ប្រទេសវៀតណាមកំពុងជួបបញ្ហាធ្លាក់ចុះតម្លៃស្រូវអង្ករសម្រាប់ការនាំចេញ ព្រោះទីផ្សារសំខាន់ៗពីរ ដែលមានហ្វីលីពីននិងឥណ្ឌូនេស៊ី បានបង្កើនការនាំចូលស្រូវនិងស្តុកទុកស្រូវកាលពីឆ្នាំ២០២៤។
ដូច្នេះបច្ចុប្បន្ននេះគេមិនប្រញាប់ ក្នុងការទិញស្រូវអង្ករពីវៀតណាមទេនិងកំពុងរង់ចាំឱ្យតម្លៃធ្លាក់ចុះបន្ថែមទៀត ស្របពេលដែលមានការប្រកួតប្រជែងទីផ្សារតម្លៃអង្ករថោកៗពីប្រទេសឥណ្ឌា។
ទីភ្នាក់ងារសារព័ត៌មាន VN Express បានចុះផ្សាយនៅថ្ងៃទី១២ ខែមករា ឆ្នាំ២០២៥ ថាការធ្លាក់ចុះយ៉ាងខ្លាំងនៃតម្លៃនាំចេញអង្កររបស់វៀតណាមគឺបណ្តាលមកពីកត្តារួមផ្សំជាច្រើន រួមទាំងប្រទេសដែលនាំចូលអង្ករធំៗ ដោយបានប្រកាន់គោលនយោបាយកាត់បន្ថយការនាំចូល ជៀសវាងការទិញក្នុងតម្លៃខ្ពស់ និងមានខ្លះទៀតបានប្រកាស អំពីផែនការបញ្ឈប់ការនាំចូលអង្ករនៅឆ្នាំ២០២៥ផងដែរ។
យោងតាមសមាគមស្បៀងអាហារវៀតណាមបានឲ្យដឹងថា តម្លៃអង្ករបាក់របស់វៀតណាម បច្ចុប្បន្នគឺទាបជាងប្រទេសដៃគូប្រកួតប្រជែងធំៗដូចជា ថៃ ឥណ្ឌានិងប៉ាគីស្ថាន ក្នុងតម្លៃមួយតោនៗ។ ក្នុងនោះតម្លៃអង្ករបាក់ ៥% របស់វៀតណាមបានធ្លាក់ចុះមកនៅត្រឹម៤៣៤ដុល្លារក្នុងមួយតោន ខណៈនេះជាតម្លៃទាបបំផុត នារយៈពេល៤ឆ្នាំចុងក្រោយ
យ៉ាងណាមិញនាពេលថ្មីៗនេះឥណ្ឌាក៏បានបន្តការនាំចេញអង្ករ គួបផ្សំនឹងការផ្គត់ផ្គង់ដ៏សម្បូរបែប និងតម្លៃប្រកួតប្រជែង ដែលវាបានជះឥទ្ធិពលយ៉ាងខ្លាំងដល់ទីផ្សារពិភពលោក រួមទាំងវៀតណាមផងដែរ។ បន្ថែមពីនោះក៏មានរបាយការណ៍បានបង្ហាញថា ហ្វីលីពីនកំពុងចរចាលើកិច្ចសន្យានាំចូលអង្ករបន្ថែមពីភាគីឥណ្ឌា។
សូមជម្រាបផងដែរក្រៅពីឥណ្ឌា ក៏មានប្រទេសផ្សេងទៀតដូចជាអេហ្ស៊ីប ហ្គីយ៉ាណា ជប៉ុន និងវ៉េណេស៊ុយអេឡាក៏កំពុងរួមចំណែកក្នុងការបង្កើនផលិតកម្មផងដែរ។ ទន្ទឹមនឹងនេះដើម្បីរក្សានិងពង្រីកចំណែកទីផ្សារ បណ្តាប្រទេសដែលនាំចេញអង្ករនឹងត្រូវអនុវត្តយុទ្ធសាស្ត្រ ចូលទៅកាន់ទីផ្សារដែលអាចបត់បែនបាន ផ្តោតលើការកែលម្អគុណភាពផលិតផល និងស្វែងរកទីផ្សារថ្មីៗជាបន្តបន្ទាប់៕
អត្ថបទដោយ៖ ពីង ជូអេង
