រាជធានីភ្នំពេញ ប្រទេសកម្ពុជា ខែឧសភា ឆ្នាំ 2024៖  ក្រុមហ៊ុន Urban Living Solutions Co., Ltd. (ហៅកាត់ថា ULS) និងក្រុមហ៊ុន TSUTAYA BOOKS Malaysia Sdn. Bhd. (ហៅកាត់ថា TBM) មានសេចក្ដីរំភើបរីករាយក្នុងការប្រកាសពីភាពជាដៃគូយុទ្ធសាស្ត្រអាជីវកម្ម ក្នុងគោលបំណងនាំយកនូវបទពិសោធន៍ដ៏ល្អឯករបស់បណ្ណាគារ TSUTAYA (TBS) មកកាន់ប្រទេសកម្ពុជា។ កិច្ចសហការដ៏វិសេសវិសាលនេះ សន្យាផ្តល់ជូនប្រជាជនកម្ពុជានូវទិដ្ឋភាពវប្បធម៌ដ៏សម្បូរបែប និងគោលដៅនៃរបៀបរស់នៅដ៏ប្រណិតមួយ។

(រូបពីឆ្វេងមកស្ដាំ) លោក Hideyuki Uemoto នាយកប្រតិបត្តិរបស់ក្រុមហ៊ុន Tsutaya Books Malaysia Sdn. Bhd. (ហៅកាត់ TBM)។ លោក គាន គឹមលាង ដែលជានាយកគ្រប់គ្រងក្រុមហ៊ុន Urban Living Solutions (ហៅកាត់ ULS)

បណ្ណាគារ TSUTAYA ដែលបានបង្កើតឡើងនៅក្នុងឆ្នាំ 1983 តែងតែខិតខំឥតឈប់ឈរដើម្បីសម្រេចនូវគោលបំណងរបស់ខ្លួនឱ្យលើសពីបណ្ណាគារធម្មតា។ ចាប់តាំងពីការចាប់ផ្តើមដំបូងមក គោលបំណងចម្បងរបស់ពួកគេគឺបង្កើតឡើងមិនមែនត្រឹមតែជាទីកន្លែងលក់សៀវភៅប៉ុណ្ណោះទេ ប៉ុន្តែក៏ជាគោលដៅដែលអាចស្វែងយល់ពីរបៀបរស់នៅតាមប្រព័ន្ធផ្សព្វផ្សាយផ្សេងៗ ដែលត្រូវបានរៀបចំឡើងដោយយកចិត្តទុកដាក់។

ជាលទ្ធផល បណ្ណាគារ TSUTAYA ដំបូងគេនៅទីក្រុងអូសាកា បានក្លាយជាគំរូបណ្ណាគារមួយ ដែលដើរស្របតាមចក្ខុវិស័យនេះ ដោយផ្តល់ជូននូវជម្រើសសៀវភៅពិសេសប្លែកដ៏សម្បូរបែប ហាងកាហ្វេដ៏សែនមនោរម្យ និងសេវាកម្មជួលស៊ីឌី ដែលជាវិធីសាស្រ្តដ៏ច្នៃប្រឌិត ត្រួសត្រាយផ្លូវសម្រាប់ការកំណត់អត្តសញ្ញាណដ៏គួរឱ្យស្ញប់ស្ញែងរបស់បណ្ណាគារ TSUTAYA។ បច្ចុប្បន្ននេះ បណ្ណាគារ TSUTAYA បានពង្រីកវិសាលភាពរបស់ខ្លួនដោយមានហាងជាង 800 នៅទូទាំងប្រទេសជប៉ុន ចិន តៃវ៉ាន់ និងម៉ាឡេស៊ី ហើយក្រុមហ៊ុន TBM ប្តេជ្ញាពង្រីកវត្តមានរបស់ខ្លួនបន្ថែមទៀតនៅក្នុងតំបន់អាស៊ីប៉ាស៊ីហ្វិក ដោយនាំយកនូវម៉ាកល្បីៗ ចំណេះដឹងឥតដែនកំណត់ និងបទពិសោធន៍នៃរបៀបរស់នៅដ៏ល្អឥតខ្ចោះរបស់ខ្លួនទៅកាន់ទីផ្សារ និងអតិថិជនថ្មីៗបន្ថែមទៀត។

បណ្ណាគារ Tsutaya ក្នុងផ្សារទំនើប Takamatsu Orne

បន្ថែមពីលើការប្រមូលផ្ដុំដ៏ទូលំទូលាយរបស់បណ្ណាគារ មានទីតាំងជាច្រើនដែលផ្តល់ជូននូវហាងកាហ្វេ និងកន្លែងអង្គុយដ៏កក់ក្តៅ បង្កើតជាបរិយាកាសឱ្យអតិថិជនអាចសម្រាកលំហែកាយ ភ្លក់រសជាតិកាហ្វេដ៏ឈ្ងុយឆ្ងាញ់ និងរីករាយប្រើប្រាស់របស់របរដែលពួកគេបានទិញ ប្រកបដោយផាសុកភាព។ ម្យ៉ាងវិញទៀត អ្វីដែលធ្វើឱ្យបណ្ណាគារ TSUTAYA មានភាពខុសប្លែកគឺភាពល្អឥតខ្ចោះ និងភាពច្នៃ​ប្រឌិតពិសេស​របស់​បណ្ណាគារនេះ។ រាល់ទីតាំងនីមួយៗរបស់បណ្ណាគារ មានគោលគំនិតរចនា និងអត្តសញ្ញាណប្លែកៗរៀងៗខ្លួន ដែលធានាថាមិនមានហាងពីរមានលក្ខណៈដូចគ្នានោះទេ។ ចំណុចពិសេសនេះ បង្កើតឱ្យមានការទន្ទឹងរង់ចាំដ៏អស្ចារ្យសម្រាប់ការមកដល់របស់បណ្ណាគារ TSUTAYA នៅកម្ពុជា ដោយសន្យាថានឹងផ្ដល់នូវបទពិសោធន៍ថ្មីៗ និងរំភើបរីករាយរាល់ពេលដែលអតិថិជនអញ្ជើញមកកាន់បណ្ណាគារមួយនេះ។

បន្ថែមពីលើនេះ បណ្ណាគារ TSUTAYA ចូលរួមយ៉ាងសកម្មក្នុងការតភ្ជាប់ចំណងមិត្តភាពជាមួយសហគមន៍ក្នុងតំបន់ តាមការរៀបចំកម្មវិធីនានា ដូចជាកម្មវិធីចុះហត្ថលេខាពីអ្នកនិពន្ធឆ្នើមៗ និងសកម្មភាពជាច្រើនទៀតដែលទាក់ទងទៅនឹងសៀវភៅ បង្កើតជាការជំរុញដល់ការបណ្តុះនូវវប្បធម៌អានដ៏រស់រវើក។ ការប្ដេជ្ញាចិត្តលើការពង្រឹងវប្បធម៌អាននេះ ស្របគ្នាយ៉ាងល្អឥតខ្ចោះជាមួយនឹងទិដ្ឋភាពវប្បធម៌ដ៏រីកចម្រើនរបស់កម្ពុជា និងវិធីសាស្រ្តដែលផ្តោតសំខាន់លើសហគមន៍របស់ក្រុមហ៊ុន ULS ដែលគ្រប់គម្រោងនីមួយៗសុទ្ធសឹងតែរួមចំណែកផ្តល់ផលវិជ្ជមានទៅលើសុខុមាលភាពរបស់សមាជិកក្នុងសហគមន៍។ ការរួបរួមគ្នានេះមានគោលបំណងនាំយកនូវបទពិសោធន៍ថ្មីៗដ៏​គួរ​ឱ្យ​រំភើបសម្រាប់លោកអ្នកដែលស្រឡាញ់ចូលចិត្តសៀវភៅ និងបុគ្គលដែលស្វែងរករបៀបរស់នៅដ៏មានអត្ថន័យមួយ។

(រូបពីឆ្វេងមកស្ដាំ) លោក Hideyuki Uemoto នាយកប្រតិបត្តិរបស់ក្រុមហ៊ុន Tsutaya Books Malaysia Sdn. Bhd. (ហៅកាត់ TBM) ។ លោក គាន គឹមលាង ដែលជានាយកគ្រប់គ្រងក្រុមហ៊ុន Urban Living Solutions (ហៅកាត់ ULS)

លោក Hideyuki Uemoto ដែលជានាយកប្រតិបត្តិរបស់ក្រុមហ៊ុន Tsutaya Books Malaysia Sdn. Bhd. (ហៅកាត់ TBM) បានសម្តែងថា “កំណើនសេដ្ឋកិច្ចដ៏គួរឱ្យកត់សម្គាល់ និងទិដ្ឋភាពវប្បធម៌ដ៏រីកចម្រើនរបស់កម្ពុជា បង្ហាញនូវឱកាសដ៏គួរឱ្យទាក់ទាញសម្រាប់ការពង្រីកសក្តានុពលរបស់យើង”។

ដូចគ្នាផងដែរ លោក គាន គឹមលាង ដែលជានាយកគ្រប់គ្រងក្រុមហ៊ុន Urban Living Solutions (ហៅកាត់ ULS) បានឱ្យដឹងដែរថា “កិច្ចសហការដៃគូរវាងក្រុមហ៊ុន ULS និងក្រុមហ៊ុន TBM ឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់យើងក្នុងការលើកកម្ពស់គុណភាពរស់នៅសម្រាប់ប្រជាជនកម្ពុជា។ ការផ្តល់ជូនដ៏ពិសេសរបស់បណ្ណាគារ TSUTAYA នឹងបង្កើតនូវទីកន្លែងស្វាគមន៍ដ៏កក់ក្តៅសម្រាប់មនុស្សគ្រប់គ្នាក្នុងការភ្ជាប់ទំនាក់ទំនង និងស្វែងយល់ពីចំណង់ចំណូលចិត្តរបស់ពួកគេ”។

កិច្ចសហការដ៏គួរឱ្យរំភើបនេះនឹងឈានទៅដល់ការបើកទីតាំងបណ្ណាគារ TSUTAYA ចំនួនប្រាំមួយនៅទូទាំងប្រទេសកម្ពុជា នៅឆ្នាំ 2034។