ក្នុងខែសីហា ឆ្នាំ២០២៥ ការនាំចូលទំនិញពីប្រទេសថៃមកកាន់កម្ពុជា មានទំហំជាង ២១៤ លានដុល្លារ ខណៈបានថយចុះ ២៩.១% បើធៀបនឹងរយៈពេលដូចគ្នា កាលពីខែសីហា ឆ្នាំ២០២៤ ដែលមានតម្លៃប្រមាណ ៣០១ លានដុល្លារឯណោះ។ នេះបើតាមរបាយការណ៍ពី អគ្គនាយកដ្ឋាន និងរដ្ឋាករកម្ពុជា។
យ៉ាងណាមិញ យោងតាមរបាយការណ៍ដដែលបង្ហាញថា ក្នុងខែសីហានេះ កម្ពុជាបាននាំចេញទំនិញទៅកាន់ប្រទេសថៃវិញ មានទំហំជាង ៤៦លានដុល្លារ ដែលថយចុះប្រមាណ ៣៦.២% បើធៀបទៅនឹងរយៈពេលដូចគ្នាកាលពីឆ្នាំមុន។
គួរជម្រាបផងដែរថា គិតត្រឹមរយៈពេល ៨ខែពេញ ក្នុងឆ្នាំ២០២៥ ការផ្លាស់ប្តូរទំនិញរវាងកម្ពុជា-ថៃ មានទឹកប្រាក់ ២,៦៦ ពាន់លានដុល្លារ ធ្លាក់ចុះ ៤,៦% បើធៀបរយៈពេល ៨ខែដូចគ្នា ក្នុងឆ្នាំ២០២៤។ ក្នុងនោះទំនិញកម្ពុជានាំទៅថៃមានចំនួន ៥៣៤,៩ លានដុល្លារ ធ្លាក់ចុះ ៦,៤% និងថៃនាំចូល ២,១២ ពាន់លានដុល្លារ ថយចុះ ៤,១%៕
