ភ្នំពេញ ថ្ងៃទី ២៧ ខែធ្នូ ឆ្នាំ ២០២៤ — ធនាគារ វីង បានចូលរួមគាំទ្រ “ព្រឹត្តិការណ៍រត់ និងជិះកង់ ២៥០គម តាមបណ្ដោយទន្លេមេគង្គ” របស់មណ្ឌលកុមារផ្ទះក្លារ៉ា ក្នុងគោលបំណងរៃអង្គាសថវិកាសម្រាប់ផ្គត់ផ្គង់ ការថែទាំ និងការអប់រំដល់កុមារដែលងាយរងគ្រោះនៅកម្ពុជា។

លោក ហោ  ប៊ុនថែ អគ្គនាយករងធនាគារ វីង បានមានប្រសាសន៍ថា៖ “យើងខ្ញុំសូមអរគុណដល់មណ្ឌលកុមារផ្ទះក្លារ៉ា ដែលបានធ្វើការលើបុព្វហេតុសង្គមមួយនេះ។” “ការបរិច្ចាគរបស់លោកអ្នក មិនថាចំនួនប៉ុន្មាននោះទេ ប៉ុន្តែវាពិតជាមានអត្ថន័យធំធេងចំពោះកុមារដែលត្រូវការជំនួយ”។

កម្មវិធីនេះប្រព្រឹត្តឡើងចាប់ពីថ្ងៃទី២៣ ដល់ថ្ងៃទី២៨ ខែធ្នូ ឆ្នាំ២០២៤ ដោយមានអ្នកចូលរួមរត់ និងជិះកង់ពីខេត្តក្រចេះ ទៅកាន់ខេត្តកណ្តាល។

លោកស្រី Sandra Rousseau អ្នកសម្របសម្រួលកម្មវិធីនៃមណ្ឌលកុមារផ្ទះក្លារ៉ា បានសម្តែងសេចក្តីអំណរដោយបញ្ជាក់ថា៖​ "យើងខ្ញុំពិតជាអរគុណចំពោះការរួមចំណែកពីដៃគូទាំងអស់ដែលអនុញ្ញាតឱ្យព្រឹត្តិការណ៍នេះអាចប្រព្រឹត្តិទៅបាននៅឆ្នាំនេះ។ ការចូលរួមពីសប្បុរសជនដែលចូលរួមឧបត្ថម្ភទាំងអស់ បានដើរតួនាទីយ៉ាងសំខាន់ក្នុងការជួយដល់ពួកយើងឱ្យសម្រេចបាននូវបេសកកម្មក្នុងការរៃអង្គាសថវិកានេះ ព្រមទាំងពង្រឹងសាមគ្គីភាពតាមរយៈសកម្មភាពកីឡា។ ជាមួយនឹងការគាំទ្ររបស់ដៃគូទាំងអស់ យើងអាចទាក់ទាញចំណាប់អារម្មណ៍ពីមហាជនបានកាន់តែច្រើនមកលើកិច្ចការសប្បុរសធម៌របស់យើង ក្នុងការទទួលបានធនធានបន្ថែម ដើម្បីផ្តល់ការថែទាំកុមារដែលងាយរងគ្រោះដែលស្ថិតនៅមណ្ឌលរបស់យើង ពង្រីកវិសាលភាព និងពង្រឹងកម្មវិធីរបស់យើងឱ្យមានផលវិជ្ជមានយូរអង្វែង ដែលធានាបានថាកុមារកាន់តែច្រើនមានអនាគតល្អភ្លឺស្វាង”។

មណ្ឌលកុមារផ្ទះក្លារ៉ា បានផ្តល់ទីជម្រកប្រកបដោយសុវត្ថិភាព និងចិញ្ចឹមបីបាច់កុមារប្រមាណជា ១៥០ នាក់ ដែលមានស្ថានលំបាក និងខ្វះខាត។ ជាមួយគ្នាផងដែរកុមារចំនួនជាង ៦០ ផ្សេងទៀត ត្រូវបានអ្នកស្រុកទទួលចិញ្ចឹមបីបាច់ថែរក្សា ចំណែកកុមារខ្លះទៀតរស់នៅជាមួយគ្រួសាររបស់ពួកគេនៅក្នុងភូមិក្បែរនោះ។ មណ្ឌលកុមារផ្ទះក្លារ៉ា គឺជាអង្គការក្រៅរដ្ឋាភិបាលបង្កើតឡើងក្នុងគោលបំណងផ្តល់​បរិយាកាស​សុវត្ថិភាព​ដែល​កុមារ​អាច​លូតលាស់ រៀនសូត្រ និង​កសាង​ជីវិត​របស់​ពួកគេ​​ប្រកបដោយ​គុណតម្លៃ និង​ក្តីសង្ឃឹម។

កម្មវិធីនេះបានរៀបចំឡើងជាលើកដំបូងនៅខែធ្នូ ឆ្នាំ ២០២០ ក្នុងអំឡុងពេលនៃការរីករាលដាលនៃជំងឺកូវីដ១៩ ក្រោមការផ្តួចផ្តើមពី កញ្ញា Véronique Messina ដែលជាអ្នករត់ប្រណាំងចម្ងាយឆ្ងាយ​ឆ្លង​កាត់​ឧបសគ្គ​​ (ultra-trailer) និងជាអ្នកទេសចរ ដែលស្នាក់អាស្រ័យនៅប្រទេសកម្ពុជា។ កម្មវិធីនេះបានរួមបញ្ចូលគ្នានូវការរត់ចម្ងាយឆ្ងាយ និងការជិះកង់ ដើម្បីផ្សព្វផ្សាយអំពីបេសកកម្ម៖ បង្កើនការយល់ដឹង និងកៀងគរមូលនិធិសម្រាប់មណ្ឌលកុមារផ្ទះក្លារ៉ា។

ស្មារតីនៃការធ្វើការងារជាក្រុម ការប្តេជ្ញាចិត្ត និងការជួយគាំទ្រគ្នាទៅវិញទៅមក ដែលធ្វើឱ្យកម្មវិធីនេះបានរៀបចំឡើងបានចំនួន ៥ឆ្នាំជាប់ៗគ្នា។ អ្នក​ចូលរួម​ក្នុង​បុព្វហេតុ​នេះ មិនថាជាអ្នកចូលរួម​រត់ ឬ​ជិះកង់​ពី​ខេត្ត​ក្រចេះ ទៅ​មណ្ឌលកុមារផ្ទះក្លារ៉ា ស្ថិតនៅក្នុង​ខេត្ត​កណ្តាល  គឺសុទ្ធតែធ្វើដំណើរក្នុងរយៈ​ចម្ងាយ​ផ្លូវ ២៥០ គីឡូម៉ែត្រ តាម​ដង​ទន្លេមេគង្គ។

កម្មវិធីនេះបានទាក់ទាញអ្នកចូលរួមប្រហែល ២០ នាក់ដែលបានរត់ និងជិះកង់ ហើយពួកគេបានបោះជំរុំ និងស្នាក់នៅផ្ទះសំណាក់តាមដងផ្លូវ ដែលជំរុញដល់ចំណងមិត្តភាព និងស្មារតីសហគមន៍។

ដើម្បីចូលរួមគាំទ្រដល់កុមារនៅមណ្ឌលកុមារផ្ទះក្លារ៉ា លោកអ្នកអាចធ្វើការបរិច្ចាគបានតាមអេប Wing Bank តាមរយៈគណនីលេខ ១០០៧៧៧៨៦៦។ សម្រាប់អ្នកប្រើប្រាស់គណនីធនាគារផ្សេងទៀតក៏អាចបរិច្ចាគដោយការស្កេន KHQR ដែលបានផ្ដល់ជូននៅទីនេះបានផងដែរ។ ការបរិច្ចាគត្រូវបានធ្វើឡើងដោយមិនគិតថ្លៃសេវា និងចូលផ្ទាល់ទៅកាន់គណនីរបស់មណ្ឌលកុមារផ្ទះក្លារ៉ា សម្រាប់គាំទ្រដល់ប្រតិបត្តិការប្រចាំថ្ងៃរបស់ពួកគេផងដែរ៕

សម្រាប់ព័ត៌មានបន្ថែម៖ https://www.facebook.com/250kmalongthemekong