគេសុន (QUEZON CITY) នៃប្រទេសហ្វីលីពីន។
យ៉ាងណាមិញ លើទឹកដីសុវណ្ណភូមិកម្ពុជាគ្រប់ច្រកល្ហក់រាប់ចាប់តាំងពីភូមិស្រុកដល់ខេត្តក្រុង ពីមួយសម័យកាលទៅមួយសម័យកាល គឺតែងតែមានបង្កប់នូវបុគ្គលឆ្នើម និងបុគ្គលដែលមានស្នាដៃ ចំពោះការកសាងកេរ្តិ៍ឈ្មោះ កិត្តិយស ប្រយោជន៍ ព្រមទាំងមានសមត្ថភាពនិងសក្តានុពលខ្ពស់នៅក្នុងការជួយជ្រោមជ្រែងឲ្យសង្គមជាតិឲ្យរីកចម្រើន ទៅតាមចំណេះ ជំនាញ និងទេពកោសល្យរៀងៗខ្លួនពីមួយជំនាន់ទៅមួយជំនាន់តាំងពីបុរាណកាលរហូតមកទល់សព្វថ្ងៃនេះ៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
