ធ្លាប់ជាក្មេងម្នាក់ដែលធ្លាប់ត្រូវម្ដាយទិញសម្លៀកបំពាក់ធំៗឱ្យស្លៀក ដើម្បីរង់ចាំដល់ពេលដែលធំបន្តិច សម្លៀកបំពាក់មិនចង្អៀត ហើយអាចស្លៀកបានយូរ សន្សំសំចៃលុយបានច្រើន កុមារា Vincent Chan បានបង្ហើបថាវាជារឿងដ៏គួរឱ្យខ្មាសអៀន និងធ្វើឱ្យលោកមិនសូវមានភាពជឿជាក់លើខ្លួនឯងកាលពីក្មេង។

មិនត្រឹមតែប៉ុណ្ណោះ ពេលដែលនៅក្មេង ព្រោះតែមិត្តរួមថ្នាក់របស់លោក បានយកកិត្តិយសរបស់ម្ដាយ និងចំណុចខ្មាសអៀន ដែលធ្វើឱ្យលោកមានអារម្មណ៍អាម៉ាស យកមកចំអកលេងសើច បានធ្វើឱ្យលោកបានប្ដេជ្ញាចិត្តយ៉ាងមុតមាំសម្រាប់ជីវិតខ្លួនឯងថា ត្រូវតែក្លាយជាអ្នកមានឱ្យបាន ពេលដែលធំឡើង។

ចាប់តាំងពីពេលនោះមក លោកតែងតែផ្ដោតខួរក្បាលទៅស្រាវជ្រាវ និងរៀនសូត្រពីបុគ្គលដែលជោគជ័យ មានទ្រព្យជាច្រើនជាប្រចាំ រហូតដល់ពេលមួយ ពេលដែលលោកចម្រើនវ័យបន្តិច ក៏មានឱកាសបានទៅសិក្សានៅសាលាល្បីមួយ ដែលសម្បូរទៅដោយកូនអ្នកមាន ហើយមានមិត្តរួមថ្នាក់ម្នាក់អាចរកចំណូលបានរហូតដល់ទៅ២៥ម៉ឺនដុល្លារក្នុងមួយឆ្នាំ​ ទាំងដែលខ្លួននៅក្មេងល្ហក់នៅឡើយ។

ក្រោយឃើញបែបនេះ លោកក៏បានដាច់ចិត្តសួរទៅកាន់មិត្តរួមថ្នាក់ម្នាក់នោះអំពីគន្លឹះក្នុងការទទួលបាននូវភាពជោគជ័យលឿន ជាពិសេសអាចរកចំណូលបានច្រើនដូចជាគាត់។ ជាចម្លើយតប មិត្តរួមថ្នាក់ម្នាក់នោះបានប្រាប់ថា៖ ប្រសិនបើចង់ជោគជ័យ ឯងត្រូវធ្វើខ្លួនឱ្យដូចជាអេប៉ុង ដែលអាចស្រូបនូវអ្វីៗគ្រប់យ៉ាង ពីមនុស្សគំរូ ដែលអ្នកសរសើរចង់ធ្វើដូចជាគាត់។

ចាប់តាំងពីពេលនោះមក លោកក៏បានយកវាមកឆ្លុះបញ្ចាំងវិញ ហើយក៏គិតឃើញនូវស្នៀតបង្វឹកខួរក្បាល ដើម្បីអាចក្លាយជាអ្នកមាន សល់ទ្រព្យលឿនគឺ៖ ប្រសិនបើចង់សល់លុយ ១០ម៉ឺនដុល្លារទាំងវ័យក្មេង លោកគួរតែឈប់ផ្ដោតលើគោលដៅតូចៗ ហើយគួរផ្ដោតឱ្យខ្លាំងលើគោលដៅធំៗ ឱកាសធំៗ ដែលលោកអាចសម្រេចនូវអ្វីដែលលោកប៉ង។

ក្រោយដឹងស្នៀតមួយនេះ លោកក៏បានប្រឹងប្រែងរៀនសូត្រ ប្រឹងប្រែងធ្វើការងារ ប្រឹងប្រែងសន្សំ រហូតអាចធ្វើការងារនៅក្រុមហ៊ុនអន្តរជាតិ​ដែលអាចរកចំណូលបានខ្ពស់ដល់ទៅ ១២ម៉ឺនដុល្លារក្នុង១ឆ្នាំ។ ឆ្លុះបញ្ចាំងមកវិញ ស្ថិតនៅក្នុងវ័យត្រឹមតែ ២៤ឆ្នាំ លោកអាចសម្រេចគោលដៅរកលុយឱ្យបាន១០ម៉ឺនដុល្លារ ហើយត្រឹមតែប៉ុន្មានឆ្នាំប៉ុណ្ណោះ លោកអាចកសាងទ្រព្យបានរហូតដល់ទៅ ៤០ម៉ឺនដុល្លារ ពីការប្រើប្រាស់នូវស្នៀតបង្វឹកខួរក្បាលមួយនេះ និងយកប្រាក់ដែលរកបានទៅបង្កើតលុយជាបន្តបន្ទាប់ទៀត។

គួរជម្រាបថា មកទល់នឹងពេលនេះ លោកក៏បានលាឈប់ពីការងារ ហើយងាកមកធ្វើជាអ្នកបង្កើតមាតិកានៅលើបណ្ដាញសង្គមយូធូប ទាក់ទិននឹងការគ្រប់គ្រងហិរញ្ញវត្ថុ និងមេរៀនជីវិតល្អៗជាច្រើន ដែលទាក់ទាញអ្នកតាមដានជាង ៥០ម៉ឺននាក់ និងអាចរកចំណូលបានរាប់ពាន់ដុល្លារប្រចាំខែពីយូធូបផងដែរ៕

ចង់ពូកែរកស៊ី ចង់រៀនគំនិតរកស៊ីល្អពិសេសជាច្រើនរាល់ថ្ងៃឥតគិតថ្លៃ សូមចុចទីនេះ https://bit.ly/3FMWfb9