ដំណាំទុរេនត្រូវបានគេចាត់ទុកថាគេដំណាំហូបផ្លែដ៏មានតម្លៃខ្ពស់មួយនៅក្នុងទីផ្សារកម្ពុជា ហើយដំណាំមួយនេះទៀតសោតក៏ជាដំណាំដែលពិបាកនៅក្នុងដាំដុះនិងថែទាំផងដែរ បើសិនជាដាំមិនត្រឹមត្រូវទៅតាមបច្ចេកទេសវានឹងធ្វើឱ្យទុរេនមិនបានផលច្រើន ខាតចុងខាតដើមថែមទៀតផង។ទាក់ទងជាមួយនឹងបច្ចេកទេសនៅក្នុងការដាំទុរេននេះផងដែរ ក៏មានដង្ខៅមួយរូបមានបទពិសោធន៍ដាំទុរេនជាច្រើនឆ្នាំ បានចូលខ្លួនមកចែករំលែកបច្ចេកទេសដាំក៏ដូចជាប្រាប់អំពីក្បួនដាំទុរេនឱ្យអស់លុយខ្ទង់២ពាន់ដុល្លារសម្រាប់អ្នកមានដីតែ១ហិកតាផងដែរ។
ក្នុងកិច្ចសម្ភាសន៍ជាមួយ Business Cambodia លោក ស៊ឹង សុជាតិ អ្នកបច្ចេកទេសដាំទុរេន បានបង្ហើបឱ្យដឹងថា សម្រាប់បងប្អូនដែលមានដី១ហិកតាអាចដាំទុរេនបាន ៣០០ដើម អាចទិញកូនទុរេនក្នុងតម្លៃ៥ដុល្លារអាចថាអស់ ១,៥០០ដុល្លារ សល់ពីចំណាយទិញកូនទុរេន បងប្អូនអាចយកទៅចំណាយលើការទិញទុយោសម្រាប់បាញ់ទុរេនបន្ថែមបាន អស់យ៉ាងច្រើនអាចត្រឹម ២,១០០ទៅ ២,៥០០ដុល្លារគឺអាចធ្វើបានល្មមសមរម្យហើយ។
ដង្ខៅទុរេនរូបនេះបានបន្ថែមទៀតថា ក្រោយពីចំណាយលុយដាំដំបូងអស់ជាង ២ពាន់ដុល្លារនេះម្តងហើយ យើងចំណាយពេលតែខ្ទង់ ៣០ខែ ចាប់ផ្តើមអាចប្រមូលផលបានជាបណ្តើៗហើយ លុះដល់ពេញអាយុ ៤០ខែ ម្ចាស់ចំការនឹងចាបផ្តើមប្រមូលលុយបានកាន់តែច្រើនបន្ថែមទៀត។
លោក ស៊ឹង សុជាតិ បានបង្កត់ធ្ងន់ផងដែរថា ថ្វីបើទុរេដាំហើយប្រមូលផលបានលុយច្រើនក៏ពិតមែន ប៉ុន្តែវាក៏ត្រូវការយកចិត្តទុកដាក់ថែទាំងពីម្ចាស់ផងដែរ មិនមែនដាំហើយទុកចោលវាហុចផលឱ្យនោះទេ តែដំណាំនេះទាមទារឱ្យម្ចាស់មើលថែទាំខ្លាំងព្រោះវាងាយនឹងទទួលការវាយប្រហារពីសត្វល្អិតជាងដំណាំទូទៅ ហេតុដូច្នេះម្ចាស់ចំការអាចនឹងត្រូវចំណាយមួយតង់ទៀតលើថ្លៃថ្នាំ និងថ្នាំបំប៉ន ប៉ុន្តែអាចប្រើជាថ្នាំបំប៉នធម្មជាតិដោយចំណាយយ៉ាងច្រើន១លានរៀលគឺសមល្មមហើយ។
ដោយឡែកចំពោះបងប្អូនខ្វះបច្ចេកទេសក្នុងការថែទាំដាំដុះទុរេន បងប្អូនអាចរៀនពីអ្នកជំនាញជាច្រើនដែលបានចែករំលែកនៅលើ YouTube ហ្វេសបុក ឬអាចសាកសួរផ្ទាល់ជាមួយលោកពូ ស៊ឹង សុជាតិ បានតាមរយៈលេខទំនាក់ទំនង ០៩៦ ៨៩៩ ៩៩២៨ / ០៨៨ ៨៨៨ ៥៥ ៥៤ បានផងដែរ៕ (វីដេអូ)
អត្ថបទដោយ៖សម្បត្តិ សុខឡាង