មួយរយៈពេលចុងក្រោយនេះកម្ពុជាទទួលបានបានគម្រោងវិនិយោគបន្ដបន្ទាប់ជាច្រើន ស្ទើរគ្រប់វិស័យ ដូចជាវិស័យវាយនភណ្ឌ កាត់ដេរ ផលិតស្បែកជើង និងវិស័យយានយន្ដជាដើម។ ហើយនៅក្នុងនោះ គម្រោងមួយចំនួនក៏បានដាក់ដំណើរជាហូរហែផងដែរ។ អ្វីដែលគួរឲ្យកត់សម្គាល់នៅដើមឆ្នាំ២០២៣ នេះសម្រាប់វិស័យយានយន្ដគឺមាន មានរោងចក្រដំឡើង និងផលិតសំបកកង់រថយន្ដបានសម្ពោធដាក់ឲ្យដំណើរការ។
១. រោងចក្រដំឡើងរថយន្ដISUZU
រថយន្ដ ISUZU គឺជាម៉ាក់យីហោដ៏ល្បីល្បាញមួយរបស់ប្រទេសជប៉ុន ដែលត្រូវបានក្រុមហ៊ុន K (Cambodia) Co., Ltd. ទទួលសិទ្ធផ្តាច់មុខនាំចូល និងចែកចាយរថយន្តមួយនេះនៅកម្ពុជា ហើយថ្មីៗនេះ ក្រុមហ៊ុនក៏បានបោះទុនវិនិយោគសាងសង់រោងចក្រដំឡើងរថយន្ត ISUZU នៅខេត្តកំពង់ស្ពឺផងដែរ។
រោងចក្រដំឡើងរថយន្ដ ISUZU នេះមានតម្លៃប្រមាណ ៧.៣ លានដុល្លារសហរដ្ឋអាមេរិក មានទីតាំងស្ថិតនៅតាមបណ្តោយផ្លូវជាតិលេខ៤ ភូមិសង្គ្រោះជាតិ ឃុំត្រពាំងគង ស្រុកគងពិសី ខេត្តកំពង់ស្ពឺ ត្រូវបានសម្ពោធបើកឲ្យដំណើរការកាលពីថ្ងៃទី២៩ ខែមីនា ឆ្នាំ២០២៣ កន្លងទៅ។
២. រោងចក្រផលិតសបកកង់រថយន្ត
កាលពីពេលកន្លងទៅនេះក្រុមហ៊ុន General Tire Technology (Cambodia) បានបោះទុនវិនិយោគបង្កើតរោងចក្រផលិតសំបកកង់រថយន្ដដ៏ធំមួយរបស់ខ្លួននៅក្នុងតំបន់សេដ្ឋកិច្ចពិសេសខេត្ដព្រះសីហនុ និងត្រូវបានបើកសម្ពោធជាផ្លូវការកាលពីថ្ងៃទី ២២ ខែឧសភា ឆ្នាំ២០២៣ កន្លងទៅនេះ។
សូមជម្រាបផងដែរថា រោងចក្រផលិតសំបកកង់នេះត្រូវបានក្រុមហ៊ុនខាងលើ ធ្វើការបោះទុនវិនិយោគប្រមាណ៣០០លានដុល្លា សាសង់នៅលើផ្ទៃដី ១៨០,០០០ម៉ែត្រការ៉េ និងមានសមត្ថភាពផលិតសំបកកង់ក្នុង១ឆ្នាំ គឺសំបកកង់តូច ៥លានគ្រឿង និងសំបកកង់ឡានធំ៩០០,០០០គ្រឿង នាំចេញជាចម្បងទៅកាន់ប្រទេសសហរដ្ឋអាមេរិក ទ្វីបអឺរ៉ុប ប្រទេសប្រេស៊ីល និងប្រទេសផ្សេងទៀត។
៣. ក្រុមហ៊ុនដំឡើងរថយន្ត Toyota
កាលពីពាក់កណ្ដាលឆ្នាំ២០២២កន្លងទៅ ក្រុមហ៊ុនផលិតរថយន្ដជប៉ុន TOYOTA បានបោះទុនវិនិយោគចំនួន ៣៦.៨ លានដុល្លារ បង្កើតរោងចក្រដំឡើងរថយន្ដរបស់ខ្លួននៅកម្ពុជាដែលឈ្មោះថា Toyota Tsusho Manufacturing (Cambodia) Co., Ltd. (“TTMC”) ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ដើម្បីលក់នៅទីផ្សារក្នុងស្រុក និងនាំចេញផងដែរ។
យោងតាមប្រសាសន៍លើកឡើងរបស់សម្ដេចតេជោ ហ៊ុន សែន នាយករដ្ឋមន្រ្ដី ក្នុងពិធីសំណេះសំណាលជាមួយបងប្អូនកម្មករ និយោជិត នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នៅថ្ងៃទី២៦ ខែឧសភា ឆ្នាំ២០២៣ នេះបានឲ្យដឹងថា "គម្រោងរោងចក្រដំឡើងរថយន្ដ TOYOTA ខាងលើអាចនឹងបើកដំណើរការនៅក្នុងខែកក្កដាខាងមុខនេះហើយ"៕
អត្ថបទដោយ៖ ឌឿក ស្រី នុត
